Mateo 9 - Kuna San Blas

Jesús dule-abagan-burgwar-nikad-nudaksad

¹ Degi, Jesús urgi nakwisgu, mata-dummad-gaka-baidse nadsunnad, na e-neggweburse nonisunnad.

² Agi dule-wargwen, bela-abagan-burgwar-nikad ese dule-megedgi-mai senonimalad. Ar Jesús dule-senonimalad-egi-gwen-bensuli-dakdegu, dule-abagan-burgwaledga sogded: —An-ai, gandik na be imako. Be-isgued an bega elisun.

³ Degi, Garda-Narmaked-Dulemar gwenna-gwenna ulubgi sogdemalad: “We-dule, Bab-Dummad-nuggi nue dodonaid.”

⁴ Ar Jesús dulemar-ulubgi-binsanaid sunna mag daksoggu, ega sogded: —¿Ar ibiga bemar na be-gwagegi ichakwa binsanai? ¿Geg-isgued-osulo be an-insae?

⁵ Be anga sogmardo, biti bur baisursunna soglege: ‘Be-isgunaid an bega osulos.’ An sogbarsundibe: ‘Be nugu, be gwisgu, be nae.’ Suli, ebobela baisursunna imaklesulid.

⁶ Degisoggu, ani Dule-Machi, dule-bonigwaled an nudakoed, adi, be wisgumalagar, igi an dule-bonigwaled sunna nudake, debayobi we-napneggi dule-gwage-isgued an sunna nudakbalid. Degi, Jesús dule-abagan-burgwar-nikadga sogdesun: —Be gwisgu, be-meged be sede. Be-negse be nasun.

⁷ Geb degi, dule-bonigwaled yog gwisguar imaksad, e-negse nadsunnad.

⁸ Ar dulemar dule-nugusad-dakdegu, geger dakdemalad. Bab-Dummad dulega we-gangued-uksadba, dulemar Bab-Dummad-nug odummodmarsunnad.

Jesús, Mateoʼse gochad

⁹ Jesús dule-nudaksadgi-gwichi nadgu, dule-wargwen-Mateoʼye-nugad dakalid. A-dulede, Roma-dummadga-mani-galeged-neggi, mani-gaedgi arbasiid. Jesús, Mateoʼse goted, ega sogded: —An-sapinga-guega anba be dage. Degi, Mateo gwisgusgu, eba yog naar imaksad.

¹⁰ Jesús, e-sapinganmala Mateo-neggi mas gunsigu, dulemar-Roma-dummadga-mani-gaedgi-arbamalad, degi, dule-baigan-galagwensuli-isgudimalad eba mas-gunbukwa gusmarmogad.

¹¹ Fariseoʼmar, Jesús-dakarmargu, dule-isganamarba mas-gunsii, Jesús-sapinganga sogdemalad: —¿Ar ibiga bemar-odurdaked-saila dulemar-Roma-dummadga-mani-gaedgi-arbamaladba, degi, dule-baigan-isgudimaladba wede mas gunne?

¹² Jesús, deyob Fariseoʼmar-soge-itosgu, sogded: —Dulemar-gegusurmalad ina-duled abesulid, unnila gegumaladbi ina-duled abe damalad.

¹³ Degisoggu, be namar, be baraminamar, igi-Bab-Dummad na E-Gardagi sogbie, deun sogsagu: ‘Anga ibmar-ogumakar-ukedba nue-wile-emar-daked bur an abeged.’ Oseas 6:6 ”Ar we-napnegse an nonikidi, dule-nueganse, isgudisur-itomaladse-golega an nonisulid. An nonikidi, dule-isgudimaladse-golega an nonikid.”

Mas-gunsuli-gudigued-igar

¹⁴ Agi Juan-sapingan Jesúsʼse nonimalad, ega sognonimalad: —Anmar, degi, Fariseoʼmar, imbagwenar Bab-Dummadse-golega mas-gunsuli gudidamalad. ¿Ar ibiga be-sapingandi Bab-Dummadse-golega gwen mas-gunsuli gudidasurmala?

¹⁵ Jesús, abin-sogded: —Dulemar ome-nikued-ibagi masgullegedse nonikile, ar dule-ome-nikuoed e-abargi-siir, ¿bukib binsamalo be insae? Geg bukib binsaed. Ar dule-ome-nikunaid e-idu-seledoed-ibagan nonikoed. A-ibagan-nonikile, agindi, Bab-Dummadse-golega mas-gunsuli gudigumalodo.

¹⁶ Jesús sogdebalid: “Ar dule morgoa-binid matuga mor-seredgi-nasikega gwen imakdisulid. Degir, morgoa-binid sinnii nadele, mor-sered aka bur bule achirmakdo-itole.

¹⁷ ”Deginbali, vino-binid gwen ibmar-uka-bugluga-sobaled-seredgi baliledisulid. Degir, vino-binid mudele, buglu-sered esirmako-itole. Degir binsa vino-binid milego-itole, degi, bugluse-bakar binsa miledo-itole. A-ulale, vino-binid buglu-binidgi baliledo, adi, ebobela nabir igarga guegar.”

Jairo-bunolo-durgusad, degi, ome-nugusad

¹⁸ Jesús wegi-sunmaksii, machered-wargwen, dule-nue-nug-nikagwad ese abarmaknonikid, yokorgi sindigar asabin signonikid, ega sognonikid: —An-bunolo emiskwaa burgwisad. Anba be dage. An-bunologi be-argan be mesdage, adi, gannar durguegar.

¹⁹ Jesús gwisgus-imaksagu, eba naded. E-sapinganmar eba nadmarmogad.

²⁰ Degine, ome-gwensak birgambe-gakabogus (12) boni-nalur-nika-gudiid, Jesús-yarganba nonikid, e-morduku ebunonikid.

²¹ Ome na ulubgi binsaed: “Ar unnila Jesús-mordukubi an ebusale, an nudaklegoye.”

²² Ar Jesús aibiris imaksagu, ome-gwichi dakalid. Geb ega sogded: —Omegwa, mer be dobgu. Ar be nue an-bengussursoggu, be nugussun. Agine, ome yog nuguar naded.

²³ Jesús dule-nug-nikagwad-negse modapsunnad. Agi dogdegu, dakded, dulemar-gar-ogormalad bato guagwar bukwa, degi, dulemar bukidar oimakbukwa.

²⁴ Jesús amarga sogded: —Bemar ainirmar. Ar bunolo burgwar maisulid, unnila gabmaid. Dulemar, Jesúsʼgi dododmar.

²⁵ Jesús bela dulemar-onisgua, geb negyaba bunolo-maidse dogded. Jesús bunolo-argangi-gadapgu, ogwichis imaksad.

²⁶ Bela a-yargi Jesús-bunolo-odurgusad, wisgunoni gusmalad.

Jesús dulemar-warbo-ibyasurmalad-nudaksad

²⁷ Jesús bunolo-neggi nodgu, dulemar-warbo ibyasurmalad Jesús-sorba dani gusmalad, binnasur-gordani gusmalad: —Be David-wagwa, be dule-dummadid, wile be anmar-dake.

²⁸ Degi, Jesús negse dogsagu, dulemar-warbo-ibyasurmalad ese nonimalad. Jesús amarga sogded: —¿Ar bemar insagua, sunna an bemar-nudak be insamala? Amar abin-sogdemalad: —Dummad, eye, sunna be anmar-nudake.

²⁹ Geb degi, Jesús amar-ibya ebusad. Amarga sogded: —Ar bemar an-bensurmarsoggu, be nugumarsun.

³⁰ Geb degi, amar nabir ataknadsunnad. Geb Jesús amarga ise-sogar imaksad: —Melle an-bemar-nudaksad dule-baiganga be sogmalo.

³¹ Ar dule-warbogwad-nugusmalad a-neggi nodmargu, bela neggwebur-iliba sogdemalad, igi Jesús e-onudaksa.

Jesús, dule-geg-sunmaked osunmaksad

³² Ar ibya-nugusmalad nodmargu, Jesúsʼse dule-niasaed-geg-sunmaked senonimalad.

³³ Jesús a-dulegi nia-onosgua, dule-geg-sunmaked nabir sunmaknaded. Dulemar-bukidar geger dakdemalad, sogdemalad: —Ar Israel-yargi wegiid-ibmar iduar gwen dakledisulid.

³⁴ Ar Fariseoʼmardi sogdemalad: —Ar wedi, nia-sailaba niamar-onodiid.

Jesús dulemar-nue-wiledaked

³⁵ Jesús bela neggweburmar-dummaganba-nanadii gusad, degi, neggweburmar-burwiganaba-nanadii gusbalid, Judíoʼmar-onmakedneggi dulemar-odurdakdii gusbalid, Bab-Dummad-e-negdakmaid, a-e-gayaburba-nuedgi sunmakdii gusbalid, degine, dulemar-abargi bela galagwensuli-gegumalad, degi, uellemalad-nudakdii gusbalid.

³⁶ Ar Jesús dulemar-bukidar-dakdegu, nue wile amar-dakded, ar ade, dulemar e-bendaked-sate-gudidii daked, degine, e-idued sate dakbalid, igi sibad-wawaad e-idued-sate-gudii damalayob.

³⁷ Geb degi, Jesús burbar e-sapinganga sogded: —Napira an bemarga soged, nainugi ibmar-gwag-weleged bukidarad, ar e-weemaladdina ichee gued.

³⁸ Degisoggu, nainugi-ibmar-gwag-weleged-e-ibedse be wilesakwaa egismar, adi, e-nainuse ibmar-gwag-wemalad barmidagegar.