Lucas 18 - Kuna San Blas

Igar-naboged-isganagi Jesús sunmaksad

¹ Degi, Jesús na e-sapingan-odurdakega burbar sunmakded, amarga sogded: “Bab-Dummadse-goled nue-abeleged, melle be galakumalo.”

² Jesús burbar sogdesun: “Ibagwengi, neggweburgi dule-igar-naboged maigusad. A-dulede, Bab-Dummad-gwen-dobsulid, degi, dulemargi gwen binsaed-nikaa dasurbalid.

³ ”A-neggweburgi mukwa-wargwen ei-sui-burgwisad gudigusmogad. A-mukwade, dule-igar-nabogedgi gannar-gannar alamaknaidaed, ega sognonidaed: ‘Dule-isdar-an-dakdiid-ebo anga igar-nabiroye.’

⁴ Gebe, dule-igar-naboged yapa mukwaga igar-naboge guargusad. ”A-undaradgine, dule-igar-naboged na ulubgi sokalid: ‘Bab-Dummad an dobsur-inigwele, degine, dulemargi-gwen-binsaed-nikaa an dasurbar-inigwele,

⁵ ar we-mukwa angi alamaknaigusoggu, ega igar an nabogoye. Ar degiile, abakalegi anse-nanagwichidba budar an dakalirye.’ ”

⁶ Geb degi, Dummad-Jesús sogdebar: “Nue be itomalana, dule-igar-naboged-isganadaed-ibmar-sogsadi igi-sogsagusa.

⁷ Ar bemar insagu, Bab-Dummad na e-dulemar-susadi ese mutikidba, degine, ibginedba gordimaladga igar-napiragwad ¿imakosur be insae? Imakoe. ¿Bab-Dummad abgayala abinsaosur be insae? Eye.

⁸ An bega sogmar, Bab-Dummad abga e-sordamarga igar-napiragwad imakoed. ”Ar ani Dule-Machi, we-napnegse gannar danikir, ¿dulemar we-napneggi Bab-Dummadgi-bensurmalad-nika daknoniko be insae?”

Fariseoʼgi, degi, dule-manigaedgi sunmaklesad

⁹ Ar dulemar, na dukin nuedye, baigandi isganaye, sogdimaladga, Jesús we-igar-burbar-maidgi-sunmaklegedgi sogded:

¹⁰ “Ibagwengine, machergan-warbo Bab-Dummadse-goled-negse nadmalad. Gwensak Fariseo, baiddina Roma-dummadga-manigaedgi-arbaed-dule.

¹¹ ”Fariseo gwichi Bab-Dummadse gorgwichid, na dukin weyob soggwichid: ‘Bab-Dummad, dog-nuedye an bega soged, an dulemar-baidyob dasulid, an atursilisulid, igar-innikigwadbi aimarga an imaked, ome-dikarba an yoledisulid, degine, we-dule-Roma-dummadga-manigaedgi-arbaeddaedyob an dasulid.

¹² Bab-Dummadse-golega itoged-irgwengi, ilabo an mas-gunsuli gudidaed, bela an mani-onoged-irba ambegi-gwensak (10%) an ukdaed.’

¹³ ”Ar dule-Roma-dummadga-manigaedgi-arbaeddi Bab-Dummadse gorgwisgu, bannabaa gwichi, nonose-bakar, gwen onakbisur gwichid, na e-binasgar sarsogwichid, na soggwichid: ‘Bab-Dummad wile be an-dake, an dule-isgudiid-duled.’

¹⁴ ”Ani Jesús, an bega sogmar, ar we-dule Fariseoʼba bur gwage nugus-naddo. ”Ar ade, dule-wargwen na nug dummarbaa saele, a-dule, bur nug bipii guoed. Ar dule na nug bipii saerdi, adi, a-dule, bur nug odummolegoed.”

Jesús mimmigangi nued binsasad

¹⁵ Degine, Jesúsʼse mimmigan-sedanigusmalad, Jesús ega ebugegar. Adi, Bab-Dummad nued mimmigangi binsaegar. Jesús-sapingan deyob dakarmargu, dulemar-mimmigan-senonimaladse uluarmalad.

¹⁶ Ar Jesús e-sapinganse-gochagu, ega sogded: —Mer ese urwemar. Akarsuli, itoba mimmigan anse dagoed, mer be igar-gamar. Ar Bab-Dummad-e-negdakmaid we-mimmiganyob-damaladgadid.

¹⁷ Napira an bemarga sogmalad, ar dule-wargwen Bab-Dummad-e-negdakmaid mimmiganyob abingasulile, geg Bab-Dummad-e-negdakmaidse doged.

Dule-mani-ibed Jesúsʼse nonikid

¹⁸ Dule-wargwen nue-nug-nikagwad Jesúsʼse nonikid, ese egisnonikid: —Odurdaked-saila-nued, burba-geg-bergued an abingaega, ¿ibi an imakergebe?

¹⁹ Jesús, abin-sogded: —¿Ibiga dule-nuedye be anga soge? Dule-nued sulid, unnila Bab-Dummadbi wargwennaa dule-nued gued.

²⁰ Bab-Dummad-Igar-Mesisad be wisid: ‘Melle be be-abirginsulid-ebo galagwensuli nanao. Melle be dule-oburgo. Melle be ibmar-atursao. Melle be gakansaar aimargi sunmako. Be-bab-nug-odummodii, degi, be-nan-nug-odummodii be nanamalo.’ Éxodo 20:12-16; Deuteronomio 5:16-20

²¹ Dule, abin-sogded: —Gusgu an sapingwagwad-akar bela we-Igarmar-Mamaidba an nanadiid.

²² Jesús, weyob dule-ega-soge itosgu, ega sogded: —Ibmar-gwensak amba be napi. Bela ibmar-be-nikadi manigi be uknae, geb agi, mani wileganaga be mimioed. Geb degiir nibneggi ibmar-nued be nikuoed. Geb a-sorba, an-sapinga-guega anba be dagoed.

²³ Dule, weyob Jesús-ega-soge itosgu, nue-bukib binsaded. Ar ade, dulede nue-mani-ibedid.

²⁴ Jesús, dule-nue-bukib-binsa-ito daksagu, sogded: —Ibiyobi dule-mani-ibganga Bab-Dummad-e-negdakmaidse-doged-igar dutusuli. Ar ade, dogdar maniginbi binsamalad.

²⁵ Ar ade, bur moli-yargan-mureged iko-ibyagi bursursunna dogsaled. Ar dule-mani-ibeddi bur-beedse Bab-Dummad-e-negdakmaidse doged.

²⁶ Ar dulemar weyob Jesús-ibmar-soge-itosmalad, sogdemalad: —Ar degite, ¿doa nabir abonolegosunna?

²⁷ Jesús, dulemar-abin sogded: —Ar dulemargardi, ibmar-geg-guedi, Bab-Dummadgardi, bela ibmar guedbiid.

²⁸ Geb degi, Pedro, Jesúsʼga sogded: —¿Anmardina? Emide, wegi anmar ibmar-nikamalad bela an na obesmalad, adi, anmar beba naegar.

²⁹ Geb degi, Jesús, abin-sogded: —Napira an bemarga soged, ar dule Bab-Dummad-e-negdakmaid-ular, na e-ome-obesale, e-mimmigan-obesale, e-babgan-obesale, degine, e-neg obes-nadele,

³⁰ bur bule, we-napneggi ibmar-obesadba ibmar abingaoed. Degine, yoedse amba deyob burba-geg-bergued nikubaloed.

Jesús, ilapaagus gannar e-burgoedgi sunmaksad

³¹ Jesús na e-sapingan-warambe-gakabogwad (12) bachikii sesgua, ega sogded: “Anmar Jerusalénʼse nadapid. Bab-Dummad-gayaburba-barsogmalad bela angi Dule-Machigi narmaksadba igargan anga guedsegad.

³² ”Ani Dule-Machi, Bab-Dummad-wissurmaladse uklegoed, amar angi dodomaloed, isdar angi sunmakmaloed, degi, angi wii-agmarbaloed.

³³ Geb sabsur an-bibyosmalad-sorba, an-oburgwemaloed. Geb ibapaagwadgi gannar an durguoed.”

³⁴ Ar Jesús-e-sapingan-ambe-gakabogwad (12) Jesús-ega-ibmar-sogedi magasaila-itossurmalad. Aku-itosmalad, ibiga ega deyob soge.

Jesús, Jericóʼgi dule-aku-ataked-nudaksad

³⁵ Ibagwengine, Jesús Jericó-neggwebur-modanigua, deunni dule-ibyasulidi, igar-naba sii, mani egichii gusad.

³⁶ Dule-aku-ataked dulemar-bukidar duurmaknadap itoargu, amarse egichided: —¿Igi neg-gunai?

³⁷ Ega sogdemalad: —Jesús-Nazaretʼgined nadapye.

³⁸ Geb degi, dule-aku-ataked binnasur goted, sogded: —Jesús, Rey-David-wagwa, ¡wile be an-dake!

³⁹ Dulemar-Jesús-iduar-nadapmalad dule-aku-atakedse uludmalad, adi, mer binnasur golegar. Ar dule-aku-ataked aka bur bule binnasur gorsigisad: —Rey-David-wagwa, ¡wile be an-dake!

⁴⁰ Geb degi, Jesús gwisgusgua, dule-aku-ataked ese sedagega imaksad. Dule-aku-ataked ese nonigu, Jesús ese egichialid,

⁴¹ ega sogded: —¿Ibu bega imakbi be an-abege? Dule-aku-ataked, Jesús-abin-sogded: —Dummad, magar-atak be an-imake.

⁴² Jesús ega sogded: —Magar-atak be gusun. Be an-bengussursoggu, be nugusun.

⁴³ Geb degi, dule magar-atake gussunnad. Dule-nugusad Jesúsʼba nadapgu, Bab-Dummad-nug-ogannonadap gusad. Bela-dulemar dule-nugusad-daksamargu, Bab-Dummad-nug ogannodmarsunnad.