Job 9 - Kuna San Blas

Job-sunmaksad-irbaagwad

¹ Job, deyob Bildad-sunmaksad-itosgua, weyob abin-sogded:

² “An nue-wisimakar-inigwele, we nue-napiragwa, degite, ¿igi dule Bab-Dummad-asabin isgussuliyob na san-oyogosunna? Gege dule na deyob san-oyoged.

³ Ar dule Bab-Dummad-ebo gachimakye-sogele, gwen dule Bab-Dummadgi, nakwissuliled.

⁴ Ar Bab-Dummad binsaed-ibed maid, e-gargangued dutusulid. Degisoggu, ¿ar doa-dule, Bab-Dummadgi obichar be ebinsasunna? Dule egi obichasuliled.

⁵ Ar Bab-Dummad uludele, yar-dummagan-bukwad onired. Yar-dummagan bato ainirisbin daklenonidaed.

⁶ Bab-Dummad napneg-naid ogiglimaked, degi, napneg-e-sailagan-mamaid ogiglimakbalid.

⁷ Bab-Dummad dad-ibeler-mer-noega imaked, niisgwamar mer-bar-gaega imakbalid.

⁸ Bab-Dummad na e-ganguedba nibneg nasiksad, degine, Bab-Dummad bogi demar-sabalid.

⁹ Bab-Dummad bela niisgwamar danar-danaled nasiksad: Niisgwa-danaled-Osaʼye-nugad, niisgwa-danaled-Oriónʼye-nugad nasiksad. Degi, bela niisgwa-danaled-Pléyadesʼye-nugad-naguega imaksabalid. Bela dad-nakwed-argan-nuedsik niisgwa-danar-danar nasiksabalid.

¹⁰ Ar Bab-Dummad ibmar-dummagan-magar-itolesulid imaked, degine, bukidar ibmar-gegerdaklemalad-geg-ebisleged imaked.

¹¹ Ar Bab-Dummad an-nagaba nadapye-sogele, an daksasuliled. Angi bangudye-sogele, an itossurbaliled.

¹² Bab-Dummad ibmar-suye-sogele, ¿doa ega sogoe: ‘Mer be suye?’ ¿Doa ega sogoe: ‘Ibu be imaknaiye?’ Dule ega soged, sate.

¹³ Ar Bab-Dummad uludele, ibdula-dummad-demargined, degi, e-sordaganse-bakale, Bab-Dummad-asabin dulluu ambikumalad.

¹⁴ ”Ar deyobile, degite, ¿igi an Bab-Dummad-abin-imakosunna? An abin-imakegala, ¿igi an sogsale? Geg an abin-imake.

¹⁵ Amba an ibmar-akar-imaksasuli-inigwele, Bab-Dummad-asabin geg an san-bendaked. Ar unnila an Bab-Dummadse ise-wilegar bendakleged an egised.

¹⁶ Ar an Bab-Dummadse igar-itogega gorye-sogele, degine, anse nonikile, gwen an-itosar an ebinsasulid.

¹⁷ Aka bur angi burwa-dummadiyob yolenonikiled, aka bur an-naibid-itodiid anga omelonai gualiled.

¹⁸ Gwen obunnogega an-imaksasuliled, aka bur wile-itoged anga omelononikiled.

¹⁹ Ar garganguedgi sunmakleye-soglegele, Bab-Dummad bur bule emarba gargangued nikad. Ar Bab-Dummadga igar-itoleye-soglegele, ¿doa igar-itoleged-abarse Bab-Dummad-ogwichosunna?

²⁰ Amba an ibmar-akar-imaksasurye sogele, an-sunmaked angi dukin aibinnonikoed. Amba an innikigudiiye-sogele, Bab-Dummad nosadga an-imakoed.

²¹ ”Ar an ibmar oakalossur-inigwele, degite, Bab-Dummad amba deyob angi binsasulid. A-ulale, an burgwebigussunnad.

²² Ar bela dulemar emarbiid, degisoggu, an sogdo: ‘Ar Bab-Dummad dule-nued, dule-isgana obeloged.’

²³ Ar boni-gwensak ukiagwar dule-oburgwenonikile, an sogdo, Bab-Dummad, dule-ibmar-oakalodisulid-surbinsa-itogedga allesii guoye.

²⁴ Dule-isgana yar-ganonikile, Bab-Dummad dule-igar-nabomalad igar-noar-imakmalaga imaked. Ar Bab-Dummad weyob-imaksulile, degite, ¿doa imaksunna?

²⁵ ”An-ibagan-bergued bato mosad, an-ibagan binna-binnagwad bar abarmaksisulid. Weligwaled an gwen-itogosuli an-ibagan bergudoed.

²⁶ An-ibagan, ur-binnasur-nadapiyobi, nadapid. Sulubagi e-masbina-gwichigumaiyobi, an-ibagan gued.

²⁷ Amba an sogdibe: ‘We-ibmar-nabir-an-itodisulidi, an iegoye. An-wagar-wile-itoged, an ogwaoye, an alledii guoye,’

²⁸ degite, an bela-bela-nunmaked-itodiidba, amba an dobe itodaed. An wisbalid, ar Bab-Dummad-asabinni, amba an ibmar-oakalossuliyob daklegosulid.

²⁹ Ar an ibmar-oakalosye soglesoggu, ar ¿ibiga bar an alamaknai guosunna? Binsarsunna bar an alamaknai guo itole.

³⁰ Amba an-uka an dii-diregwadgi ise-enukye-sogele, morgaukgi an-argan dagur-dagur an imakye-sogele,

³¹ amba Bab-Dummad, ibmar-isgana-milegedse an-bar-meteled, ar an-mormarse-bakale, ima an-itosaled.

³² ”Ar Bab-Dummaddi anyobsulid, andi dule gued. Degite, ¿igi an igar-nabolegedse Bab-Dummad-sedosunna? Gege an seded, ar Bab-Dummad dulesulid.

³³ Ar anmarga-igar-nabogega igar-naboged-dule, wargwensaar gudisulid.

³⁴ Ar Bab-Dummad-angi-urwenaid-osulogega, dule-wargwensaale, gudisulid. Adi, mer an Bab-Dummad-e-urwed dobguegar.

³⁵ Aisaar an dobsuli sunmakbienad, geg an gued, ar an dobe itoged.”