Mateo 14 - Kuna San Blas

3g. Diigi-dule-oged-Juanʼye-nugad, burgwisad (14:1-12)

¹ Deun, a-ibagangi, Rey-Herodes itoalid, bela dulemar Jesúsʼgi sunmakedbimala.

² Agi Herodes e-maiganga sogded: “We-dule-gudiid, we Diigi-dule-oged-Juanʼye-nugadid. Ar wede, gannar durgus gudiid. A-ulale, nabir ibmar-dakledisulid imaked.”

³ Ar ade, Herodes, Herodías-ular Diigi-dule-oged-Juanʼye-nugad gasa gusad. Esgoro-dubgi-edicha, esgaryagi metegusad. Herodíasʼdi, Felipe-omenad. Geb Herodes e-urba-Felipeʼgi ome-egwacha gusad.

⁴ Ar ade, Juan Herodesʼga sogsa gusad: “We-ome be nikuedsulinye.”

⁵ Deun, Herodes Juan-oburgwebien-inigwele, dulemar-dobedba geg oburgwe gusad. Ar ade, dulemar Juanʼgi binsamalad, we Bab-Dummad-gayaburba-barsogedye.

⁶ Deun, Herodes-gwalulesad-ibagi iba-ononanaigua, Herodías-e-sisgwa emar-abargi-dodosgua, Herodes, nue-yeer daksagusad.

⁷ Deyob-daksadbali, Herodes bunagwaga sogdegusad: “Napira ise-sogar an bega soged, ar ibu be anse egisbie, an bega ukoed.”

⁸ Geb a-bunagwade, e-nan-ega-sogedba Herodesʼga sogded: —Diigi-dule-oged-Juanʼye-nugad-e-nono be bategi anga udaye.

⁹ Rey-Herodes deyob bunagwa-ega-soge-itosgua, nue-bukib-ito naded, ar bato bunagwaga sogsasoggu, “Napira an bega sogye, ar ibu be anse egisbiele, an bega ukoye,” degine, dulemar-eba-mese-naba-siid e-itosmarmosoggu, Herodes e-sordamarga sogdesunnad: “Bunagwaga Diigi-dule-oged-Juanʼye-nugad-e-nono ukmarye.”

¹⁰ Degisoggu, Herodes, Diigi-dule-oged-Juan-esgaryagi-mellesiid-e-dukar-egwannega igar-uksasunnad.

¹¹ Sordamar Diigi-dule-oged-Juanʼye-nugad-e-nono bategi senonimargu, bunagwaga uknonimarsunnad, geb degi bunagwa e-nanga uksamosunnad.

¹² Geb degi, Juan-sapingan, Juan-e-san sunonimalad, geb neg-uangi digsamarsunnad. Degine, Juan-e-sapingan Jesúsʼse-nadmargu, ega sogdapmalad, igi Juan burgwisa.

4. JESÚS, NEGGWEBUR-BAID-BAIDGI ARBAED IMAKSAD (14:13–20:34) 4a. Jesús ibmar-dakdisulid baigan imaksad (14:13–17:27) Jesús, dule-miliatar (5,000) masgi oguchad

¹³ Jesús Diigi-dule-oged-Juan-burgwisad-wisgusgu, dulemargi banguded, bachikii nega-dulesulidgansik urgi nadegusad. Ar dulemar Jesús-naded-wisgusmargu, e-neggweburmar-akar nagab ese nadegusmalad.

¹⁴ Jesús urgi aidesgu, dulemar-bukidar e-idu bukwa dakalid. Nue-wile dulemar-dakded, degine, dulemar-uellemalad bela nudaksad.

¹⁵ Bato neg-sedodgu, e-sapingana Jesúsʼse nonimalad, ega sogdemalad: —Anmar nega-dulesulidgangi bukwamalad, degine, bato neg-sedodbalid. Degisoggu, dulemar be barmid, adi, neggweburmarse namalagar, agi masgunned na bakmaloed.

¹⁶ Jesús e-sapingan-abin sogded: —Wemar naed abelesulid. Bemar ega masgunned ukmala.

¹⁷ E-sapingan, abin-sogdemalad: —Anmar wegi mas sated. Unnila madu gwaatar, degi, ua ukabo nikmalad. Degisoggu, geg anmar masgi ogunned.

¹⁸ Jesús e-sapinganga sogded: —Be anga madu sedamar, ua be anga sedabar.

¹⁹ Geb degi, Jesús gagan-birgi dulemar-oambikuega imaksad. Jesús madu-gwaataled, degi, ua-ukabogwad-susgua, niba atakdegu, Bab-Dummadga dog-nuedye sogsad. Geb degi, Jesús madu, degi, ua bisge-bisge imaksagu, e-sapinganga ukded. Degi, e-sapingan dulemarga ukdemosunnad.

²⁰ Degine, bela-dulemar-gudidimalad nue-immeles mas guchamalad. Jesús-sapingan mas-obichad-wesmargu, garba-gwaambe-gakabo-mergu (12) enosmalad.

²¹ Dulemar-mas-guchamalad, unnila macherganbi miliatarsaar (5,000) mergued. Omegandi, degi, mimmigandi, obarilesulid.

Jesús demar-birgi nanasad

²² Geb degi, Jesús e-sapingan-urgi-gwae-nakwega imaksad, adi, e-iduar mata-dummad-gaka-obakar namalagar. Edi, dulemar-napi-dakega besgweled.

²³ Jesús bela dulemar-barmisgu, Bab-Dummadse golega yar-birse walagwen-nakwisad. Neg-mutikgudgu, walagwen Bab-Dummadse gorsigisad.

²⁴ Ur Jesús-sapingan-egi-nadapiddi mataba demar-dummadba omukulenadapid, ar ade, burwa asabin gormaid.

²⁵ Bolegoedba, Jesús e-sapinganse mata-dummad-birgi ganna-ganna nadegusad.

²⁶ Jesús-sapingan, mata-dummad-birgi dule-dani-dakarmargua, bela-bela gwakidmalad, dobedba binnasur gotemalad. Sogdemalad: —¡Girmar anmargi dani!

²⁷ Degisoggu, a-ular, Jesús e-sapinganse yog gotebin imaksad. Ega sogded: —¡Mer be dobgumar! ¡Be gandik imakmar! ¡Ani an gudii!

²⁸ Geb degi, Pedro, abin-sogded: —Dummad, ar beele, an bese mata-dummad-birgi ganna-ganna-daged be an-imakdo.

²⁹ Jesús Pedroʼga sogded: —Be dagdena. Pedro urgi-siid mata-dummadgi-aidesgu, mata-birgi ganna-ganna Jesúsʼse nadegusad.

³⁰ Pedro burwa-binnasur-gormai dakdegu, dobe-ito naded. Geb degi, matagi dogdegu, binnasur goted, sogded: —¡Dummad! ¡An-bendake!

³¹ Geb degi, Jesús argangi Pedro-gasgu, Pedroʼga sogded: —Ibiyob be an-bengue. ¿Ar ibiga be an-bengusa?

³² Ar Jesús, Pedro-ebo urgi nakwismargu, burwa bogidik naded.

³³ Degine, urgi-bukwamaladi bela deyob daksamargu, Jesús-nug odummodmarsunnad. Jesús-abin dulluu nono-imaksamalad. Geb Jesúsʼga sogdemalad: —Ar nue be Bab-Dummad-Machi-sunnadid.

Jesús, Genesaret-neggweburgi uellemalad nudaksad

³⁴ Geb degi, Jesús e-sapinganmala mata-dummad obaksamargua, Genesaret-neggweburse nonimarsunnad.

³⁵ Dulemar-a-neggweburginmalad Jesús-gudiid mag daksamargu, neggwebur-dikarbarmaladse gayaburba-mimidmalad. Geb bela dulemar-uellemalad Jesúsʼse senonimalad.

³⁶ Dulemar Jesúsʼgi wilenaigus damalad. Ega sognai damalad: “Unnila be mordukubi wis ebuged be anmar-imakye.” Ar bela e-morduku-ebusmalale, bela nugusdamalad.