Lamentaciones 3 - Kuna San Blas

3. BAB-DUMMAD-DULE-WILEDAKEDBA YOEDSE-BENDAKLEGOED EDARBILEGED (3:1-66) Ollorgued-igar Bab-Dummadgi edarbileged

¹ An-sunnagwad, Bab-Jehová-uludedbali sabsur-dule-odurdaked an itosad.

² Negsichiganaba an-nimai gusad, neg-meegwadba an-nimai gussulid.

³ Bali-bali, wachi-iliba, sabsur-an-odurdaknai gusad.

⁴ Bab-Jehová, an-san, degi, an-uka-dunnumakega imaksad, an-ibe an-garmar bibichisad.

⁵ Bab-Jehová angi bonigan ebiris nasiksad, angi wileged-dummad ebiris nasiksad.

⁶ Dulemar-undargus-burgwismaladyob, negsichigangi-gudiguega an-imaked.

⁷ Bab-Jehová negyaba-mellesii an-imaksad, gege an wakinned, esgoro-dub-dummagangi an-edichad.

⁸ An-bendakegala, an binnasuli gornai-inigwele, Bab-Jehová an-ese-gornaid budar an-itoged.

⁹ An-iduar, an-igargi akwamar misad, an-ibe an-igar oburusad.

¹⁰ Bab-Jehová, wiob mas-gaega matarmakdiidyobi anbina gudiid, achumigur-nono-wawaad masbina matarmakdiidyobi anbina gudiid.

¹¹ An-san-oichimakega igargi an-obachad, mer bendakleged-amiega, walagwen an-obesad.

¹² Guagwar warsi-gasad, e-sigumar an-makega imaksad.

¹³ E-saboged-yaba sigumar-onosadgi gwagegi an-maksad.

¹⁴ Bela an-dulemarga an dodoedga gunonikid, bane-bane angi-dodolegar namakmalad.

¹⁵ Bab-Jehová nunmaked-dummad anga uksad, ina-gagbidgi an-ogobsad.

¹⁶ Bab-Jehová napagi an-omukusad, olli-maega an-imaksad.

¹⁷ Gwage-bogidikid an-ibe obelosad, weligwar-itoleged bar an ebinsasulid.

¹⁸ A-ulale, an soged: “An-gargangued bergusad, Bab-Dummadgi an ibmar-edarbediid bar an dakosulid.”

¹⁹ An-wile-itodiid, an-neg-sate-gaamakdiid, be ebinsao. Ar we-ibmarmar, naibid-dummad anga uked.

²⁰ Bane-bane an we-ibmargi binsadiid, a-ulale, bar an ibmar imakbisuli itoged.

²¹ Degi-inigwele, an ibmar-soggwendi ebinsaed, we, mer suli-suli-itogega an-imaked.

²² Bab-Jehová-sabgued-dummad-nikad-ular, anmar bergussulid, e-wile-emar-daked gege bergued.

²³ Bab-Jehová-e-wile-emar-daked bane-bane binoleged. Bab-Jehová-sogedba-ibmar-imaked dummarba gued.

²⁴ Degisoggu, an soged: “Bab-Jehováʼbi anga unni gued, agala, an egi bensulid.”

²⁵ Bab-Jehová, dule-egi-bensur-gudimaladgi nued daed, bela dule-e-amidimaladgi nued daed.

²⁶ Bur-nuedid, anmar doga-doga-itosulidgi, Bab-Jehová-anmar-bendakdagoed edarbed.

²⁷ Bur-nuedid, dule sapingwagwad-akale, bonigan-abalagi ganna-gudigued durdaked.

²⁸ Melle ese be gole, itoba bogidik sigoed, ar Bab-Jehová deyob ega igar mesisad.

²⁹ Nue-bingegusa, wagar napase dulluu imakoed, abakale, amba Bab-Dummad e-bendakalile.

³⁰ Dule-e-ibe-wagar-bibyonaidga, baid-wagar oyobalo, deyobi, nue bingeguoed.

³¹ Bab-Jehová anmar-obachad, degi-inigwele, deyob-anmar-imakmai sadeguosulid.

³² Nunmak-itoge anmar-imaked, degi-inigwele, anmar-wile dakbalid, ar e-sabgued dummarba gued.

³³ Bab-Jehová anmar-naibi imaked, anmar-wile-ito imaked, ar deyob-anmar-imakedgi wergudeeye soglesulid.

³⁴ Bab-Jehová weyob-ibmar-imaklemalad abemaisulid: We-napneggi bela-dulemar-esgaryagi-mellebukwad sabsur-imakleged, abemaisulid.

³⁵ Bab-Dummad-Bur-Birigined-asabin dulega-igar-nabolesulid, abemaisulid.

³⁶ Bab-Dummad-Bur-Birigined-asabin dulega-innikigwadba-igar-itolesulid, abemaisulid.

³⁷ ¿Doa Bab-Dummad-ega-igar-uksuli ibmar-soged nabir imakoe?

³⁸ ¿Ar Bab-Dummad-Bur-Birigined-igar-ukedbali ibmar-nuegan, degi, ibmar-isgana gusursi?

³⁹ ¿Ar ibiga dule na e-isgusadba sabsur-odurdaklealir urwedii guoe?

⁴⁰ Anmar na anmar-daedgi nue-binsasii imakmala, anmar Bab-Jehová-amimala, gannar ese dagmala.

⁴¹ Anmar, Bab-Dummad-nibneggi-maidse-golega argan onakwe. Anmar, Bab-Dummad-nibneggi-maidga anmar-binsaed soge.

⁴² Anmar isgusad, anmar uayasuli nanadii gusad, Bab-Jehová, be anmarga anmar-isgued elissulid.

⁴³ Bab-Jehová, be nue-urwedbali be anmar-baleginned, wile-be-anmar-daksuli, be anmar-obeloged.

⁴⁴ Anmar-bese-goled mer be itogegala, be mogir-imbaba dukusad.

⁴⁵ Dulemar-yar-baid-baid-bukwamalad-abargine, ibmar-isganayob be anmar-barmeted.

⁴⁶ Bela-anmar-isdarmalad sunmakdemalale, anmargi ichakwaa sunmakdedamalad.

⁴⁷ Anmar, dobgued-dummad itosmalad. Anmar, omukulesmalad. Anmar, ibmar-sate gusmalad. Anmar, nunmaked-dummad itosad.

⁴⁸ An-neggwebur-e-saila-gusiid-nue-ibitosadbali, an-wagarba diwar-aryomaiyob ibyanis aryomaid.

⁴⁹ An-ibyanis gwen bogigusuli aryomaid, dule-an-gwage-baisur-ito-imaked sated.

⁵⁰ Bab-Jehová nibneggi-maid-akale, geb anmar-dakedse an gadi-gadi itononikoed.

⁵¹ An-neggweburgi-omegan-gudidiid sabsur-odurdaklenaid-ulale, bela-bela an-gwage an nunmak itoged.

⁵² An ibmar-akar-imaksasuli an-isdarmalad binsa an-baleginnanaid, nuuyobi an-gasmalad.

⁵³ Dula napa-urba an-odosmalad, an-iduar noed akwa-dummadgi edismalad.

⁵⁴ Bela diiba an-nono-dogdegua, an na belaye sogded.

⁵⁵ Bab-Jehová, an dia-dummadgi gulluyaa mellesigua, an bese gochagusad.

⁵⁶ An-bese-wilesagwa-gornaid be itosad, an-ise-gollar-gornaid be itononikid.

⁵⁷ An bese gochad, be anse nonikid, be anga sognonikid: “Mer be dobguye.”

⁵⁸ Bab-Jehová, bee be anbali nagusad, be an-bendaksad.

⁵⁹ Bab-Jehová, nue-an-wiosmalad be daksad, be anga innikigwadba igar nudake.

⁶⁰ Buged-mai angi-imakbimalad be daksad, an-oakalobimalad be daksad.

⁶¹ Bab-Jehová, dule-angi-urwe-nanaid be itosad, an-oakalobimalad be daksad.

⁶² Bab-Jehová, an-isdarmalad angi-sunmaknanai-osedoddaed be wisid, angi-gwisgumalaga igar-aminanaid be wisid.

⁶³ Bab-Jehová, be dake, na ibu imaknanadibe, angi dodonanadamalad, e-namakedgi angi-dodoar namakmalad.

⁶⁴ Bab-Jehová, wemar na bela e-ibmar-isgana-imaksad-ulale, be sabsur-odurdake.

⁶⁵ Ibmar-aku-itogega be imake, be ukabsasunna.

⁶⁶ Bab-Jehová, be-sae-itogedbali be wemar baleginne, we-napneggi be bela obeloge.