Lucas 4 - Kuna San Blas

3c. Jesús nega-dulesulidganba gudigusad (4:1-13) Jesús, nia-sailase wilubdaklesad

¹ Jesús, Bab-Dummad-Burba-Isligwaled nue-nikagudii, Jordán-diwargi banguded. Geb degi, Bab-Dummad-Burba-Isligwaled nega-dulesulidganba Jesús-sesa gusad.

² Agi iba-dulabo (40), nia-saila Jesús-wilubdakdii gualid. A-ibagangine, Jesús mas-gunsuli gudigusad, degisoggu, ukudmaada itoalid.

³ Agi Jesúsʼga nia-saila sokalid: —Ar be Bab-Dummad-Machi-sunnadiile, we-akwaga be soge: ‘Maduga be binyeye.’

⁴ Jesús, abin-imakdegu, nia-sailaga sogded: —Noar be soge, ar Bab-Dummad-gayaburbagi weyob narmakar naid: ‘Dule maduginbi dula-gudii guosulid, [bela Bab-Dummad-gayaburba-itogedgi dula gudigubaloed].’ Deuteronomio 8:3

⁵ Geb degi, nia-saila yar-matusulidse Jesús-sesad. Agi belagwable-napneg-naid-ugakse ega ukiagwar ilagwen-oyoar imaksad.

⁶ Agi nia-saila Jesúsʼga sokalid: —We-neggweburmar-an-bega-oyosadi bela e-ganguedi, degi, e-gandikidba-yeerdaklegedi an bega ukoed. Ar bela we-neggweburmar anga uklesad. Degisoggu, ar doaga an ukbie, an aga ukoed.

⁷ Degisoggu, be an-asabin Bab-Dummadyob an-nug-odummogega yokorgi sindigar sigele, we-neggweburmar bela begadga guoed.

⁸ Jesús, abin-imakdegu, sogded: —Nia-saila be angi bangu. Ar Bab-Dummad-Gardagi weyob narmakar naid: ‘Bab-Dummad-be-Dummad-e-nug be odummodii nanao. Unnila agarbi be ibmar imako.’ Deuteronomio 6:13

⁹ Geb degi, nia-saila Jerusalénʼse Jesús-sesbalid, Bab-Dummadse-goled-neg-uas-birgi ogwisdapid. Geb Jesúsʼga sogded: —Ar be Bab-Dummad-Machi-sunnadiile, napase be ichomakdo.

¹⁰ Ar Bab-Dummad-Gardagi weyob narmakar naid: ‘Na e-baliwiturmar be-edarbega bega barmidagoed, e-argangi be-gamalagar.

¹¹ Adi, melle be akwagi gowarmakegar.’ Salmo 91:12

¹² Jesús, abin-imakdegu, sogded: —Nabir be sogendo, ar Bab-Dummad-Gardagi weyob narmakar sognaibalid: ‘Melle Bab-Dummad-be-Dummad, be wilubdako.’ Deuteronomio 6:16

¹³ Ar nia-saila bela Jesús-wilubdaked bergusgua, sikwas wis egi bangud gusad.

4. JESÚS, GALILEA-YARGI ARBASAD (4:14–9:50) 4a. Jesús ibmar-imaksad (4:14–7:17) Jesús na e-arbadedgi onoded

¹⁴ Jesús gannar Galileaʼse nonigu, nue Bab-Dummad-Burba-Isligwaled-gangued-nikadba nonikid, degi, bela neggweburmar-dikarba-bubukwad Jesús-ibmar-imakdiid wisguarmalad.

¹⁵ Jesús, Judíoʼmar-onmakedneggi dulemar-odurdakdii gualid. Bela Jesús-nug-odummogedbi gusmalad.

Jesús, Nazaretʼgi gudigusad

¹⁶ Jesús Nazaret-neggweburse nonikid, ar ade, agi dungusadid. Obunnoged-ibagi, Jesús na gusgu e-daedba Judíoʼmar-onmakednegse dogdapid. Agi Bab-Dummad-Garda-absogega gwisguded.

¹⁷ Ar ade, Jesúsʼga Bab-Dummad-gayaburba-barsoged-Isaías-narmaksad uksamalad. Jesús a-garda-egasgu, weyob-narmakar-naid absoded:

¹⁸ “Bab-Dummad-e-Burba angi maid. Ar ade, dule-wilemaladga gayaburba-nuegangi-sunmakega, Bab-Dummad an-susad. Bab-Dummad an-barmialid: Dule-gwage-nunmak-itodimaladga gwage-armakegar. Dule-galesbukmaladga binnasur sogegar, bemar ainimarye. Dule-ibyasuli-gudimaladga ibya-egaegar. Dule-mesagwar-gudimalad-ollor-imakegar.

¹⁹ Bab-Dummad-e-birga-nuedgi sunmakega, an-barmialid.” Isaías 61:1-2

²⁰ A-sorba, Jesús Bab-Dummad-Garda-obipirmasgu, Judíoʼmar-onmakednegdaked-dulega garda-uksagu, sigisad. Agi-bukmalad bela Jesúsʼginbi atakbukwa gusmalad.

²¹ Geb degi, Jesús sogded: —Emi-ibagi, bemar-abargi we Bab-Dummad-Gardagi-narmakar-naid sanar-gunonikid.

²² Bela-dulemar-bukmaladi, Jesúsʼgi nuedbi sunmakedbimalad. Geger dakmalad, ibiyobi Jesús yeer sunmake. Degine, sogdemalad: —¿Ar wede, José-machisursi?

²³ Jesús amarga sogded: —An wisi, wegi-sogleged be anga sogdamaloed: ‘Ina-duled, na be dukin san nudake, adi, be anmarga nue-ibmar-wisid oyogegar. Ar Capernaúm-neggweburgi bukidar ibmar-imaksaye anmar be-itosmaladi, wegi be-neggweburgine be imakmoga.’

²⁴ Degi, Jesús sogdebalid: “Napira an bemarga soged, Bab-Dummad-gayaburba-barsoged-wargwensaar na e-neggweburgi geg e-nug odummoleged.

²⁵ Napira an bemarga soged, deunni, Elías-ibagangi, bukidar Israel-yargi, mukwamar-ei-sui-burgwismalad gudigusad. A-ibagangine, deun birgapaa-abala dii gwen wissulid, degidbali, bela napneggine ukud-dummad nagunonigusad.

²⁶ Degite, Elías a-mukwamarse gwen barmilessulid. Bur Sarepta-neggwebur-Sidónʼgi-siidse mukwa-wargwen-ei-sui-burgwisadse barmilesgusad, adi, a-mukwa ega mas-ukegar.

²⁷ ”Deginbali, Bab-Dummad-gayaburba-barsoged-Eliseo-ibagangi, bukidar Israel-yargi, dulemar-naibe-buna-yaa-maleged nikagusmalad, degite, amar gwen nudaklessulid. Bur Siria-dule-Naamánʼye-nugadi nudaklesad.”

²⁸ Ar deyob Jesús-ibmar-soge-itosmargu, onmakedneggi-bukwamalad bela sae-itodmalad.

²⁹ Dulemar gwisgudmargu, Jesús-ise-onoar imaksamalad, geb neggwebur-magaba yar-birse Jesús-sesmalad, ar ade, a-yar-birgi neggwebur siid. Adi, a-neggwebur-gulluba egwanmalagar.

³⁰ Degi-inigwele, Jesúsʼdi emar-abargi ganna-ganna noded, emar-abargi bangudsunnad.

Jesús, dule-niaburba-nikad nudaksad

³¹ Jesús, Galileaʼse Capernaúmʼye-neggwebur-nugadse nonikid. Geb obunnoged-ibagi dulemar-odurdakdii gualid.

³² Dulemar Jesús-ibmar-odurdakedi, geger-itomalad igi-Jesús dulemar-odurdake. Ar ade, Jesúsʼde nue-igar-wisi sunmaked.

³³ Agi onmakedneggi dule-wargwen, niaburba-isgana-nikad-siid binnasur goted,

³⁴ sogded: —Jesús-Nazaretʼgined, mer anmarse be achao, ¿ibiga be anmar-wiodaniki? ¿Be anmar-obelogega daniki? An be-wisi be doa-dule, be-dule-gwage-islidikidid, be Bab-Dummad-nuggi-danikid-duled.

³⁵ Jesús niase binnasur-uluded, ega sabsur weyob ibmar-sogded: —¡Mer be sunmak! Dulegi-maid be noe. Geb degi, nia emar-abargi dule-balimetegu, dulegi-maid nodegusad. Dule gwen akar-gussulid.

³⁶ Deyob ibmar-gusadi bela geger dakdemalad. Na agi sokarmarsunnad: —¿Wede igid-gayaburba-barsunna? Nue-burba-nika, gandikidba, niamarga ibmar soged. Niamar Jesús-ega-sogedba ibmar-imakdedamalad.

³⁷ Degi, bela Galilea-yalaganba Jesús-dulemar-nudakdiid wisgudmalad.

Jesús, Simón-Pedro-e-sakbundor-uellemaid-nudaksad

³⁸ Geb degi, Jesús Judíoʼmar-onmakedneggi-siidgi nodsunnad. Geb Simón-negse nadsunnad. Simón-sakbundor ise-uellegar mai dakdapid. Jesúsʼgi wilenaigusmalad, adi, Simón-sakbundor-nudakegar.

³⁹ Degi, Jesús Simón-sakbundor-walik gwisgunonigu, uellegedga sabsur-ibmar sogded. Agi uelleged yog-akinnar naded. Geb Simón-sakbundor yog gwisguar imaksad, geb a-sorba emarga yog-ibmar-imakar imaksad.

Obunnoged-iba-bergusgu, Jesús dulemar-bukidar-nudaksad

⁴⁰ Dad-argwategu, obunnoged-iba-bergusgu, bela galagwensuli-bonigan-nikamalad Jesúsʼse senonimalad. Jesús bonigan-nikamaladgi e-argan mesisad, geb bela amar-nudaksad.

⁴¹ Deginbali, Jesús bukidar niamar-onisbalid. Niamar ainider, binnasur-gote, sogdedamalad: “¡Bedi Bab-Dummad-Machi!” Ar Jesúsʼdi niamarse uluddaed, osunmakega gwen imakdasulid, ar ade, niamar wismalad, we, Bab-Dummad-dule-wargwen-barmidagoye-sogsad-dule-gue.

Jesús, Galilea-yalaganba Bab-Igargi sunmakdii gusad

⁴² Neg-oibosgu, Jesús neggweburgi bangudsunnad, nega-dulesulidganba nadsunnad. Dulemar Jesús-amidii guarmalad. Dulemar Jesús-amismargu, mer-egi-banguega, egi wilenaigusmalad.

⁴³ Ar Jesúsʼdi amarga sogded: —Ar neggwebur-baiganse Bab-Dummad-negdakmaid-e-gayaburba-nuedgi an sunmaknabalirgebed, ar a-ular, an barmilealid.

⁴⁴ Jesús Galileaʼgi Judíoʼmar-onmakednegmargi Bab-Dummad-Gayaburba-Nuedgi sunmakdii gusad.