Josué 13 - Kuna San Blas

2. ISRAEL-DULEMARGA YAR-MIMILESAD (13:1–21:45) Yarmar-amba yoosulemalad

¹ Josué bato nue-seredgusadgine, Bab-Jehová ega sogded: “Josué, bato be nue-seredgusad, amba bukidar yarmar yoo suleged.

² Bela Filistea-dulemar-yala, degi, Gesur-dulemar-yala an bega obared.

³ A-yardi, Egipto-yar-dad-nakwedsik, Sihor-diwar-akar, dad-nakwed-argan-sapiledsik Ecrón-yar-abingunaidse dungu naid. Ecrón-yala, Canaán-dulemargadid. A-yargine, Filistea-dulemar walatale dummaganga we-neggweburgi mamaid: Gaza-neggweburgi, Asdod-neggweburgi, Ascalón-neggweburgi, Gat-neggweburgi, degi, Ecrón-neggweburgi. ”Deginbali, dad-nakwed-argan-nuedsik Aveo-dulemar-e-yala amba yoo sulebalid.

⁴ Amba bela Canaán-dulemar-e-yala yoo sulebalid. A-yala, Sidón-dulemar-Meharaʼgi-bukwad-akar onoalid, Afecʼye-neg-nugadse, Amorreo-dulemar-e-yar-abingunaidse bergunaid.

⁵ Deginbali, Giblita-dulemar-e-yar, degi, bela dad-nakwedsik-Líbano-yar-naidi amba yoo sulebalid. A-yala, Hermón-yar-nakwedsik Baal-Gad-akar onoalid, Hamat-dogedse bergunaid.”

⁶ Bab-Jehová Josuéʼga sogdebalid: “An-sunnad Israel-dulemar-wagab bela dulemar-yalaganba-bukwad, Líbano-akar, Misrefotmaimʼse, an onioed. Deginbali, an bela Sidón-dulemar onibaloed. ”Ar bedi, ar igi an bega igar-uksagusa, deyobi Israel-dulemarga be we-yar mimioed, adi, na egadga imakmalagar.

⁷ Degisoggu, we-yarmar Israel-dulemar-dadgan-dummagan-bakebakad-e-wagan (9) yoo-yar-sumaladga, degi, Manasés-wagan-negabaladga be mimioed.”

Jordán-diwar-dad-nakwedsik-yar-mimilesad

⁸ Manasés-wagan-baid-negabalad, Rubén-wagan, degi, Gad-wagan, Jordán-diwar-dad-nakwedsik yar-egadga guega, bato Bab-Jehová-e-mai-Moisés iduar ega yar uksa gusad.

⁹ A-yala, Arnón-diwar-gakaba Aroer-neggwebur-siid-akar, Dibónʼse dungued. Deginbali, yarmar-imbagi-neba-naidgi neggwebur-siid, degi, bela Medeba-neba-naid, a-yaryaba dogarbalid.

¹⁰ Deginbali, Amorreo-dulemar-e-rey, Sehónʼye-nugad, Hesbónʼgi dummadga-maigusad bela e-neggweburmar, wemarga uklesbalid. Rey-Sehón-e-yala, Amón-dulemar-yar-abingunaidse dungued.

¹¹ Deginbali, wemarga Galaad-yar uklesbalid. We-yala Gesur-dulemargadid, degi, Maaca-dulemargadid. Bela Hermón-yala, degi, bela Basán-yala Salcaʼse, wemarga uklesbalid.

¹² We-yala, Basán-e-rey-Og Astarotʼgi, degi, Edreiʼgi dummadga-maigusad e-yalanad. We-Ogʼde, Refa-dule napi besa gusadid. Moisés we-dulemargi nakwis gusad. Deginbali, Refa-dulemar na e-yargi-bukwadgi Moisésʼse onolesbalid.

¹³ Ar Gesur-dulemardi, Maaca-dulemardi na e-yargi-bukwadgi Israel-dulemarse gwen onolessurmalad. We-garda narmaklenaidse, we-dulemar Israel-yargine amba gudimalad.

Moisés, Israel-dulemarga yar-mimisad

¹⁴ Moisés, Leví-wagangardi yar-egadga-guega yar-uksasulid. Ar ade, Israel-e-Bab-Dummad-Jehová-e-dulamar-ibmar-ogumakar-ukedi, Leví-wagangadid. Ar weyobi Bab-Jehová Leví-waganga sogsagusad.

¹⁵ Moisés, Rubén-waganga na e-dadgan-e-dadgan-merguedba yar uksa gusad.

¹⁶ A-yala, Arnón-diwar-gakaba Aroer-neggwebur-siid-akar Hesbónʼse dungued. Deginbali, yarmar-imbagi-neba-naidgi neggwebur-siid, degi, bela Medeba-neba-naid, a-yaryaba dogarbalid.

¹⁷ Hesbón, degi, bela neggweburmar-nebagi-bukmaladi, a-yaryaba dogarbalid: Dibón-neggwebur, Bamot-Baal-neggwebur, Bet-Baal-Meón-neggwebur,

¹⁸ Jahaza-neggwebur, Cademot-neggwebur, Mefaat-neggwebur,

¹⁹ Quiriataim-neggwebur, Sibma-neggwebur, Zaret-Sahar-neggwebur. Zaret-Saharʼde neba-yar-mullugwadgi siid.

²⁰ Bet-Peor-neggwebur, degi, Bet-Jesimot-neggwebur. Deginbali, Pisga-yar-billimar-nakwemamaidi, a-yaryaba dogarbalid.

²¹ Bela neggweburmar-nebagi-bukmalad, degi, bela Amorreo-e-rey-Sehón Hesbónʼgi dummadga-maigusad-e-yala, a-yaryaba dogarbalid. Moisés we-Rey-Sehónʼgi, degi, Madiánʼgi dummaganga-negdakmamaigusadgi nakwisad. A-dummagan, wemalad: Evi, Requem, Zur, Hur, degi, Reba. Bela we-dummagan, Sehónʼba-nanai gusmalad. Madián-yalagi mai gusmalad.

²² Israel-dulemar bila-onolesadgi dulemar-bukidar es-suidgi oburgwismalad. Beor-machi-ner-Balaamʼye-nugadse-bakale oburgwismalad.

²³ Jordán-diwar Rubén-wagangala e-yar-abinguedga gunonikid. Iduar-neggweburmar-bilesad, degi, e-neggwebur-burwiganase-bakale, na egadga-guega Rubén-waganga na e-dad-e-dadganba ega uklesad.

²⁴ Moisés, Gad-waganga na e-dadgan-e-dadgan-merguedba yarmar uksagusmogad.

²⁵ Gad-wagan-yaryabali, wemar dogaled: Jazer-yalagan, bela Galaad-yargi neggweburmar-bukmalad, Amón-dulemar-e-yar-negabar, Rabá-asabin neggwebur-Aroer-siidse.

²⁶ A-yala, Hesbón-neggwebur-akar, Ramat-Mizpaʼse, degi, Betonimʼse naid. Nadbalid, Mahanaim-neg-naid-akar, Debir-yar-abingunaidse.

²⁷ Nebagine, Bet-Aram, Bet-Nimra, Sucot, Zafón, degi, Hesbón-e-rey-Sehón-e-yar-napi-besad, Gad-waganga uklesbalid. Degisoggu, Gad-wagan-e-yala, Jordán-diwar-dad-nakwedsik-akar onoalid, Cineret-demar-dad-nakwed-argan-nuedsikidse bergunaid.

²⁸ Iduar-neggweburmar-bilesad, degi, e-neggwebur-burwiganase-bakale, na egadga-guega Gad-waganga na e-dadgan-e-dadganba ega uklesad.

²⁹ Moisés Manasés-wagan-negabaladga na e-dadgan-e-dadgan-merguedba we-yarmar uksagusad:

³⁰ Mahanaim-akar, bela Basán-neg-naid. We-neg-naidi, bela Rey-Og-negdakmaigusad yalad. Deginbali, bela Jair-neggwebur-burwigana gwadulapaa-bukwadse-bakar (60), ega uklesbalid.

³¹ Manasés-machi-Maquir-wagan-negabaladga na e-dadgan-e-dadgan merguedba, Galaad-yar-negabar uklesad. Deginbali, Basán-e-Rey-Og negdakmai-gusad-e-neggweburmar Astarot, degi, Edrei, ega uklesbalid.

³² Moisés Moab-nebagi-gudigu, Jordán-diwar-obakar, Jericó-neggwebur-dad-nakwedsik, we-yarmala mimisad.

³³ Degi-inigwele, Moisés, Leví-wagangardi, yar-egadga-guega yar uksasulid, ar ade, Israel-e-Bab-Dummad-Jehová-sunnad Leví-waganga unniguar ibmar-ukdii guoed. Ar weyobi, Bab-Jehová Leví-waganga sogsagusad.