Job 8 - Kuna San Blas

Bildad, Jobʼga sunmaksad

¹ Súah-neggweburgined-Bildad, Jobʼga sogded:

² “¿Ar sanagwadse weyob be sunmakmai guoe? Be-sunmakedi, burwa-dummad-noedyobi be sunmaked.

³ Bab-Dummad-Bela-Gangued-Nikadi, ¿ibmar-inniki-maid oichogo be ebinsasi? Bab-Dummadi, ¿ibmar-inniki-imaklegedgi yolego be ebinsasi? Gege yoleged.

⁴ Ar be-masmala, Bab-Dummadgi yolesmalargebed. Ar degubinne Bab-Dummadse nabir odurdaklesmalad.

⁵ Bab-Dummad-Bela-Gangued-Nikad be baramiele, ega be sogele, wile be an-dakye,

⁶ be islidik-gudiile, be ibmar akar-imakdisulile, Bab-Dummad be-bendakoed. Bega gannar ibmar-iduar-nikusadi ukoed.

⁷ Ar yoedse be ibmar-nikuoedi, ibmar-nikusadba bur bule be nikuoed.

⁸ ”Dadganse be nue ibmar egise, be-babgan-ibmar-bar-amismaladi, be durdake.

⁹ Ar anmardi geb emicharmaladid, gwen we-ibmar wissurmalad. Anmar we-napneggi-gudiidi, unnila an sikwas gudimalad.

¹⁰ Ar we-dulemardi sunna be-odurdakoed, ibmar-bukidar-wisguega be-imakoed. E-ibmar-wismalad bega sogoed.

¹¹ ”Gagan-papiroʼye-nugad neg-matagangi-dungumaladi, ega neg-mata dingudele, ¿sunna dungusi? Gagan-diigi-dungumaladi, ega dii-dingudele, ¿sunna dungusi?

¹² Ar we-gaganmala, amba aramaksiile, degi, amba siklessuli, ega dii-dingudele, yog-dinguar naddaed. Gagan-bamaladba bur bule itosur dinguddaed.

¹³ Dulemar Bab-Dummad-ieddamaladi, we-gaganmaryob gumalad. Dule-isganamar na e-ibmar-edarbediidi degibergudoed.

¹⁴ Dule-isgana e-ibmar-edarbediidi ega dub-garagwadyobi gued. E-bensulid-nikadi, dibamaryob baisursunna e-ibe berguddaed.

¹⁵ Ar dule dibagi akaye-sogele, gege egi akaed, ar yoga-itirar naddaed. Debayobi, e-bensulid-nikadi ega yoga-berguar naddaed.

¹⁶ Dule-isganamar, sapi dad-duurmaknaid-abin-gwichiyob gued. E-anagan-nasgudele, bela napagi-gagan-naid odukued.

¹⁷ Degine, e-malimar akwa-imbaba uboddaed, sabsur-akwagangi e-malimar diglesdaed.

¹⁸ Ar dule we-sapi-olasale, dulemar gwen egi bar binsaosurmalad, we-sapide wegi gwichidaeddeeye.

¹⁹ Deyobi, dule-isganamar weligwar-itodiid berguddamogad, e-sorba baigan dunguardaed.

²⁰ ”Bab-Dummad gwen dule-innikidaed iedisulid, degine, dule-isganadi ese obanledaed.

²¹ Bab-Dummad gannar yeer-itogega be-imakoed, degine, yeer-itogedbali be binnasuli gordii guoed.

²² Dule-isdar-be-dakdimaladi, binge-gudii gumaloed, degine, dule-isdarmalad-e-neguyamar bela bergudoed.”