Marcos 7 - Kuna San Blas

Dulemar-gwage-oichoed

¹ Fariseoʼmar, degi, Garda-Narmaked-Dulemar gwen-gwen-Jerusalénʼgi-danimalad, Jesús-walik bukunonimalad.

² Amar, abar-Jesús-sapingan argan-swilisuli, argan-enuksasuli mas-gunne-dakarmargua, egi sunmakarmalad.

³ Ar Fariseoʼmar, degi, Judíoʼmar-baigan, e-dadgan-igar-mesisadba argan-enuksasulir geg mas gunmalad, ar e-dadgan-ega-igar-metenadedba damalad.

⁴ Fariseoʼmar ibmar-ukleged-neggi danimalar, argan-enuksasulir geg mas gunmalad. Deginbali, e-dadgan ega igar-bamalad-metenadedba damarbalid, nog-enukedsik, ibmar-simalad-enukedsik, bormomar-enukedsik, degi, megmalad-enukedsik.

⁵ A-ulale, Fariseoʼmar, degi, Garda-Narmaked-Dulemar Jesúsʼse egichiarmalad: —¿Ibiga be-sapingan anmar-dadgan-igar-maidba dasurmala? Emide argan-enuksuli mas gunmalad.

⁶ Jesús, abin-sogded: —Bemar wagar-darbodaed-dulemalad. Aga Bab-Dummad-gayaburba-barsoged-Isaías, garda-narmaksagu nabir bemarnik sogsagusad, Bab-Dummad weyob sogye: ‘We-dulemar unnila asginbi an-nug odummomalad, ar e-gwage-ulubgindi, angi gwen binsasurmalad.

⁷ Ar binsa asginbi an-nug odummodimalad. E-igar-maid odurdakedi, dulemar-igar-mesisadba bur odurdakmalad.’ Isaías 29:13

⁸ ”Ar bemar dulemar-igar-mesisadba-damalaga, Bab-Dummad-Igar-Mesisadba dasurmalad.”

⁹ Jesús sogdebalid: —Bemar be-dadgan-igar-mamaidgi bur bule binsasoggu, Bab-Dummad-Igar-Mamaid be iedmarsunnad.

¹⁰ Ar Moisés sogsagusad: ‘Be-babgi, degi, be-nangi, be binsaed-nikaa damaloye.’ Degi sogsabalid: ‘Dule-gwensak na e-babgi, degi, e-nangi, gaya-ichakwa sunmaksale, a-dule oburgwilegoye.’

¹¹ ”Ar bemardi, odurdakmalad sunna dule-wargwen e-babga, degi, e-nanga sogye: ‘Geg an be-bendake, ar bela an be-bendakega-ibmar-nikadi bato an Bab-Dummadga uksaye.’

¹² Degidbali, mimmi na e-bab-bendaked, degi, e-nan-bendaked, bar be imakega imaksurmalad.

¹³ Wegi-bemar-daed-odurdakedba, bemar Bab-Dummad-Igar-Maidba geg damalad. Wegi-damalad-baigan bukidar be imakmarbalid.”

¹⁴ Geb Jesús dulemarse gannar gochad, ega sogded: —Bela an-itomalo. We, be magar-itomala:

¹⁵ Ibmar-neg-asgi-danikid dulegi-uboder, geg dule-gwage ichoged. Ar gwagegi-ibmar-naid-ainieddi, dule-gwage ichoged.

¹⁶ Bemar nue-itobiele, nue itomar.

¹⁷ Jesús dulemargi-bangudgu, negyaba dogdapid. Agi e-sapingan ese egichialid: —Emisgwa be ibmar-burbar-odurdaksigusad, wede ibi nue obare.

¹⁸ Jesús e-sapingan-abin sogded: —¿Amba bemar akusunna itomarmoga? ¿Bemar wissursi, ibmar-neg-asginmalad dulegi uboder, geg dule-gwage ichoged?

¹⁹ Ar ade, e-gwagese ubosulid, unnila e-sabanse ubodapdaed, geb gannar ber mileddabalid. A-Jesús sognaisundo, bela Bab-Dummadga mas swilidikidbiye.

²⁰ Jesús sogdebalid: —Ar dule-gwagegi ibmar-ainiedi dule-ichoged.

²¹ Ar ade, e-gwagegi binsaed-isgana ainiardaed: Omegangi-galagwensuli-binsaed, atursaed, emar-ibloged,

²² ome-dikarba, degi, machered-dikarba-yoleged, aimar-ibmarbina-soged, aimargi-isdar-binsaed, emar-yardaked, e-itolegedba-galagwensulidaed, nobgued, dulegi-gakansaar-sunmaked, san-dummarba-imaked, degi, binsaed-satedaed.

²³ Bela we-ibmar-isganamar dule-gwagegi ainied, degi, dulemar-ichoged.

Ome-Sirofeniciaʼgined, Bab-Dummadgi-bensulid-nikad

²⁴ Jesús Genesaretʼgi-gudii, Tiro-yarse, degi, Sidón-yarse, nadegusad. Neg-gwagwengi dogdapid, dule-gwen-e-wisgubisuli abesad, degi-inigwele, geg-duku gusad.

²⁵ Ome-wargwen e-bunolo-niaburba-nikad, Jesúsʼgi sunmakmar-itoargu, Jesúsʼse nonikid, yokorgi asabin sindigar signonikid.

²⁶ A-ome Judío-dulesulid, Sirofeniciaʼginedid. Geb ome Jesúsʼgi wilenaigusad, e-bunologi-nia-maid ega onoye.

²⁷ Jesúsʼdi ome abin-sogded: —Bina mimmigan-inse mas-gunnega be imake. Ar ade, ibnuedsulid mimmigan-annik mas-sued, degi, achuga a-mas uked.

²⁸ Ome, Jesús-abin sogded: —Dummad, napira be soge, degi-inigwele, mimmigan-mese-urba-mas-obatemamaid amba achumarse-bakar, gunmogad.

²⁹ Jesús omega sogded: —Ar weyob be anga sogsad-ular, gwage-bogidikidgi be-negse be nae. Be-bunologi-nia-maid bato nosad.

³⁰ Ome na e-negse mosgua, e-bunolo e-gabedgi-mai dakdapid. Bunologi-nia-maid bato nosad.

Jesús dule-geg-sunmaked, geg-itobalid, nudaksad

³¹ Jesús Tiro-yargi-gudii gannar alid. Geb Sidón-yarsik-argua, Decápolis-yala-imbaganba Galilea-mata-dummad-naidse nodapid.

³² Agi, dule-uaya-yalliled, degi, naya-naya-sunmakbalid Jesúsʼse senonimalad. Dulemar Jesúsʼgi wilenaigusmalad, a-dule-nudakega argan egi mesye.

³³ Jesús a-dule dulesulidba bachikii sesad. Geb Jesús dule-bonigwaled-uaya-yaba e-goo odos imaksad, degi, e-googi wiaksagu, dule-bonigwaled-e-gwabin, e-googi ebus imaksabalid.

³⁴ Geb Jesús niba atakdegu, ise-bunnoar imaksad, geb dule-bonigwaledga sogded: “¡Efata!” A sogleged: “Be argaye.”

³⁵ Geb dule-bonigwaled yog-magar-ito naded, degi, nued sunmaknadbalid.

³⁶ Jesús dulemarga sogsad, mer dule-baiganga bipisaar sogmaloye. Ar Jesús dulemarga degi-sogdele, aka bur bule dulemar Jesús-barsogde damalad.

³⁷ Dulemar bela-bela geger Jesús-dakmalad, sogdemalad: “We-dule ibmar-nueganbi imaked. Ar dule-uaya-yalliledse-bakar, magar-ito imaked, degi, dule-geg-sunmaked nabir sunmak imakbalid.”