Josué 19 - Kuna San Blas

Simeón-wagan-e-yar

¹ Benjamín-wagan-sorbali, Simeón-waganga na e-dadgan-e-dadganba yar uklesad. Simeón-wagan-e-napanegmar Judá-wagan-yar-naid-yagi nagusad.

² Simeón-waganga we-neggweburmar uklesad: Beerseba (Seba), Molada,

³ Hazar-Sual, Bala, Ezem,

⁴ Eltolad, Betul, Horma,

⁵ Siclag, Bet-Marcabot, Hazar-Susa,

⁶ Bet-Lebaot, degi, Saruhén. We-neggwebur-gwaambe-gakapaagwad (13) e-neggwebur-burwiganase-bakale, ega uklesad.

⁷ We-neggweburmar ega uklesbalid: Aín, Rimón, Eter, degi, Asán. We-neggwebur-gwabakegwad e-neggwebur-burwiganase-bakale, ega uklesad.

⁸ Deginbali, we-neggweburmar-dikarba bela neggwebur-burwigana-bukwadse-bakale, Baalat-Beerʼse ega uklesbalid. Baalat-Beerʼde Ramat-neggweburad, Neguev-yargi siid. We-napanegmar, Simeón-waganga na e-dadgan-e-dadganba ega uklesad.

⁹ Judá-wagan yar doggus-dummarba-nikusad. Degisoggu, e-dulemargi napaneg obine gusad. A-ulale, Simeón-waganga Judá-wagan-e-yargi napanegmar uklesad.

Zabulón-wagan-e-yar

¹⁰ Simeón-wagan-sorbali, Zabulón-waganga na e-dadgan-e-dadganba yar-uklesad. E-yar-abingunaidi, Saridʼse dungue naid.

¹¹ Dad-argwanedsik yar-abingunaidi, Maralaʼsik namaid, geb Dabesetʼse warmakmaid, Jocneam-asabin dian-maidse bergunaid.

¹² Yar-abingunaidi, Sarid-akale dad-nakwedsik aibirided, bia dad-nakwiardaedsik, geb Quislot-Tabor-yar-abingunaidse momaid. A-sorbali, Daberatʼse warmakmaid, geb Jafíaʼse nakwemaid.

¹³ Agi yar-abingunaidi, dad-nakwedsik Gat-Heferʼsik nadbalid. Ita-Cazínʼgi namaid, degi Rimónʼse momaid. Geb Neaʼsik aibirided.

¹⁴ Geb agi yar-abingunaidi, dad-nakwed-argan-sapiledsik-aibirided, Hanatónʼse warmakmaid, geb Jefte-El-nebase bergunaid.

¹⁵ We-yar-yagi neggweburmar-gwaambe-gakabo (12), degi, e-neggweburmar-burwiganase-bakale, dogar bukwad. A-neggweburmar wemalad: Catat, Naalal, Simrón, Idala, degi, Belén.

¹⁶ We-yala Zabulón-waganga na e-dadgan-e-dadganba, ega uklesad. Deginbali, we-yar-yagi neggweburmar-bukwad, degi, e-neggwebur-burwiganase-bakale, ega uklesbalid.

Isacar-wagan-e-yar

¹⁷ Zabulón-wagan-sorbali, Isacar-waganga na e-dadgan-e-dadganba yar uklesad.

¹⁸ Isacar-waganga-yar-uklesad-yagi, we-neggweburmar bukwad: Jezreel, Quesulot, Sunem,

¹⁹ Hafaraim, Sihón, Anaharat,

²⁰ Rabit, Quisión, Abez,

²¹ Remet, En-Ganim, En-Hada, degi, Bet-Pases.

²² We-yar-abingunaidi, Tabor-yarse, Sahazima-neggweburse, degi, Bet-Semes-neggweburse momaid, geb Jordán-diwarse bergunaid. Bela neggwebur-gwaambe-gakanergwa-mergue (16), degi, e-neggwebur-burwiganase-bakale,

²³ Isacar-waganga na e-dadgan-e-dadganba, ega uklesad.

Aser-wagan-e-yar

²⁴ Isacar-wagan-sorbali, Aser-waganga na e-dadgan-e-dadganba yar uklesad.

²⁵ Aser-waganga-yar-uklesadyagi, we-neggweburmar bukwad: Helcat, Halí, Betén, Acsaf,

²⁶ Alamelec, Amad, degi, Miseal. E-yar-abingunaidi dad-argwanedsiki Carmelo-yarse, degi, Sihor-Libnatʼse warmakmaid.

²⁷ Geb agi dad-nakwedsik aibirided, Bet-Dagónʼye-neg-nugadsik, geb Jefte-El-nebagi Zabulón-wagan-yarse warmakmaid. A-sorbali, dad-nakwed-argan-sapiledsiki Bet-Emecʼsik, degi, Neielʼsik namaid. Geb dad-nakwed-argan-sapiledsiki Cabulʼse nomaid.

²⁸ Yar-abingunaidi, Hebrónʼsik, Rehobʼsik, Hamónʼsik, Canáʼsik nadbalid, Sidón-neggwebur-dummadse warmakmaid.

²⁹ A-sorbali, Ramáʼsik bilided. Agi Tiro-neggwebur-sakdigar-siidse warmakmaid. A-sorbali, Hosaʼsik bilided, degi, Aczib-yar-akale, Demar-Dummadye-nugadse nomaid.

³⁰ We-yar-yagi Uma, Afec, degi, Rehob, bukwamarbalid. Bela neggwebur-gwadulagwen-gakabo-mergue (22), degi, e-neggwebur-burwiganase-bakale, ega uklesbalid.

³¹ We-yala Aser-waganga na e-dadgan-e-dadganba ega uklesad. Deginbali, we-yar-yagi neggweburmar-bukwad, degi, e-neggwebur-burwiganase-bakale, ega uklesbalid.

Neftalí-wagan-e-yar

³² Aser-wagan-sorbali, Neftalí-waganga na e-dadgan-e-dadganba yar uklesad.

³³ Neftalí-wagan-e-yar-abingunaidi, Helef-neggwebur-akar, degi, Alón-Saananim-sapi-dummad-gwichidgi onoalid. Adami-Neceb-neggweburba, degi, Jabneel-neggweburba namaid, Lacumʼse. Geb Jordán-diwarse bergunaid.

³⁴ Dad-argwanedsik, Neftalí-wagan-e-yar-abingunaidi, Aznot-Tabor-neggwebursik bilided. Agi, Hucoc-neggweburse warmakmaid. Geb dad-nakwed-argan-nuedsik, Zabulón-wagan-e-yar-abingunaidba namaid. Dad-argwanedsiki, Neftalí-wagan-e-yar, Aser-wagan-e-yarbo abingunaid. Dad-nakwedsiki, Neftalí-wagan-e-yar Jordán-diwarba Judá-wagan-e-yarbo abingunaid.

³⁵ E-neggwebur-ise-sakdigar-bukwamaladi, wemalad: Sidim, Zer, Hamat, Racat, Cineret,

³⁶ Adama, Ramá, Hazor,

³⁷ Cedes, Edrei, En-Hazor,

³⁸ Irón, Migdal-El, Horem, Bet-Anat, degi, Bet-Semes. Bela neggwebur-gwaambe-gakabakebak (19), degi, e-neggwebur-burwiganase-bakale, ega uklesad.

³⁹ We-yala, Neftalí-waganga na e-dadgan-e-dadganba ega uklesad. Deginbali, we-yar-yagi neggweburmar-bukwad, degi, e-neggweburmar-burwiganase-bakale, ega uklesbalid.

Dan-wagan-e-yar

⁴⁰ Neftalí-wagan-sorbali, Dan-waganga na e-dadgan-e-dadganba yar uklesad.

⁴¹ Dan-waganga yar-uklesadgine, we-neggweburmar bukwad: Zora, Estaol, Ir-Semes,

⁴² Saalabín, Ajalón, Jetla,

⁴³ Elón, Timnat, Ecrón,

⁴⁴ Elteque, Gibetón, Baalat,

⁴⁵ Jehúd, Bene-Berac, Gat-Rimón,

⁴⁶ Mejarcón, Racón. Degi, Jope-asabin yar-naid ega uklesbalid.

⁴⁷ Ar we-yar-ega-uklesad amba Dan-waganga galakussoggu, Lesem-neggwebur-suega ase bila-onoapgusmalad. Geb Lesem-neggweburgi-ubosmargua, bela e-dulemar es-suidgi ogilosmalad. A-sorbali, Dan-dulemar egi ambikusmalad. Geb e-dad-dummadba we-neggwebur Danʼye onugsasmalad.

⁴⁸ Weyobi Dan-waganga na e-dadgan-e-dadganba ega yar uklesad. Deginbali, we-yar-yagi neggweburmar-bukwad, degi, e-neggweburmar-burwiganase-bakale, ega uklesbalid.

Josué-e-yar

⁴⁹ Israel-dulemar na e-dadgan-e-dadganba yar-mimismalad-sorbali, na emar-yar-abargi Nun-machi-Josuéʼga napaneg uksamarmogad.

⁵⁰ Deyobi, Bab-Jehová igar-uksadba imaksamalad. Josué, Efraín-yalaganba Timnat-Sera-neggwebur-siid abingasad. Ar Josué we-neggwebur na egichagusad. Degisoggu, gannar a-neggwebur sobsa gusad. Geb agi megisad.

⁵¹ Weyobi, dule-irwa-Bab-Dummadse-goled-Eleazar, Nun-machi-Josué, degi, Israel-dadgan-warambe-gakabogwad-e-dummagan (12), Israel-dulemarga yar-mimied bergusmalad. Silo-neggweburgi, Bab-Dummad-dulemarbo-ambikued-neg-dogedgi, Bab-Jehová-asabin ibmargi-wilubdaklegar yar mimismalad.