Mateo 1 - Kuna San Blas

1. JESÚS-E-DAD-DUMMAGAN, DEGI, E-GWALULESAD (1:1–2:23) 1a. Jesucristo-e-dad-dummagan (1:1-17)

¹ Jesucristo e-dadgansiki ilekwaa-danikid-e-garda. Jesucristo, David-e-wagwad, degi, Abraham-e-wagwabalid.

² Abraham-machidi, Isaacʼye nugad, Isaac-machidi, Jacobʼye nugad, Jacob-machidi, Judáʼye nugad, degi, e-masmala-baigan.

³ Judá-machidi, Faresʼye nugad, degi, e-machi-baiddi, Zaraʼye nugad. We-machi-warbogwad-e-nandi, Tamarʼye nugad. Fares-machidi, Esromʼye nugad, Esrom-machidi, Aramʼye nugad.

⁴ Aram-machidi, Aminadabʼye nugad, Aminadab-machidi, Naasónʼye nugad, Naasón-machidi, Salmónʼye nugad.

⁵ Salmónʼdi, Rahab-ebo Booz-baksad. Boozʼdi, Rut-ebo Obed-baksad. Obed-machidi, Isaíʼye nugad.

⁶ Isaí-machidi, Rey-Davidʼye nugad, Rey-David-machidi, Salomónʼye nugad. Salomón-e-nandi Urías-e-omega-gusadid.

⁷ Salomón-machidi, Roboamʼye nugad, Roboam-machidi, Abíasʼye nugad, Abías-machidi, Asaʼye nugad,

⁸ Asa-machidi, Josafatʼye nugad, Josafat-machidi, Joramʼye nugad, Joram-machidi, Uzíasʼye nugad,

⁹ Uzías-machidi, Jotamʼye nugad, Jotam-machidi, Acazʼye nugad, Acaz-machidi, Ezequíasʼye nugad,

¹⁰ Ezequías-machidi, Manasésʼye nugad, Manasés-machidi, Amónʼye nugad, Amón-machidi, Josíasʼye nugad.

¹¹ Judíoʼmar Babiloniaʼse gales ebipilesmargu, Josías machimala-nikunonikid: Jeconías, degi, e-masmala-baigan.

¹² Judíoʼmar gales Babiloniaʼse ebipilesmalad-sorba, Jeconías, Babiloniaʼgi e-machi-Salatiel-baknonikid. Salatiel-machidi, Zorobabelʼye nugad.

¹³ Zorobabel-machidi, Abiudʼye nugad, Abiud-machidi, Eliaquimʼye nugad, Eliaquim-machidi, Azorʼye nugad.

¹⁴ Azor-machidi, Sadocʼye nugad, Sadoc-machidi, Aquimʼye nugad, Aquim-machidi, Eliudʼye nugad.

¹⁵ Eliud-machidi, Eleazarʼye nugad, Eleazar-machidi, Matánʼye nugad, Matán-machidi, Jacobʼye nugad.

¹⁶ Jacob-machidi Joséʼye nugad. José, María-e-suiga gusadid, geb agi Jesús gwalulesad. We-Jesús, Cristoʼye nugad.

¹⁷ Degisoggu, Jesús-e-dadgan, Abraham-akar, Davidʼse, e-ambe-gakabake (14) gued. Degi, David-akar, Judíoʼmar gales Babiloniaʼse-ebipilesmaladse, Jesús-e-dadgan e-ambe-gakabakebalid (14). Degi, Judíoʼmar gales Babiloniaʼse ebipilesmalad-akar, Cristoʼse, Jesús-e-dadgan e-ambe-gakabakebalid (14).

1b. Jesucristo-bipigwaun-gudigusad (1:18–2:23)

¹⁸ Jesucristo weyob gwalulesad: María, Jesús-e-nan, deun José-ebo igar nabosmalad na nikumaloye. Nikued-idu, María daklealid, Bab-Dummad-Burba-Isligwaled-egi-ataksadba bato gurgin-nika gudii.

¹⁹ María-e-sui-José, dule-gwage-nuedsoggu, yapa-María-obingegsaedba arbakee mete-sokalinad.

²⁰ Ar José degi-binsadii, gabgi Bab-Dummad-e-baliwitur ese nonikid, ega sognonikid: “David-wagwa-José, mer be dobgu. María be-omega-guega be abingae. Ar María-bonigwar be dakedi, Bab-Dummad-Burba-Isligwaled-sogedba deyob gusad.

²¹ María, machi-wargwen nikuoed, Jesúsʼye be onugsaoed, ar ade, isguedgi e-neggwebur abonogoed.”

²² Weyob bela ibmar-gusadi, deyob gusad, adi, Bab-Dummad na e-gayaburba-barsogedba ibmar-sogsadba guegar, deun sogsagusgu:

²³ “Emi be dake, yagwa-wargwen gurgin-nika guoed, goe nikunonikoed. Emanuelʼye onugsaoed.” Isaías 7:14 Emanuel sogleged, “Bab-Dummad anmarba gudiiye.”

²⁴ José gabdakmai ataksagu, ar igi Bab-Dummad-e-baliwitur ega sogsa, deyob imaksad. José, María-nikunonisunnad.

²⁵ Degi-inigwele, amba Maríaʼse gochasurgweled. José, María-machi-gebe-nikusad-sorba geb Maríaʼse gochad. Machigwa-gwalulesadi, Jesúsʼye onugsasad.