Levítico 18 - Kuna San Blas

Bab-Dummad-igargi nanamaloed

¹ Bab-Jehová Moisésʼga igar uksad:

² “Weyob be Israel-dulemarga sogo: ‘Ani an be-Bab-Dummad-Jehová gued.

³ ” ’Bemar Egipto-dulemar-damaladyob, melle be damalo. A-yargi bemar bukwagusmalad. ” ’Bemar Canaán-dulemar-damaladyob, melle be damalo. A-yarse an bemar-sedsokalid. Deginbali, e-damaladba, melle be nanamarbalo.

⁴ An-bemarga-igar-uksadba be ibmar imakmalo, degi, an-Igar-Mamaidba be nanamalo. Ani an be-Bab-Dummad-Jehová gued.

⁵ Degisoggu, an-Igarmar-Mamaidba, an-bemarga-igar-uksamaladba be nanamalo. Ar doa-dule we-igar-mamaidba ibmar-imakele, dula-gudii guoed. Ani an Bab-Jehová gued.’ ”

Dule e-gwenadbo negsichigi-nanaosulid-igar

⁶ Bab-Jehová Moisésʼga sogdebalid: “Dule-wargwensaale e-gwenadbo negsichigi galagwensuli nanadii guosulid. Ani an Bab-Jehová gued.

⁷ Melle be-nanbo negsichigi galagwensuli be nanadii guo. Ar degiile, be-babgi be dododii itole. Melle be deyob nanao, ar be-nan gued.

⁸ Melle be-bab-omebo negsichigi galagwensuli be nanadii guo. Ar degiile, be-babgi be dododii itole.

⁹ Melle be-bun-gargwenadbo negsichigi galagwensuli be nanao. Deginbali, melle be-bun-be-babsikidbo, be-bun-be-nansikidbo, negsichigi galagwensuli be nanadii guo. Ar amba we-be-bunmar be-negyagi gwalulesdibe, igi, be-negyagi gwalulessurdibe, mer deyob ebo be nanao.

¹⁰ Melle be-waganbo negsichigi galagwensuli be nanadii guo. Ar degiile, na be dukin be-nug oichogoed.

¹¹ Melle be-bab-ome-e-sisgwabo negsichigi galagwensuli be nanadii guo. Ar be-bab-sisgwayob gued. Degisoggu, be-bungi be dododiiyob gued.

¹² Melle be-ammorbo negsichigi galagwensuli be nanadii guo, ar ade, be-bab-e-bun gued.

¹³ Melle be-nan-e-iorbodibe, be-nan-e-urbabodibe negsichigi galagwensuli be nanadii guo, ar ade, be-nan-e-gwenadgan gued.

¹⁴ Melle be-gilor-e-omebo negsichigi galagwensuli be nanadii guo. Ar be-gilor-ome be-ammorga gunonikid.

¹⁵ Melle be-balabo negsichigi galagwensuli be nanadii guo. Ar ade, be-machi-ome gued.

¹⁶ Melle be-ia-omebodibe, be-urba-omebodibe, negsichigi galagwensuli be nanadii guo. Ar degiile, be-ia-e-nug, be-urba-e-nug be oichogoed.

¹⁷ Melle ome-wargwenbo, degi, e-sisgwabo, deginbali, e-waganbo negsichigi galagwensuli be nanadii guo. Ar ade, wemar na gwenadgan gumalad. Ar deyob be gudiile, nue-dummad be isgudiid.

¹⁸ Ar amba be-ome-dula-gudiidgine, be-ambe be nikuosulid, deginbali, ebo be negsichigi galagwensuli nanadii guosurbalid. Ar degiile, omegan na ebo e-isdarmaladga gunonimaloed.”

Galagwensuli-nanaleged-igar-baigan-imaklegosulid

¹⁹ Bab-Jehová Moisésʼga sogdebalid: “Ome igar-dakdidibe, melle ese be golo. Ar ade, ome swilidiksuli gudiid.

²⁰ Deginbali, melle dule-baid-e-omebo negsichigi galagwensuli be nanadii guo. Ar degiile, be swilidiksuli guoed.

²¹ Melle bab-dummad-Molocʼga be-mimmigan be ogumakar uko. Ar deyob be imakele, be-Bab-Dummad-nug be oichogoed. Ani an Bab-Jehová gued.

²² Omebo-megeyob mer be macherganbo mego. Ar wede ibmar-isgana gued.

²³ Bipisaale ibdurganbo galagwensuli be guosulid. Ar wede, ibmar-isgana gued. Ome-wargwensaale ibdurganbo galagwensuli guosulid. Ar wede, ibmar-isgana gued.”

Dule-bamalad-ibmar-isgana-imakmalad imaklegosulid

²⁴ “We-ibmar-imakedba mer be swilidiksuli gumalo. Ar an bemar-idu-dulemar-onosokalid, we-ibmar-imakedba swilidiksuli gunonimalad.

²⁵ Deginbali, e-napase-bakale, nue-isgus nagunonimogad. E-ibmar-isgana-imaksad-ulale, an we-dulemar sabsur-odurdaksad, geb e-dulemar e-yar-isgusadgi ononnolesmalad.

²⁶ Degisoggu, an bemarga an-igargan-uksadba, degi, an bemarga an-igargan-sogsadba be ibsamala. Israel-dulemar, degi, Israel-dulesulid-bemar-abargi-mamaid, we-ibmar-isganamar mer be imakmala.

²⁷ Ar we-yargi bemar-idu dulemar-ambikusmalad we-ibmar-isganamar imaksamalad. Degisoggu, e-yar nue-isgus nagussunnad.

²⁸ Ar bemar we-yar oichosmalale, igi bemar-idu we-yargi dulemar-bukwagusad onilesgusa, deyobi, bemar we-yargi ononnolemogoed.

²⁹ ”Ar doa-dule we-ibmar-isgana imakele, we-dule e-dulemar-abargi onolegoed.

³⁰ Degisoggu, an-igar-mamaidba be nanamala. Dulemar we-yargi bemar-idu we-ibmar-isgana-imaksamaladba, mer be nanamala. Mer be we-ibmar-imakedba isgumala. Ani an be-Bab-Dummad-Jehová gued.”