Levítico 11 - Kuna San Blas

3. IGAR-SWILIDIKID, DEGI, IGAR-SWILIDIKSULID (11:1–15:33) Ibdurgan-swilidikmalad, degi, ibdurgan-swilidiksurmalad

¹ Bab-Jehová, Moisésʼga, degi, Aarónʼga sogded:

² “Israel-dulemarga be sogmar: ‘Bela we-napneggi ibdurgan-bukwamalad-abargi, wemar be gunmaloed:

³ Ibdurgan-e-goonasi-darbo-mamararmalad, gagan-masar, gannar-mabaliga sabanyagi mas saboged, Wegiid-ibdurganmar be nabir gunnoed.

⁴ ” ’Degi-inigwele, ibdurgan-gagan-masar, gannar-mabaliga sabanyagi mas saboged, amar-abargi goonasi-darbo-mararsurmalad gudidimogad. Amardi be gunnosulid. A-ibdurganmala, wemalad: Moli-yargan-mureged, we-moli gagan-masar, gannar-mabaliga sabanyagi mas saboged, ar e-gonasidi, mararsulid. We-ibdurgan bemarga ibmar-swilidiksulidga guoed.

⁵ Deginbali, nubi, gannar-mabaliga sabanyagi mas saboged, ar e-gonasidi, mararsulid. We-ibdurgan bemarga ibmar-swilidiksulidga guoed.

⁶ Amba deyobi, ugdun, gannar-mabaliga sabanyagi mas saboged, ar e-gonasidi, mararsulid. We-ibdurgan bemarga ibmar-swilidiksulidga guoed.

⁷ Deginbali, sina, goonasi-darbo-marar-nika-inigwele, gannar-mabaliga sabanyagi mas sabosulid. We-ibdurgan bemarga ibmar-swilidiksulidga guoed.

⁸ ” ’We-sanmar be gunnosurmalad, deginbali, a-ibmar-burgwarmalad be ebugosurmarbalid. Bemar we-ibmarmar swilidiksuli dakoed.

⁹ Ibdurgan-dii-yagi-gudidimalad-see-nikamalad, degi, uka-nikamalad, demargineddibe, diwargineddibe, be sunna gunmaloed.

¹⁰ Ar ibmar-dummagan, degi, ibmar-senigan-see-nikasurmalad, degi, uka-nikasurmalad, demargineddibe, diwargineddibe, bemar we-ibdurgan swilidiksuli dakoed.

¹¹ ” ’E-san bemar gunnosulid, deginbali, we-ibmar-burgwarmalad bemar ima-dakbaloed, ar ade, bemarga ibmar-swilidiksulidga guoed.

¹² Bela ibmarmar-diigi-gudidimalad-see-nikasurmalad, degi, uka-nikasurmalad, bemarga ibmar-swilidiksulidga guoed.

¹³ ” ’Bemar we-nuumar ima-dakoed, be gunnosurmalad, ar ade, we-nuumar bemarga swilidiksuli gued: Sulubagi, sulubagi-garmar-bisge-bisge-imaked, uabu,

¹⁴ mula, degi, bela sulubagi-senigan akar-akar-daklemalad,

¹⁵ bela abgokor akar-akar-daklemalad,

¹⁶ nuu-dummad-dukar-suid avestruzʼye-nugad, irmon-senigan, bela dilli-dilli akar-akar-daklemalad,

¹⁷ irmon, diidod, badu-cisneʼye-nugad,

¹⁸ noo-mutikid, gorgi, mula-dummad,

¹⁹ dabgala, bela dabgala-dummagan-akar-akar-daklemalad, sikwi-nugar-suid-abubillaʼye-nugad, degine, uksir.

²⁰ ” ’Bela ibsenigan-gukumalad mali-walabakegwadgi-nanamalad, bemarga ibmar-swilidiksulidga guoed.

²¹ Degi-inigwele, ibsenigan-gukumalad mali-walabakegwadgi-nanamalad, ukinbali, ichomakega e-nag-sorbalid-bur-suigan nikamalad, be sunna gunmaloed.

²² Bemar we-ibmarmar sunna gunmaloed: Bela ses-dummagan-akar-akar-daklemalad, sesmar, degi, ses-senigan.

²³ Ar bela ibsenigan-gukumalad-bamalad mali-walabakegwadgi-nanamalad, bemarga ibmar-swilidiksulidga guoed.’ ”

Ibmar-swilidiksurmalad-ebusad-igar

²⁴ Bab-Jehová, Moisésʼga, degi Aarónʼga sogdebalid: “We-ibmarmar-ulale, bemar swilidiksuli gunonikoed. Ar doa-dule we-ibdurgan-burgwarmalad ebusdibe, neg-mutikidse swilidiksuli gudii guoed.

²⁵ Ar doa-dule we-ibdurgan-burgwaled ebusale, na e-mor enukoed. We-dule mutikidse swilidiksuli gudii guoed.

²⁶ Bela ibdurgan goonasi-mamararsulid, degi, mas gannar-mabaliga sabanyagi mas-sabosulidi, bemar swilidiksuli dako. Bemar we-ibdurgan-ebusale, swilidiksuli be guoed.

²⁷ Bela ibdurgan-mali-walabake-nikamalad e-goo-nasigi-nanasurmalad, bemarga ibmar-swilidiksulidga guoed. Doa-dule we-ibmar-burgwaled ebusale, neg-mutikidse swilidiksuli gudii guoed.

²⁸ Dule we-ibmarmar-burgwaled ebusale, e-mor enukoed. We-dule mutikidse swilidiksuli gudii guoed. We-ibmarmar ibmar-swilidiksuli be dakoed.

²⁹ Napagi ibmar-durgan-garmakdii-abargi, bemar we-ibdurgan swilidiksuli dakoed: Diachugiid-comadrejaʼye-nugad, nusa, ammanoomar-akar-akar-daklemalad,

³⁰ akwa-nuku, daim, isgin, asbanmar, degi, gwanurgiid-camaleónʼye-nugad.

³¹ Napagi ibdurgan-garmakdii-abargi, we-ibdurgan bemar swilidiksuli dakoed. Ar doa-dule we-ibmar-burgwaled-ebusale, neg-mutikidse swilidiksuli gudii guoed.”

Ibdurgan-swilidiksurmalad-ebusad-igar-bamalad

³² Bab-Jehová, Moisésʼga, degi, Aarónʼga sogdebalid: “We-ibdurganmar-burgwaled we-ibmarmargi argwachale: Ibmar-urgogi-sobaledgi, ibmar-ibdurgan-ukagi-sobaledgi, morgi, sagugi, degi, ibmar-arbaedgi-ebulegedgi, argwachale, we-ibmarmar mutikidse swilidiksuli guoed. Ar gannar we-ibmarmar swilidik-guega, diigi enuklegergebed. Geb deyobi gannar swilidik gunonikoed.

³³ ”Napsa-bormo-yagi we-ibmarmar-burgwaled argwachale, we-napsa-bormo-yagi bela ibmar-bukwadi ibmar-swilidiksulidga gunonikoed. Degisoggu, we-napsa-bormo mamarilegoed.

³⁴ We-napsa-bormogi-dii-siid ibmar-gullegedgi dedemaksale, we-ibmar-gulleged swilidikidsulidga gunonikoed. Deyobbalid, we-napsa-bormogi-dii-siid gobedgi dedemaksale, we-gobed swilidiksuli gunonikoed.

³⁵ ”We-ibmar-burgwaled ibmar-bamaladgi argwachale, we-ibmarmar bela ibmar-swilidiksulidga gunonikoed. Madu-yoedgi argwachadibe, soogi argwachadibe, we-ibmarmar swilidiksulidga gunonikoed. Degisoggu, we-madu-yoed mamarilegoed, degi, we-soo obelolegoed. We-ibmarmar swilidiksuli gunonikid. Degisoggu, bemar deyobi, we-ibmar dakoed.

³⁶ ”Degi-inigwele, unnila dian, degi, dii-sailagi bia dii-sulege, amarbi amba ibmar-swilidikidga guoed, gwen isguosulid. Ar dule we-ibmar-burgwaled-ebusaddi, swilidiksuli gunonikoed.

³⁷ ”Ar we-ibmar-burgwaled ibmar-gwag-diglesokalidgi argwachale, we-ibmar-gwag amba swilidik guoed.

³⁸ Ar ibmar-gwaggi dii eolesardi, geb agi, we-ibmar-burgwaled egi argwachale, adi, we-ibmar-gwag swilidiksuli gunonikoed.

³⁹ ”Ibdurgan-nabir-gulleged burgwisale, ar doa-dule we-ibmar-burgwaled-ebusale, neg-mutikidse swilidiksuli gudii guoed.

⁴⁰ Dule we-ibmar-burgwisad-e-san guchale, na e-mor enukoed. We-dule mutikidse swilidiksuli gudii guoed. Doa-dule we-ibmar-burgwisad magaba-onosale, na e-mor enukoed. We-dule mutikidse swilidiksuli gudii guoed.”

Napagi-ibdurgan-garmakdimalad ise-gullemalad

⁴¹ Bab-Jehová, Moisésʼga, degi Aarónʼga sogdebalid: “Bemar napagi-ibdurgan-garmakmalad gunnosulid, ar ade, ibmar-swilidiksurmaladid.

⁴² ”Ibdurgan-unimakar-nanamalad, e-mali-walabakegwadgi-nanamalad, degi, e-malimar-ichesulidgi-nanamalad, bemar gunnosurmalad, ar ade, swilidiksurmaladid.

⁴³ Ibdurgan-unimakar-nanamalad-gunnedba mer be swilidiksuli gumalo, mer be isgumalo, ar we-ibdurganmar swilidiksuli gumalad.

⁴⁴ ”Ani, an-bemar-Bab-Dummad-Jehová gued. Ar an dule-isligwaledsoggu, bemar gwage-swilidik imakmalo, deyobi, bemar gwage-swilidik gudimalo. Ibdurgan-unimakar-nanamalad-gunnedba, degi, ebugedba, mer be swilidiksuli gumalo.

⁴⁵ Ani an Bab-Jehová gued. Ani an Egipto-yargi bemar-onosad, adi, an be-Bab-Dummadga guegar. Degisoggu, bemar gwage-swilidik imakmala, ar an dule-islidikidid.

⁴⁶ ”Ibdurgansik, nuumarsik, bela ibdurgan-dii-yagi-gudidimaladsik, degi, bela ibdurgan-napagi-garmakdidimaladsik, weyob igarmar megisad.

⁴⁷ Adi, bemar magar-dakega, igid ibmar-isgana-gue, igid ibmar-nuegan-gue. Deginbali, igid-ibdurgan nabir gullege, igid-ibdurgan ise gullebali.”