Juan 12 - Kuna San Blas

María, gwallu-wawagwadgi Jesús-magsad

¹ Ibanergwase (6), Oburgwilegoenad-Iba-naguoele, Jesús Betania-neggweburse Lázaro-maidse nonikid. Jesús, we-Lázaro-burgwisgusgu, gannar odulos gusadid.

² Agine, Jesúsʼga sedo masgunned imaksamalad. Deunni, Marta ega mas-daknai gusad. Lázaroʼdi, Jesús-mas-gunsigu, sii gusmogad.

³ Agi María, bute-wargwen gwallu-wawad-nued-nardoʼye-nugad, ber gargesailadi, Jesúsʼse senonikid. Geb degi, María Jesús-naggi a-gwallu-wawagwad eosad. Geb e-sailagiagi Jesús-nag odinnosad. Gwallu-wawagwad-e-yapanned bela neg-gasa sigisad.

⁴ Jesús-sapin-wargwen, Simón-machi-Judas-Iscarioteʼye-nugad, Jesús-darba-ukoed-dule, sokalid:

⁵ —¿Ibiga we-gwallu-wawagwad mani-birgagwen-amilege-wilubyobi, uklessuli? Adi, a-mani wileganaga uklegoenad.

⁶ Ar Judas degisogsadi, dule-wilegana-sabedbali, deyob sogsasulid. Ar ade, dule-atursilid. Ar mani-sagu-sedidasoggu, agi mani-urbilemaid gusgu arbak atursadii daed.

⁷ Geb degi, Jesús, Judas-abin sogded: —Mer Maríaʼga akar-soge. We gwallu-wawadgi-an-magsadi, an-diglegoed-ular, an-magsad.

⁸ Ar bemar-abargi wileganadi gusgu gudiguoed. Andi bemar-abargi sadeguosulid.

Judío-dummagan, Lázaro-oburgwebi gusmalad

⁹ Judíoʼmar-bukidar Jesús Betaniaʼgi-gudiiye wisguarmargu, ese duurmaknonimalad. Unnila Jesús-dakegarbi nonisurmalad. Lázaro-dakega nonimarbalid. Ar ade, Jesús, Lázaro-burgwar-mai odulosad.

¹⁰ Dule-irwa-Bab-Dummadse-gormalad-e-dummagan deyob itosmargu, igar amismalad, Lázaro-oburgwemarmogoye.

¹¹ Ar ade, Lázaro-durgusadba, Judíoʼmar-bukidar Judío-igar-odurdakmaladgi bangudmalad, Jesúsʼgi-bensuli gunonimalad.

Jesús, Jerusalén-neggweburgi reyyob dogsad

¹² A-banedgine, dule-bukidar-ibase-nonimalad itoarmargu, Jesús Jerusalénʼse daniye,

¹³ ogob-gagangiid-e-gagan gwachamalad. Degine, Jesús-nug-odummogega Jesús-abin nadmalad. Jesús-dakarmargu, binnasur gotemalad, sogdemalad: “¡Bab-Dummad-nug odummomar! We-dule, Bab-Dummad-nuggi danikid, bela ega ibnuedga gusun. We-Israel-e-Reygi nued binsalesun.” Salmo 118:26

¹⁴ Jesús moli-uayasuid-e-mimmi amisad. Geb e-birgi sigisad, ar igi Bab-Dummad-gardagi narmakar-sognaiyob:

¹⁵ “Siónʼgi-bukmalad, mer be dobgu. Be dake, be-Rey, moli-uayasuid-e-mimmi-birgi-sii bese danikid.” Zacarías 9:9

¹⁶ Ar Jesús-sapingan gebesailagi aku-itosmalad, wede ibi-obare. Ar Jesús-nug Bab-Dummadse-ogannolesad-sorbali, geb e-sapingan insadmalad, Bab-Dummad-gardagi we-Jesúsʼgi bato degi-narmakar-naidba ega imaklesa.

¹⁷ Dulemar-Jesúsʼba-gudigusmaladi, Jesús Lázaro-neg-uan-yaba-maigu-ese-gochad-daksamaladi, degi, gannar-odulosad-daksamarbalidi, dule-baiganga a-ibmar-gusad sogedbimalad.

¹⁸ A-ulale, dulemar-bukidar Jesús-abin nonigusmalad. Ar ade, itosmalad, igi Lázaro gannar odulolesgusa.

¹⁹ Ar Fariseoʼmardi muchub-muchub sokarmalad: “Anmar, dulemar-mer-Jesúsʼba-naguegala, geg oakaloged. Be dake, ar bela dulemar eba duurmakmaid.”

Griego-dulemar, Jesús-aminonimalad

²⁰ Griego-dulemarmoga, Judíoʼmar-ibagi Bab-Dummadse-golega, Judíoʼmar-abargi nonimarmogad.

²¹ Amar, Felipeʼse nonimalad. Felipeʼde, Galilea-yargi-Betsaida-neggweburginedid. Griego-dulemar Felipeʼgi wilenaigusmalad, ega sogdemalad: —Dummad, anmar Jesús-dakbimalad.

²² Felipe nadgu, Andrésʼga sogdapid. Degine, Felipe, Andrés-ebogwa Jesúsʼga sogdapmarsunnad.

²³ Jesús, abin-imakdegu, sogded: —Emigindi, ani Dule-Machi, an-nug-odummolegega iba nagunonisun.

²⁴ Napira an bemarga soged, ar ibmar-gwag napagi argwansulile, e-uka nungusulile, geg ainied. Ar napagi-argwanerdi, degi, e-uka-nunguerdi, ainidagogu, bukidar sanmakodo.

²⁵ ”Ar amba deyobmodo. Dule e-san-burba-sabele, binsa sabguodo. Ar we-napneggi e-san-burba na sabsulirdi, burba-geg-bergued nikuoed.

²⁶ Ar dule anga arbabiele, an-sogedba-nanaega anba dagodo. Dule-anga-arbaedi, an-gudiguoedgine gudii gumogoed. Ar dule anga arbaele, an-Bab a-dule-nug odummomogoed.”

Jesús, e-burgoedgi sunmaksad

²⁷ Jesús sogdebar: “Emigindi, ulubgi an surbinsa itoged. Degi-an-itogedba, ¿an sogoe, ‘Bab-Dummad, emigindi we-ibmar-nunmaked-dummad be anga osuloye?’ Suli, degi-an-sogosuli. Ar burgwega an we-napnegse nonikid.

²⁸ Bur an sogodo: Bab-Dummad, be-nug be odummoge.” Degidgine, nibneggi gayaburba gornonikid: “An-nug bato an ogannosad. An-nug gannar an ogannobaloed.”

²⁹ Dule-bukmalad, gayaburba-sunmak-itosmaladi, sogdemalad: “Mar gocha.” Baigandi sogmalad: “Baliwitur-wargwen ega sunmaksa.”

³⁰ Jesús sunmakdegu, sogded: —We-gayaburba-be-itosmaladi, anga nonisulid, bemarga nonikid.

³¹ Emigindi, we-napneggi-dule-bukmalad-sabsur-odurdakleged-iba nagunonikid. Emigindi, nia-saila we-napneg-dummadga-gudiid-onoleged-iba nonisunnad.

³² Ar napagi-onakwiles an nagusale, bela dulemar anba nagumalaga an ebioed.

³³ Jesús weyob sogsagusadi, mag-ito imaknaid, ede nakrusgi bioklegar burgoye.

³⁴ Dulemar, Jesús-abin sogdemalad: —Anmar wismalad Moisés-igargi sognaid, ‘Bab-Dummad-dule-wargwen-barmidagoye-sogsad-dule-Cristo nonikile, burgosulid, degisadeguoed.’ ¿Ar ibiga bedi sogsunna, Dule-Machi nakrusgi bioklegar onakwilegergebye? Ar Dule-Machi, ¿we doasunna?

³⁵ Geb degi, Jesús, abin-sogded: —Emigindi, ani gwallu-meegwadga ichesaar amba bemar-abargi an gudiid. Gwallu-meegwad amba bemar-abargi-gudiidgi eba be nanamar, adi, melle negsichid ukiarmakar begi nonimalagar. Ar dule negsichidgi-nadapile, wissurdaed, bia nadapi.

³⁶ Emigindi, amba be gwallu-meegwad-nikmarsoggu, gwallugi mer be bengumar, adi, bemar neg-meegwad-mimmiganga gumalagar. Jesús degi-ibmar-sogsagusad-sorba nadsunnad. Mer e-amimalaga emar-idu dukusad.

Judío-dummagan, Jesús-abingassurmalad

³⁷ Ar Jesús emar-wagab ibmar-wilubgan-dakledisurmalad-bukidar imaksa-inigwele, dulemar amba Jesúsʼgi bengusmalad.

³⁸ Ar epenne Bab-gayaburba-barsoged-Isaías-sogsagusadyob-guegala, deyob gunonikid, deun sogsagusgu: “Bab-Dummad, ¿doa anmar-ibmar-sogsad bengussuli? ¿Doase Bab-Dummad na e-gangued oyosa?” Isaías 53:1

³⁹ A-ulale, dulemar Jesús-abingassurmalad. Ar ade, Isaías amba sogsagusbalid:

⁴⁰ “Bab-Dummad amar-e-ibya akudake imaksad, degi, amar uayasurdaega imaksabalid, adi, melle na e-ibyagi mag dakmalagar, degi, e-gwagegi melle mag itomarbaligar. Ar degiile, abonolemalo-itole. Ar degiile, amar an nudake dakledago-itole.” Isaías 6:10

⁴¹ Deunni, Isaías Jesús-e-gangued-daksagu, weyob sogsagusad. Degi, egi sunmaksa gusad.

⁴² Degi-inigwele, bukidar dummagan-neg-dakmamaid, ulubgi Jesúsʼgi-bensuli gusmalad. Ar we-dummagan Fariseoʼmar Judíoʼmar-onmakedneggi e-onomaloed-dobedbali bakar-buud gwen sogsasurmalad, emarde, Jesúsʼba naimoye.

⁴³ Deginbali, ar dummagan, dulemar-ei-nug-odummoged bur abeged. Ar Bab-Dummad-ei-nug-odummogeddi, abesurmalad.

Jesús-ibmar-sogsad, dulemargi gwisguoed

⁴⁴ Jesús binnasur sunmakde, sogded: “Ar dule an-bensulile, anbi an-bengusuli gusulid, Bab-Dummad-an-barmialid bensurbalid.

⁴⁵ Ar dule mag an-dakale an-doa-dule, dule-an-barmialid mag-dakbardo.

⁴⁶ Ani, we-napnegse gwallu-meegwadga, an nonikid. Adi, bela-angi-bensurmalad, mer bar negsichidgi-gudii gumalagar.

⁴⁷ ”Ar dule an-gayaburba-itogedba dasulile, ani an sogosulid, be dummad-nosye. An we-napnegse nonisulid, dulemarga sogega be nue-isgusmarye. An dulemar-abonogegala nonikid.

⁴⁸ Ar dule an-abingasulile, degine, an-gayaburba-sunmaked abingasurbalile, e-sabsur-odurdakoed bato nikad. Ibagan-berguoedgi an-ibmar-sogsadba dulemar-an-abingassurmalad Bab-Dummadse sabsur-odurdaklegoed.

⁴⁹ ”An-itolegedba an ibmar sogsasulid. Bab-Dummad an-barmialid, a, igar anga uksad, igi an sogoe, degi, igi an sunmakbaloe.

⁵⁰ An wisdo, an-Bab-igar-anga-uksadi, dulemar-anba-nagumaloedga burba-geg-bergued uked. Degisoggu, an ibmar-sogedi, ar igi Bab-Dummad anga sogsa, deyob an soged.”