Mateo 19 - Kuna San Blas

Jesús, ome-metedgi, degi, sui-metedgi sunmaksad

¹ Emi Jesús deyob-ibmar-sogsad-sorba, Galileaʼgi bangudsunnad. Judea-yalaganba, degi, Jordán-diwar-obakar nade gusad.

² Dulemar-bukidar Jesúsʼba nade gusmalad, agi Jesús dule-uellemalad onudaksad.

³ Geb agi gwenna-gwenna Fariseoʼmar Jesúsʼse nonimalad, yamo yardakega ese nonimalad. Ega sognonimalad: —¿Wede yogsaar sunna ome-meteleye igar mai?

⁴ Jesús abin-sogded: —¿Ar bemarde Bab-Dummad-Gardagi absodisurmarsi? Gebesailagi Bab-Dummad we-napneg-nasikargu, ‘machered ome-ebo abirgunagwar ogwisnonikid.’ Génesis 1:27; 5:2

⁵ Degi, Jesús sogdebalid: —Bab-Dummad-Gardagi sognaibalid: ‘A-ulale, machered ome-nikusale, e-babgi bangudoed, e-nangi bangudoed. Geb machered e-ome-ebo garmakdii guoed. Ebogwadi, san-wargwennagwadga gunonikoed.’ Génesis 2:24

⁶ ”Ar degisoggu, bar warbosulid. Unnila san-wargwenna gunonimarsunnad. Ar degisoggu, dule, Bab-Dummad-dule-abirgunagwar-imaksadi, gwen na metemalaga imakosur.”

⁷ Fariseoʼmar, Jesús-abin sogdemalad: —Ar degite, ome-metega, ¿ibiga Moisés ome-meted-garda-imakoye igar-mesissunna?

⁸ Jesús abin-sogded: —Ar Moisés bemar-gwage-dutusulidba, ome-metega, sunna bemar ome-meted-garda imakye bemarga igar mesisgusad. Ar iduardi, deyob igar maisulinad.

⁹ Andi an bemarga soged, ar doa-dule, unnila e-ome e-dikarba-nosardi, nabir meted. Ar degisulirdi, we-machered ome-baid-nikusale, ome-dikarba negsichigi yolediid. Ar doa-dule, ome-melleded-nikusale, we-dule, negsichigi yoledimogad.

¹⁰ Jesús-sapingan Jesúsʼga sokarmarsunnad: —Ar weyob macheredga ome-nikuedsik ega igar maile, mer bur ome-nikued nabirsundo.

¹¹ Geb degi, Jesús e-sapingan-abin sogded: —Suli, be noar sogmala. We-ibmar-soglenaid be aku itomalad. Unnila, Bab-Dummad, dulemarga-igar-uksadga, amarbi nabir ome-nikuosuli nanamaloed.

¹² Ar gwen-gwen gusgu muu-neg-akale, geg-ome-nikued danikid. Ar gwen-gwen yamo siamar-baisur-dakega alu-gwasuar imaklesmalad. Ar gwen-gwenbali, na dukin Bab-Dummad-e-negdakmaid-ular, mer-ome-nikued imaksamalad. Ar dule na unni omesuli nanao-itogele, omesuli-nanaed-igar na abingado.

Jesús, mimmigangi nued binsasad

¹³ Geb degi, Jesúsʼse mimmigan-senonimalad, e-argan mimmigan-nonogi mesega, adi, Bab-Dummadse ega golegar. Jesús-sapingan dulemar-mimmigan-senonimaladse uluarmalad.

¹⁴ Jesúsʼdi e-sapinganga sogded: “Mer ese urwemar. Mimmigan anse daged be imakmar. Mer be igar gamala. Ar Bab-Dummad-e-negdakmaid we-mimmiganyob-damaladgadid.”

¹⁵ Geb Jesús mimmigan-e-nono-birgi e-argan mesisgu, Bab-Dummadse ega gochad. A-sorba, Jesús nade gusad.

Dule-mani-ibed Jesúsʼse nonikid

¹⁶ Geb degi, dule-wargwen Jesúsʼse nonikid, ega sognonikid: —Odurdaked-saila-nued, burba-geg-bergued an nikuega, ¿ibi-nued an saergebe?

¹⁷ Jesús abin-sogded: —¿Ibiga dule-nuedye be anga soge? Ar dule-nued niksulid. Unnila Bab-Dummadbi wargwenna dule-nued gued. Ar burba-geg-bergued be nikubiele, Bab-Dummad-Igar-Mesisadba be nanaergebed.

¹⁸ Dule abin-sogded: —¿Igid-igarmala? Geb Jesús abin-sogded: —‘Melle be dule-oburgo. Melle be be-abirginsulid-ebo galagwensuli nanao. Melle be ibmar-atursao. Melle be gakansaar aimargi sunmako.

¹⁹ Be-bab-nug-odummodii, degi, be-nan-nug-odummodii be nanamalo. Degine, na be dukin san-sabeyobi, emar be sabgumogo.’ Éxodo 20:12-16; Levítico 19:18; Deuteronomio 5:16-20

²⁰ Sapingwa Jesús-abin sogded: —Gusgu an sapingwagwad-akar bela we-Igarmar-Mamaidba an nanadiid. Emidi, ¿ibubi napi-imaked an abesunna?

²¹ Jesús abin-sogded: —Ar igar-napiragwadbi-imakdii be nanabiele, be-negse be nae. Bela be-ibmar-nikadi, manigi be uko. Geb a-mani, dule-wileganaga be mimio. Degiir, geb be nibneggi ibmar-nued nikuoed. Geb a-sorba, anba be dago, an-sapinga guegar.

²² Sapingwa, deyob Jesús ega soge itosgu, naibi-ito naded, ar ade, dule-mani-ibedid.

²³ Geb degi, Jesús e-sapinganga sogdesunnad: —Napira an bemarga soged, ibiyobi dule-mani-ibganga Bab-Dummad-e-negdakmaidse-doged igar dutusuli, ar ade, dogdar maniginbi binsamalad.

²⁴ Gannar an bemarga soged, moli-yargan-mureged bur-baisursunna iko-ibyagi doged, ar dule-mani-ibeddi bur beedse Bab-Dummad-e-negdakmaidse doged.

²⁵ Jesús-e-sapingan, Jesús-wegi-soge-itosgu, nue-geger-ito nadmalad. Agala, sogdemarsunnad: —¿Ar doa degite, sunna abonolegosunna?

²⁶ Jesús e-sapingan-dakdegu, ega sogded: —Ar dulemargardi, geg ibmar gued. Bab-Dummadgardi, bela ibmar nabir guedbiid.

²⁷ Geb degi, Pedro abin-imakdegu, sogded: —Anmardi beba-naega belagwapa ibmar obesad. Degite, anmardi, ¿ibu nikumarmogosunna?

²⁸ Jesús abin-sogded: —Napira an bemarga soged, Bab-Dummad we-ibmar-bela-ogwaoed-ibagangi, ani Dule-Machi, an-ologan-yeerdaklegedgi an sigidapir, bemar-anba-nagusmalad ologan gwaambe-gakabogwadgi (12) sigmarmogoed, adi, Israel-dorgan-sogambe-gakabogwadga igar-nabosii be gumalagar.

²⁹ ”Ar doa-dule anba-naid-ular ibmar-metele, e-negmar-metele, e-gwenadgan-metele, e-bunmar-metele, e-bab, e-nan, e-ome, e-mimmigan, degine, e-nainumar-metele, we-dule ibmar-dulataledba (100) bur bule abingaoed, degine, burba-geg-berguedi nikubaloed.

³⁰ ”Ar bukidar emar-idudimaladi, emar-sorbalidga gumaloed. Bukidar emar-sorbarmaladdi, emar-idumaladga gumaloed.”