Jueces 1 - Kuna San Blas

1. DUMMAGAN-IGAR-NABOMALAD-IBAGAN (1:1–3:6) 1a. Israel-dulemar Canaán-yargi ambikunonimalad (1:1–2:5) Judá-wagan, Simeón-wagan-ebogwa Adoni-Bezec-gasmalad

¹ Josué-burgwisad-sorba, Israel-dulemar Bab-Jehováʼga sogdemalad: —Canaán-dulemarbo bila-ononaega, ¿doa inse naoe?

² Bab-Jehová abin-sogded: —Judá-wagan-inse naoe, ar ade bato a-yala amarga, an uksad.

³ Judá-wagan, e-gwenad-Simeón-waganga sogded: “Anmarga-yar-uklenaidse be anmarba namala, Canaán-dulemarbo anmar bila-onomaloed. Geb a-sorba anmar bemarba namarmogoed, Canaán-dulemarbo bila-onogegar.” Degi, Simeón-wagan Judá-waganba nadmarsunnad.

⁴ Judá-wagan bila-ononadmargu, Bab-Jehová Canaán-dulemargi, degi, Ferezeo-dulemargi Judá-wagan nakwega imaksad. Deun, Bezecʼye-neg-nugadgi miliambe (10,000) sordamar-ogilosmalad.

⁵ Agine, Judá-wagan, Adoni-Bezec-abingunonimargu, ebo-bila-onodmalad. Geb Canaán-dulemar, degi, Ferezeo-dulemar Judá-wagan-idu duurmakdemalad.

⁶ Adoni-Bezec wakite gusad. Geb Judá-wagan balegitemargu, bargadapmalad. Gasmargu, e-goo-dummagan, degi, e-nag-goo-dummagan e-ibe siksamalad.

⁷ Geb degi, Adoni-Bezec weyob sogded: “An reymar-dulapaa-gakambed (70) e-goo-dummagan, degi, e-nag-goo-dummagan an ei siksagusad. Degine, an-mese-urba mas-milemalad gundii damalad. Degisoggu, a-ulale, Bab-Dummad deyob an-imaksamogad.” Geb a-sorbali, Jerusalén-neggweburse Adoni-Bezec-sesmalad. Agine Adoni-Bezec burgwedapid.

Judá-wagan Jerusalén-neggwebur, degi, Hebrón-neggwebur-susad

⁸ Judá-wagan, Jerusalén-neggweburgi gwichigudapmalad, geb Jerusalén-neggwebur susmalad. Es-suidgi Jerusalén-dulemar ogilolesad. Geb a-sorbali, Jerusalén-neggwebur-ogumaksamalad.

⁹ Geb degi, Judá-wagan, Canaán-dulemar-yalaganba-bukwamaladgi bila-ononadmarbalid. Degi, Canaán-dulemar-Neguevʼgi-bukwamaladgi, degine, Canaán-dulemar dad-argwanedsik-nebaganba-bukwamaladgi bila-ononadmarbalid.

¹⁰ Deginbali, Judá-wagan, Canaán-dulemar-Hebrónʼgi-bukmaladgi duurmakdemarbalid, ebo-bila-onomalagar. Hebrón-neggweburde, Quiriat-Arbaʼye iduar nuganad. Agi, Judá-wagan, Anac-wagangi nakwismalad: Sesaiʼgi, Ahimánʼgi, degi, Talmaiʼgi.

Otoniel, Debir-neggweburgi-nakwisad, degi, Acsa-nikusad

¹¹ Judá-wagan, Hebrón-akale, Debir-dulemargi duurmakdemarbalid, egi bila-onomalagar. Debir-neggweburde, Quiriat-Seferʼye iduar nuganad.

¹² Degine, Caleb sogded: “Ar doa-dule Quiriat-Sefer-neggwebur-ogalakusale, degi, a-neggwebur-susale, egi nakwisale, a-dulega an-sisgwa-Acsa an ukoed, na nikuegar.”

¹³ Geb Otoniel, Quiriat-Sefer-neggwebur susad. Degisoggu, Caleb, Otonielʼga na e-sisgwa-Acsa-uksasunnad, na nikuegar. Otonielʼde Cenaz-e-machid. Cenazʼdi Caleb-e-urbad.

¹⁴ Acsa Otonielʼba nasokargu, Otoniel ega sogded: “Be-babse be nainu egise.” Agi, Acsa moli-uayasuid-birgi-siid aidesad. Geb e-bab-Caleb deyob daksagu, ega sogded: —¿Igi be itoge?

¹⁵ Acsa, e-bab-abin sogded: —Be anga ibmar-baid-udabi an abedo. Bato be anga napanegdi Neguevʼgi uksad, dii-gammumar-aryomamaid an abebalid. Degidgi, Caleb, dii-gammumar-nakwar-mamaid ega uksad, degi, dii-gammumar-dear-mamaid ega uksabalid.

Judá-wagan, degi, Benjamín-wagan neggwebur-baigangi nakwisad

¹⁶ Moisés-e-saka-e-wagan-Ceneo-dulemar, Judá-waganmarba Sapimar-Ogobgi-Dakleged-Neggwebur-akar, Judá-nega-dulesulidganse nade gusmalad. A-nega-dulesulidgande, Neba-Neguevʼye-nugadba naid, Arad-neg-nugadmobin. Agi megidapmalad.

¹⁷ Geb degine, Judá-wagan, Simeón-waganmala bila-ononadmarbalid. Degi, Canaán-dulemar-Sefatʼgi-bukmaladgi nakwismalad, bela swanga neggwebur imaksamalad. A-ulale, Sefat-neggwebur, Hormaʼye onugsasmalad.

¹⁸ Judá-wagan, Gaza-neggwebur susmalad, degi, Ascalón-neggwebur, Ecrón-neggwebur susmarbalid. Degine, bela e-nainumarse-bakale, ei-susmalad.

¹⁹ Bab-Jehová Judá-sordamarba nue-gudiid. Amarde, yalaganba dulemar-bukwad-onosmar-inigwele, ar nebagi-dulemar-bukwaddi ur-napagined-esgoromar-nikad nikasoggu, onossurmalad.

²⁰ Igi-Moisés-sogsa-gusa, deyob Hebrón-neggwebur Calebʼga uklesad. Geb Caleb, a-neggweburgi Anac-e-masmala-walapaagwad onosad.

²¹ Degi-inigwele, Benjamín-e-wagandi, Jebuseo-dulemar-Jerusalénʼgi-bukwad onossurgusad. A-ulale, we-garda-narmaklenaidse, Jebuseo-dulemar, Benjamín-dulemar-ebo, bular Jerusalén-neggweburgi bukwagusmalad.

José-wagan Betel-neggwebur susad

²² José-wagan Betel-neggweburgi bila-ononade gusmalad. Bab-Jehováʼdi, José-waganba nue-gudiid.

²³ José-wagan dule-ega-neg-argamalad Betel-neggweburse barmisad. We-neggweburde Luzʼye iduar nuganad.

²⁴ Degi, dule-neg-argamalad, dule-wargwen neggweburgi-nodani-daksamargu, ega sogdemalad: “Neggweburse-igar-doglemaid be anmarga oyogele, wile an be-dakmaloed.”

²⁵ Geb a-dule, neggweburse-igar-doglemaid ega oyosad. Degi, na dogsamargu, bela dulemar-neggweburgi-bukwamalad es-suidgi ese-ogilolesmalad. Geb dule-ega-igar-oyosaddi, degi, e-gwenadgandi wiledaksamalad, ogilossurmalad.

²⁶ Degine, a-dule, Het-dulemar-yarse nade gusad. Agi, neggwebur sidapid. Luzʼye e-neggwebur-onugsasad. We-garda narmaklenaidse deyob nuggusad.

Manasés-wagan, degi, Efraín-wagan dulemar-baigan onissulid

²⁷ Manasés-wagan, amba Canaán-dulemar-onissurmogad. Amarde, wemalad: Bet-Seánʼgi-bukmalad, degi, e-neggwebur-burwiganase-bakar, Taanacʼgi-bukmalad, degi, e-neggwebur-burwiganase-bakar, Dorʼgi-bukmalad, degi, e-neggwebur-burwiganase-bakar, Ibleamʼgi-bukmalad, degi, e-neggwebur-burwiganase-bakar, Meguidoʼgi-bukmalad, degi, e-neggwebur-burwiganase-bakar. Degisoggu, Canaán-dulemar, e-yargine, yapa-ainie na bukwa gusmalad.

²⁸ Geb Israel-dulemar gangudmargu, Canaán-dulemarga arbaed-gandikid uksamalad. Degi-inigwele, Canaán-dulemar amba bela onilessurgusad.

²⁹ Efraín-wagan, Gezerʼgi-Canaán-dulemar-bukwad-onissurmogad. Degisoggu, Canaán-dulemar amba Efraín-wagan-abargi bukwagusmalad.

Israel-wagan-baigan dulemar-bukwad onissurmalad

³⁰ Zabulón-wagan, Quitrón-neggweburgi-dulemar-bukwad onissurmarmogad, degi, Naalal-neggweburgi-bukwad onissurmarbalid. Degisoggu, Canaán-dulemar amba Zabulón-wagan-abargi bukwagusmalad. Degi-inigwele, Canaán-dulemarga arbaed-gandikid-uksamalad.

³¹ Aser-wagan, amba Canaán-dulemar-onissurmogad. Amarde, wemalad: Acoʼgi-bukmalad, Sidónʼgi-bukmalad, Ahlabʼgi-bukmalad, degi, Aczibʼgi-bukmalad, Helbaʼgi-bukmalad, Afecʼgi-bukmalad, degine, Rehobʼgi-bukmalad.

³² A-ulale, Aser-wagan, Canaán-dulemar-abargi bukwagusmalad.

³³ Neftalí-wagan, amba Canaán-dulemar Bet-Semesʼgi-bukwad, degi, Bet-Anatʼgi-bukwad onissurmogad. Degisoggu, Neftalí-wagan, Canaán-dulemar-abargi bukwagusmalad. Degi-inigwele, Bet-Semes-dulemarga, degi, Bet-Anat-dulemarga arbaed-gandikid uksamalad.

³⁴ Amorreo-dulemar, yalaganba Dan-wagan ise-barmiar-imaksad, degine, nebaganba-aidegega gwen imaksasulid.

³⁵ Degisoggu, Amorreo-dulemar na Heres-yargi yapa-ainie gusmalad, degi, Ajalón-yargi, degine, Saalbim-yargi yapa-ainie gusmalad. Degi-inigwele, José-wagan gangudmargua, Amorreo-dulemarga arbaed-gandikid uksamalad.

³⁶ Dakargu, Amorreo-dulemar-e-yar-abingunaid, Acrabim-yar-nakwialidgi onoded, Selaʼse, degi, niba nakwidbalid.