Juan 11 - Kuna San Blas

Lázaro-burgwisad

¹ Dule-wargwen, Betaniaʼgined, Lázaroʼye-nugadi uellemaid. We-Betania-neggweburde María, degine, e-ior-Marta-e-neggweburad. We-omegan, Lázaro-e-bunmalad.

² We-María, gwallu-wawadgi Bab-Jesús-magsagusadid. María e-sailagiagi Dummad-Jesús-e-nag odingusii gusadid. Deunni, María-e-sus-Lázaro uellemaid.

³ A-ulale, Lázaro-e-bunmar dulemar-barmisad, adi, Jesúsʼga sogega: “Dummad, dule-nue-be-sabedi, uellemaiye.”

⁴ Jesús, degi-itosgua, sogded: “We-Lázaro-uellemaidi, burgwegarsulid. Bab-Dummad-nug-odummogega we uellemaid. Adi, we-uellemaidgi Bab-Dummad-Machi-e-nug odummolegegar.”

⁵ Dakargua, Jesús, nue-Marta-sabed, e-urba-María-sabbalid, degine, nue-Lázaro-sabbalid.

⁶ Ar deyob sabe-inigwele, Jesús Lázaro-uellemaiye-wisgusgu, amba ibabo e-gudiidgine gudii gusad.

⁷ Geb a-sorba, Jesús e-sapinganga sokalid: —Anmar gannar Judeaʼse namala.

⁸ E-sapingan ega sogded: —Odurdaked-saila, emichaale Judíoʼmar akwagi be-makbigusmaladde, degite, be ¿gannar nabarde?

⁹ Jesús, abin-sogded: —Ar neg-ibgined ¿wachi-irambe-gakabo (12) niksursi? Dule neg-ibgi gudiile, geg yoleged. Ar ade, we-napneggined-neg-meegwadba gudiid.

¹⁰ Ar dule neg-mutikidgi gudiirdi, yoledo, ar agindi gwallu-meegwad sulid.

¹¹ Jesús deyob-sogsad-sorba, e-sapinganga sogdesunnad: —Anmar-ai-Lázaro gabmaid, odakega an ese naergebed.

¹² E-sapingan ega sogdemalad: —Dummad, ar Lázaro gabmaile, nuguodo. Degite, ¿ibiga be nabisunna? Mer be nae.

¹³ Jesús degisogsagusadi, sognaindo: “Lázaro burgwar maiye.” Ar e-sapingandi, gabed-sunnad ega obarye bienad.

¹⁴ Geb agi Jesús bakar-buud sogdesunnad: —Lázaro burgwis maiye.

¹⁵ An Lázaro-walik gudigussulid-ular, an yeer itoged, adi, bemar mer angi bengumalagar. Degisoggu, anmar Lázaroʼse namargwelo.

¹⁶ Degi, Tomás, Dídimoʼye-bimarbalid, e-sordamarga sogdesunnad: —Anmar Jesúsʼba burgwega eba namarmoga.

Jesús, dule-odurguedid, degine, burba-geg-bergued-ukedid

¹⁷ Degi, Jesús Betania-neggweburse nonigu, Lázaro bato ibabakegus neg-uangi diglesmai daknonikid.

¹⁸ Betania-neggwebur, Jerusalénʼgi itakaa siid, unnila wachi-abala-nanae-wilub bangu siid.

¹⁹ Judíoʼmar-bukidar, Lázaro-burgwisad-ular, Martaʼse, degi, Maríaʼse nonigusmalad. Adi, amar-e-gwage baisur-itoge imakegar.

²⁰ Marta, Jesús-daniye-itosgu, e-abin nadegusad. Maríaʼdi neggi besad.

²¹ Marta Jesúsʼga sogded: —Dummad, be wegi anmar-abargi-gudigusana, an-sus burgwissulinad.

²² Degi-inigwele, an wisbardo, ar ibu Bab-Dummadse be egisele, Bab-Dummad bega ukoed.

²³ Jesús, abin-sogded: —Be-sus gannar durguoed.

²⁴ Marta, abin-sogded: —An wisi, ibagan-berguder, an-sus dulemar-gannar-durguoed-ibagi gannar durguoed.

²⁵ Jesús, abin-sogded: —Ani an gannar dule-odurguedid, degi, ani an burba-geg-bergued ukbalidid. Ar dule angi bensulile, ar burgwar-mai-inigwele, gannar durguoed.

²⁶ Bela-dula-gudidimaladi angi bensulile, e-san-burba berguosulid, degisadeguoed. Weyob-an-bega-soged, ¿be bensuli?

²⁷ Marta, Jesús-abin sogded: —Dummad, eye, an bensuli. Be, Bab-Dummad-Machid. Be Cristo, we-napnegse-danikoye-soglesgusadid.

Jesús, Lázaro-neg-uangi bosad

²⁸ Marta deyob sogsad-sorbali, e-urba-Maríaʼse gornaded. Ega arbakee sogdapid: —Odurdaked-saila noniye. Bese gorye.

²⁹ Deyob ega-soge-itosgu, María yog-gwisguar imaksad. Jesúsʼse nade gusad.

³⁰ Jesús deun amba yoo neggweburse doged, ar bia-Marta-e-abingusadgi amba gudiid.

³¹ Judíoʼmar-wis-María-gwage-baisur-itogega-imakega eba e-neggi-bukmaladi, María gwae-gwisgus-node-daksamargu, eba nodmarmogad. Amardi binsamalad: “María neg-uanse nad-dakleye, ase bonad-dakleye.”

³² María, Jesús-siidse-modapgu, Jesús-dakdegu, e-abin sindigar sigdapid, ega sogded: —Dummad, be wegi anmar-abargi gudigusana, an-sus burgwissulinad.

³³ Jesús, María-ise-boale dakdegu, degine, Judíoʼmar-María-gwage-baisur-itoge-imakega-nonimaladi, ise-boarmarmoga dakdegu, ulubgi nue-nunmak itonadmogad, degi, nue-María-wile dakded.

³⁴ Jesús Maríaʼga sogded: —¿Bia bemar Lázaro-digsamala? Jesúsʼga sogdemalad: —Dummad, be dage, be dakdage.

³⁵ Degi, Jesús boded.

³⁶ Geb Judíoʼmar sogdemalad: —Nue be dake. Ibiyobi Jesús, nue-Lázaro-sabe.

³⁷ Geb Judío-baigan sogdemarmogad: —Ar we-Jesús, dule-ibyasulidga ibya egasad. Lázaro-mer-burgwega ibmar imakewilubbinad.

Jesús Lázaro-gannar-odurgusad

³⁸ Jesús nue-ulubgi-bukib-itodbargu, neg-uanse nonikid. Neg-uandina, akwa-yaa-ollogwadid, e-doged-idu akwa-dummad siid.

³⁹ Jesús dulemarga sogdesunnad: —Akwa-dummad onirmar. Dule-burgwisad-e-bun-Marta, sogded: —Dummad, ¿Ibiga akwa be onirbie? Bato ibabakegus diglesad. Degisoggu, bato nun yapanned.

⁴⁰ Jesús, Marta-abin sogded: —¿An bega sogsasursi? Be angi bensulile, Bab-Dummad-gangued be dakoye.

⁴¹ Geb dule-burgwisad-diglesad-dogedgi akwa-dummad-siid onirismalad. Geb degi, Jesús niba-atakdegu, sogded: —Baba, be an-itossoggu dog-nuedye an bega soged.

⁴² An wisid, be gusgu an-itodaed. Ar we-ibmar-an-sogsadi, dule-an-dikarba-bukwamalad-ular, an sogsad, adi, mer angi bengumalaga bee be an-barmiarye.

⁴³ Jesús deyob-sogsad-sorbali, binnasur goted: —¡Lázaro, magaba be nodage!

⁴⁴ Lázaro-burgwis-maidi, noargu, bela naga, degine, arganmar morgogi bipirmakale ise-atinnar noalid. Degine, e-wagar ise-morgogi bipirmakarbalid. Jesús dulemarga sogded: —Be Lázaro-esikmar. Nanaega be imakmarsun.

Judío-dummagan, Jesús-oburgwebigusmalad

⁴⁵ Judío-bukidar Maríaʼse-nonigusmaladi, Jesús, gannar-Lázaro-odulosad daksamargu, Jesús-bensuli gunonimalad.

⁴⁶ Gwenna-gwenna Fariseoʼmarse nadmalad, ega sogdapmalad, igi Jesús Lázaro-odulosa.

⁴⁷ Degine, dule-irwa-Bab-Dummadse-gormalad-e-dummagan, degi, Fariseoʼmar, igar-itogega dummagan-onmaksad, geb sogdemalad: —¿Igi anmar Jesús-imakmaloe? Ar emide, Jesús ibmar-wilubgan-imakledisulid bukidar imakdiid.

⁴⁸ Anmar we-Jesús ibmar-dakledisulid-imakdii imakele, bela eba nagudmaloed. Geb degi, Roma-dummagan nonimaloed, anmar-Bab-Dummadse-goled-neg, degi, anmar-yar osulononimaloed.

⁴⁹ Judío-dummad-wargwen, Caifásʼye-nugadi, a-birgagi dule-irwa-Bab-Dummadse-gormalad-bur-dummadga maid. A e-sordamarga sogded: —Bemar aku-itomalad.

⁵⁰ Ar bemar magar itosurmalad. Bela dulemar-anar dule-wargwen-burgwed bur nabirid, adi, melle bela dulemar-we-yargi-bukmalad obelolegegar.

⁵¹ We-Caifás-ibmar-sogsadi, na wargwen e-itolegedba ibmar sogsasulid. Ar ade, a-birgagi dule-irwa-Bab-Dummadse-gormalad-bur-dummadsoggu, iduakwaa sogsad: “Jesús bela Judío-dulemar-anar burgoye.”

⁵² Jesús unnila Judío-dulemar-anarbi burgosulid. Bela Bab-Dummad-mimmigan-aisakis-bukmalad-danakwaa-urbega burgwebaloed.

⁵³ Degisoggu, Judío-dummagan, a-iba-akale Jesús-oburgwemaloye sogsamardo.

⁵⁴ Degisoggu, Jesús Judíoʼmar-abargi bar gudii gussulid. Agala, Judea-yargi nodegusad, nega-dulesulid-dikarba, neggwebur-Efraínʼye-nugadse, naded. Jesús a-neggweburgi e-sapinganmala megidapsunnad.

⁵⁵ Deun, Judíoʼmar-Oburgwilegoenad-Iba-onoleged bato omosad. Degisoggu, bukidar neggwebur-baid-baidginmalad san-swilidik-imakmalaga Jerusalénʼse iduakwasaar nonimalad.

⁵⁶ A-dulemar Bab-Dummadse-goled-neggi-bukmargu, Jesús-amiarmalad, na muchub-muchub egisnanai guarmalad: “Be dakgua, ¿Jesús ibase noniko be insae?”

⁵⁷ Dule-irwa-Bab-Dummadse-gormalad-e-dummagan, degi, Fariseoʼmar, igar uksamalad. “Dule bia-Jesús-gudiid wisgunonikile, sogmaloye,” adi, Jesús-ganamalagarye.