Marcos 3 - Kuna San Blas

Jesús, dule-argan-burgwaled nudaksad

¹ Ibagwengine, Jesús gannar Judíoʼmar-onmakedneggi dognonibalid. Agine, dule-wargwen argan-burgwar-nikad siid.

² Dulemar Jesús-argabukwa gusmalad, dakega, Jesúsʼde, obunnoged-ibagi dule-nudakodibeye, adi, egi sunmakmalaga, obunnoged-igar-maidgi annadiiye.

³ Geb Jesús dule-argan-burgwaledga sogded: —Dage, be abarse gwisguda.

⁴ Geb Jesús agi dulemar-bukwadga sogded: —¿Wede igar-nuedi obunnoged-ibagi ibmar-nued-imaked, igi, ibmar-isgana-imakeddibe? ¿Igid bur-nabiri, dule-odurguedi, dule-oburgwedi? Dulemar gwen abin-imaksasulid, bela boo ambikusmalad.

⁵ Jesús sae-itogedgi dulemar-dakded, dulemar gwage-dutusur-nikadba, ulubgi nue bukib-itoge dule-argan-burgwaledga sogded: —Be-argan onak. Dule e-argan-onakgwidgu, e-argan yog nuguar naded.

⁶ Fariseoʼmar Judíoʼmar-onmakedneggi-sii nodmalad, geb Herodes-sordamar-ebo igar-aminanai guarmalad, igi-saele Jesús-oburgwemalodibeye.

Dule-bukidar Jesúsʼba nadegusad

⁷ Jesús na e-sapinganmala mata-dummad-gakase nade gusad. Bukidar Galilea-dorgan eba nade gusmogad.

⁸ Dulemar Jesús-ibmar-dummagan-imakdiid-wisguarmargu, bukidar Judeaʼginmalad, Jerusalénʼginmalad, Idumea-dorgan, Jordán-diwar-gakabarmalad, Tiro-yarginmalad, degi, Sidón-neggweburginmalad Jesúsʼse nonimarmogad.

⁹ Geb degine, Jesús e-sapinganga sogded, ega ur guakwaa nasikmaloye, adi, dulemar mer e-barmesnanai gumalagar.

¹⁰ Ar Jesús dule-bukidar nudaksasoggu, bela dule-uellemalad Jesús-ebugega egi megnanaid.

¹¹ Deginbali, burba-isganamar, Jesús-dakalile, e-asabin sindigar yokorgi sigisdamalad, geb binnasur gotedamalad: “¡Be, Bab-Dummad-Machi-sunnadid!”

¹² Jesúsʼdi niaburbamarga sabsur-sogsad, mer dulemarga sogoye, ede doa-dule gue.

3b. Bab-negsemaidgi sunmaklenaid (3:13–6:6) Jesús, dule-e-ambe-gakabo (12) e-sapingan-bur-dummaganga-guega susad

¹³ A-sorbali, Jesús yar-birse naded. Doamar ese dagbi abesa, amarse gochad. Geb amar ese nonimalad.

¹⁴ Agine, Jesús e-ambe-gakabo (12) susad, adi, eba gudii imakmalaga, degi, Bab-Dummad-gayaburba-barsogega barmidegarba. Geb amar-onugsasad, e-nuggi-barmilenanaidye.

¹⁵ Amarga Jesús gangued uksad, adi, dulemargi-niamar-mamaid oniegar.

¹⁶ Jesús e-ambe-gakabo-susad (12), wemardo: Simón, a Pedroʼye onugsasbalid.

¹⁷ Zebedeo-machimala Jacobo, degi, e-urba-Juan. Jesús amar-onugsasad Boanergesʼye. A sogleged: Mar-goled-machimalaye.

¹⁸ Andrés, Felipe, Bartolomé, Mateo, Tomás, degi, Alfeo-machi-Jacobo, aginbali, Tadeo, Simón Cananeo-dule,

¹⁹ degi, Judas-Iscariote, darba-Jesús-uksad-dule.

Jesús, degi, nia-saila-dummad

²⁰ A-sorba, Jesús na e-sapinganmala negse dognonimalad. Gannar dulemar-bukidar ese ambikunonimalad, degisoggu, geg mas-gunne guarmalad.

²¹ E-gwenadgan wisguarmargu, Jesús-sedega armalad, ar ade, sogmalad: “Wis dargwen-itoye.”

²² Garda-Narmaked-Dulemar-Jerusalénʼgi-danimalad, sogdemalad: “Jesúsʼgi nia-saila-Beelzebú naiye. Nia-saila-gangued-nikadba niamar-oniye.”

²³ Geb Jesús, Garda-Narmaked-Dulemarse gochad, geb burbar amarga sunmakded: “¿Igi nia-saila-Satanás na e-sordamar sunna onogo be insae?

²⁴ Ar neggwebur-gwensakgi e-dulemar na egi dukin-dukin aibitemalale, we-neggwebur bergudeled.

²⁵ Ar dulemar-na-negyagi-gudimalad, na egi dukin-dukin aibitemalale, we-negyaur bergudeled.

²⁶ Debayobi, nia-saila-Satanás na dukin e-sordamargi aibitele, e-negdakmaid bergudoed.

²⁷ ”Ar dule-wargwen dule-dutusulid-e-neggi dogbiele, degi, e-ibe-ibmar-atursabiele, gebedgi a-dule-edingwelergebed. Deyobi, geb sunna e-ibe-ibmar atursaoed.

²⁸ ”Napira an bemarga soged, bela isgumalad, degi, galagwensuli Bab-Dummadgi-dodoar-sunmaked, Bab-Dummad dulemarga elioed.

²⁹ Ar doa-dule Bab-Dummad-Burba-Isligwaledgi galagwensuli dodoar-sunmaksardi, Bab-Dummad a-dulega we-isgued eliosulid. Ar a-isgued egi-nai degisadeguoed.”

³⁰ Ar ade, Jesúsʼnik sogmalad: “Jesús niaburba nikaye.”

Jesús-e-nan, degi, Jesús-e-urbamar

³¹ Degidgine, Jesús e-nan, degi, Jesús-urbamar nonimalad. Neg-magaba gwisgunonimalad, geb dule-wargwen Jesúsʼse-gornaega barmismalad.

³² Dulemar-Jesús-dikarba-bukmalad, Jesúsʼga sogdemalad: —Be-nan, degi, be-urbamar magaba be-edarbebukmalad.

³³ Jesús, abin-sogded: —¿Doamar an-nana, degi, an-urbamala?

³⁴ Geb Jesús dulemar-e-dikarba-bukwad-dakdegu, sogded: —Wegi an-nan, degi, an-urbamar bukmala.

³⁵ Ar doa-dule Bab-Dummad-sogedba-ibmar-imaked, a-dule, an-urbad, an-bunad, degi, an-nanad.