Josué 15 - Kuna San Blas

Judá-wagan-e-yar

¹ Judá-waganga na e-dadgan-e-dadganba yar-uklesadi, Edom-yar-abingunaidse naid. Dad-nakwed-argan-nuedsik Zin-nega-dulesulidganse bergunaid.

² Dad-nakwed-argan-nuedsik-yar-abingunaidi, Demar-Gagbidye-nugad-dad-nakwed-argan-nuedsik-sukun-siidgi onoded.

³ Sorbali, dad-nakwed-argan-nuedsik Acrabim-igar-nakwemaidba namaid, Zin-nega-dulesulidgangi obakmaid, geb Cades-Barnea-dad-nakwed-argan-nuedsik nakwidbalid. A-sorbali, Hezrón-neggweburse warmakmaid, geb Adarʼse nakwidbalid, degi, Carcaʼsik aibirided

⁴ Asmón-neggweburse. Agi onodbargua, Egipto-diwarse warmakmaid, geb Demar-Dummadye-nugadse bergunaid. We, Judá-yar-abingunaid dad-nakwed-argan-nuedsikidid.

⁵ Dad-nakwedsiki yar-abingunaidi, bela Demar-Gagbidye-nugad gued, Jordán-diwar-nakase. Dad-nakwed-argan-sapiledsik-yar-abingunaidi, Jordán-diwar-nakagi-sukun-siidgi onoded.

⁶ Geb Bet-Hoglaʼba nakwided, degi Bet-Arabá-dad-nakwed-argan-sapiledsik namaid, Rubén-machi-Bohánʼye-nugad-e-akwase warmakmaid.

⁷ A-sorbali, Acor-nebagan-akar, Debirʼse nakwided, geb dad-nakwed-argan-sapiledsiki Gilgalʼsik aibirided. Gilgalʼde Adumín-nakwemaid-asabin, dian-dad-nakwed-argan-nuedsik siid. Geb sorbali, En-Semes-dii-saila-siidgi namaid, geb Rogel-dii-saila-siidse warmakmaid.

⁸ We-yar-abingunaidi, Jebuseo-neggwebur-dad-nakwed-argan-nuedsik Ben-Hinom-nebaba namaid. Jebuseo-neggwebur, Jerusalénʼye nugbalid. Geb sorbali, Hinom-neba-dad-argwanedsik, Refaim-neba-dad-nakwed-argan-sapiledsik yar-mullu-siid-birgi nakwided.

⁹ A-yar-mullu-birgi-akar, yar-abingunaidi, Neftoa-diisaila-siidsik namaid, degi Efrón-yar-birgi-neggwebur-bukwadse warmakmaid, geb Baalaʼse aidemaid. Baalaʼde, Quiriat-Jearimʼye nugbalid.

¹⁰ Geb Baala-akar, we-yar-abingunaidi, dad-argwanedsiki Seir-yar-siidsik aibirided. Dad-nakwed-argan-sapiledsiki, Jearim-yar-e-dikargi namaid. Jearim-yardi, Quesalónʼye nugbalid. Geb A-yar-akar, yar-abingunaidi, Bet-Semesʼsik aidemaid, degi Timnaʼgi namaid.

¹¹ Geb sorbali, dad-nakwed-argan-sapiledsiki Ecrón-yar-mulluganba namaid. Geb Sicrónʼsik aibirided, Baala-yar ebirided, degi Jabneelʼse warmakmaid. Yar-abingunaid-e-igar Demar-Dummadye-nugadse bergunaid.

¹² Napidgi, dad-argwanedsik-yar-abingunaidi, Demar-Dummadye-nugad-e-gaka gued. Wemala, Judá-waganga na e-dadgan-e-dadganba yar-uklesad-e-abingunanaid gumalad.

Caleb Hebrón-neggwebur, degi, Debir-neggwebur susad

¹³ Bab-Jehová ega igar-uksadba, Josué Jefone-machi-Calebʼga, Judá-waganga-yar-uklesad-abargi, Quiriat-Arba-neggwebur ega uksad. We-Quiriat-Arbaʼde, Hebrónʼye nugbalid. Arbaʼde, Anac-e-bab-gusad, dulemar-masdummagan e-dad.

¹⁴ Caleb, Hebrón-neggweburgi Anac-e-wagan-walapaa onosad: Sesai, Ahimán, degi, Talmai.

¹⁵ A-sorbali, Caleb, Debir-dulemarse bila-ononad gusbalid. Iduale, Debir-neggwebur Quiriat-Seferʼye nuganad.

¹⁶ Geb Caleb sogded: “Dule, Quiriat-Sefer-dulemargi-nakwisale, degi, e-neggwebur-susale, an-sisgwa-Acsa na ebo nikuega an ega ukoed.”

¹⁷ Geb degine, Cenaz-machi-Otoniel, Caleb-e-niga neggwebur-susa gusad. Geb Otoniel Acsa-nikusad.

¹⁸ Otoniel-negse nasokarmargua, Otoniel e-ome-Acsaʼgi alamaknai gualid: “Ibmar-digega, be-babse be nainu egisye.” Geb degine, Acsa moli-uayasuid-birgi-siidgi aidesad. Geb Caleb e-sisgwase egichided: —¿Ibu be abege?

¹⁹ E-sisgwa abin-sogded: —Wis be anga ibmar-soggwen udage. Ar be anga Neguev-yargi nainumar uksasoggu, anga be dii-sailagan-bukwad udabali. Deyobi, Caleb na e-sisgwaga dii-sailagan yar-mullugi-bukwad, degi, nebagi-bukwadi ega uksad.

Judá-yar-neggweburmar

²⁰ Judá-waganga na e-dadgan-e-dadganba-yar-uklesad-abargi we-neggweburmar ega uklesad.

²¹ Dad-nakwed-argan-nuedsik, Neguevʼgi, Edom-yar-abingunaid-walik, we-neggweburmar ega uklesad: Cabseel, Edar, Jagur,

²² Cina, Dimona, Adada,

²³ Cedes, Hazor, Itnán,

²⁴ Zif, Telem, Bealot,

²⁵ Hazor-Hadata, Queriot, Hezrón (Hazorʼye nugbalid),

²⁶ Amam, Sema, Molada,

²⁷ Hazar-Gada, Hesmón, Bet-Pelet,

²⁸ Hazar-Sual, Beerseba, Bizotia,

²⁹ Baala, Iim, Esem,

³⁰ Eltolad, Quesil, Horma,

³¹ Siclag, Madmana, Sansana,

³² Lebaot, Silhim, Aín, degi, Rimón. Bela we-neggweburmar dulagwen-gakabakebak (29) mergued, degi, e-neggwebur-burwiganase-bakale, ega uklesbalid.

³³ Nebagangi, we-neggweburmar Judá-waganga uklesad: Estaol, Zora, Asena,

³⁴ Zanoa, En-Ganim, Tapúa, Enam,

³⁵ Jarmut, Adulam, Soco, Azeca,

³⁶ Saaraim, Aditaim, Gedera, degi, Gederotaim. Bela we-neggweburmar gwaambe-gakabake (14) mergued, degi, e-neggwebur-burwiganase-bakale, ega uklesbalid.

³⁷ We-neggwebur-bamalad ega uklesbalid: Zenán, Hadasa, Migdal-Gad,

³⁸ Dileán, Mizpa, Jocteel,

³⁹ Laquis, Boscat, Eglón,

⁴⁰ Cabón, Lahmam, Quitlis,

⁴¹ Gederot, Bet-Dagón, Naama, degi, Maceda. Bela we-neggweburmar gwaambe-gakanergwa (16) mergued, degi, e-neggwebur-burwiganase-bakale, ega uklesbalid.

⁴² Amba we-neggwebur-bamalad ega uklesbalid: Libna, Eter, Asán,

⁴³ Jifta, Asena, Nezib,

⁴⁴ Keila, Aczib, degi, Maresa. Bela we-neggweburmar gwabakebak (9) mergued, degi, e-neggwebur-burwiganase-bakale, ega uklesbalid.

⁴⁵ Deginbali, Ecrón-neggwebur, degi, e-neggwebur-burwiganase-bakale, ega uklesbalid.

⁴⁶ Ecrón-akar, Demar-Dummadye-nugadse bela Asdod-walik-yar-naid, degi, bela e-neggwebur-bukmalad, ega uklesbalid.

⁴⁷ Asdod, degi, e-neggwebur-burwiganase-bakale, deginbali, Gaza-neggwebur, degi, e-neggwebur-burwiganase-bakale, Egipto-diwarse, degi, Demar-Dummadye-nugad-gakagi neggwebur-bukmalad ega uklesbalid.

⁴⁸ Yalaganbali, Judá-waganga we-neggweburmar uklesbalid: Samir, Jatir, Soco,

⁴⁹ Dana, Quiriat-Sana (Debirʼye-nugbalid),

⁵⁰ Anab, Estemoa, Anim,

⁵¹ Gosén, Holón, degi, Gilo. Bela we-neggweburmar gwaambe-gakagwensak (11) mergued, degi, e-neggwebur-burwiganase-bakale, ega uklesbalid.

⁵² We-neggwebur-bamalad ega uklesbalid: Arab, Duma, Esán,

⁵³ Janum, Bet-Tapúa, Afeca,

⁵⁴ Humta, Quiriat-Arba (Hebrónʼye-nugbalid), degi, Sior. Bela we-neggweburmar gwabakebak (9) mergued, degi, e-neggwebur-burwiganase-bakale, ega uklesbalid.

⁵⁵ Amba we-neggwebur-bamalad ega uklesbalid: Maón, Carmel, Zif, Juta,

⁵⁶ Jezreel, Jocdeam, Zanoa,

⁵⁷ Caín, Gabaa, degi, Timna. Bela we-neggweburmar gwaambe (10) mergued, degi, e-neggwebur-burwiganase-bakale, ega uklesbalid.

⁵⁸ Deyobi, amba we-neggwebur-bamalad Judá-waganga uklesbalid: Halhul, Bet-Sur, Gedor,

⁵⁹ Maarat, Bet-Anot, degi, Eltecón. Bela we-neggweburmar gwanergwa (6) mergued, degi, e-neggwebur-burwiganase-bakale, ega uklesbalid.

⁶⁰ Deginbali, we-neggweburmar ega uklesbalid: Quiriat-Baal (Quiriat-Jearimʼye-nugbalid), degi, Rabá. We-neggweburmar-e-neggwebur-burwiganase-bakale, ega uklesbalid.

⁶¹ Nega-dulesulidganba we-neggweburmar ega uklesbalid: Bet-Arabá, Midín, Secaca,

⁶² Nibsán, Balu-neggwebur, degi, Engadi. Bela we-neggweburmar gwanergwa (6) mergued, degi, e-neggwebur-burwiganase-bakale, ega uklesbalid.

⁶³ Judá-wagan, Jerusalénʼgi Jebuseo-dulemar gwen onossurmalad. A-ulale, we-garda-narmaklenaidse, Jerusalénʼgi Judá-wagan-abargi Jebuseo-dulemar gudimalad.