Jonás 2 - Kuna San Blas

2. JONÁS, UA-SABANYABA-MAI, BAB-JEHOVÁʼSE GOTED (2:1-10)

¹ Geb degine, Jonás ua-sabanyaba-mai, e-Bab-Dummad-Jehováʼse goted.

² Ega sogded: “An dummad-wilenaidgi, an bese gochad. An bese gochagua, be an-itononikid. Bato an burgwarmalad-neg-gullugi-mai an gochad. Agi, Bab-Jehová be an-bendaknonikid.

³ Demar-wilasolase, dii-ulak be an-barmeted. Be-demar-ebilemaid, bela angi nasad. Be-demar-dummagan-nukamakmaidi, bela angi bipirmaksad.

⁴ Weyob an binsanonikid: Bab-Jehová nue an-obachasunye. Degi-inigwele, an gannar ese-goled-neg-swilidikidsik an nabaloye.

⁵ Bela diimar dukarse an-ebiris-nagusad, demar-wilasailad bela an-ebirisad, demar-gaganmar an-nonogi bela bipirmaksad.

⁶ Bela-bela demar-napa-ulubse an megdapid. ¡Bato an napa-ulubgi-mellesigua, gwen bar noed an itossulid! Degi-inigwele, be an-Bab-Dummad-Jehová-gued, an gulluba-mellesiidgi be an-onononikid.

⁷ ”An na nue-burgwe-itogua, Bab-Jehová, an begi binsaded, agi an bese goted. An-bese-goled, bese mosad, bese-goled-neg-swilidikidse warmaksad.

⁸ ”Dulemar-bab-dummaganse-gormaladdi, Bab-Dummad-e-sabgued gwen bai daksurmalad.

⁹ Andina, an weligwar-namakedgi, an bega ibmar-ogumakar ukoed. An bega ibmar-imakoye ise-sogar an sogsad, an imakedsegoed. ¡Bab-Jehová, unnila bebi sunna dule-abonoged!”

¹⁰ Geb agine, Bab-Jehová Jonás-onogegala, ua-dummad-agega imaksad. Geb neg-dinnagwadgi ua agsagua, Jonás neggunasse nononikid.