Job 7 - Kuna San Blas

¹ Job sogdebalid: “Ar dule we-napneggi bela arbamalargebed. E-ibagan, dule-undar-arbadiid-e-ibaganyob gued.

² Igi maigagudiid gwae-neg-mutikgusana gadinye binsadidae, igi dule-arbadiid e-bennukleged-iba edarbedidae,

³ deyobi, an nii-irbali wile-itodii gusad, mutikidbali nunmakedba an galitodii gusad.

⁴ An mutikidba megisale, an binsamaidaed, sana anga neg oibogodibeye. Mutikid anga bergusurdaed. Deyobi, an bindumakmai gabsuli oiboardaed.

⁵ Bela an-san nus biinid. An-uka sommere-sommere itoleged. An-uka-daas-dasadba sibudik-sibudik nis ariomamaid.

⁶ An-bergued-ibagan binna-binna nadapsulid, e-ibagan omosad. Gwen an bar-gannarsegued itosulid, bato an bela itoged.

⁷ ”Bab-Dummad, be ebinsao, an-gudiidi, unnila bunnolegedyob an gudiid. Neg-nued bar an dakosulid.

⁸ An bergudele, dulemar gwen bar an-dakosulid. Be an-amidii gumaloenad, be an-amiosurmalad. Ar andi bar gudii guosulid.

⁹ Igi mogirmar aisakiddae, gwen bar dakleddasuli, debayobi, dule neg-uangi-digledele, geg bar gannar noed.

¹⁰ E-negse geg gannar bar aibired, bar egi binsalegosulid, deyob yoggudoed.

¹¹ ”Degisoggu, an sunmakedi gege bar an boggued. Nue-bukib-binsaed sunmakega an-imaked. Neg-nued-dakdisulid-abalagi an ibmar sogoed.

¹² ¿Demargi ibdula-dummad-gudiiyob be an-daksi? Emide, be angi nakulebukwad.

¹³ Imbagwenar an binsaardaed: ‘An gabidele, we an-bendakoye. Gabedi, anga naibid osulogoye.’

¹⁴ Amba an gabmaidibe, be an-ogwayeardaed, gabgi gwayed-dummadi be anga ukdaed.

¹⁵ Bur an-gammu-gasmarsunnana gadin, adi, an-gudiidi bar an itogosulid.

¹⁶ An-gudiidi, nabir an gwen itosulid, bar an dula-gudii gubisulid, burgwisa an binsaed. Ies be an-imake, an wegi-gudiidi gwen-nabirsulid.

¹⁷ ”¿Wede dule ibusunna, bede dummarbaa imaked? ¿Ar ibiga duleba be bukib binsae?

¹⁸ ¿Ar ibiga be bane-bane egi be atakdii? ¿Ar ibiga be bane-bane wilubdakdibali?

¹⁹ Bab-Dummad, ¿sana be angi-nakulediid iegoe? Wis gwen be an-indaksulid, gwen wii-doega be an-imaksulid.

²⁰ Ar an begi nosye-sogele, ¿igi an-isguedde be-imakosunna? Ar be dulegi nakuleged gudiid. ¿Ibiga be sabsur an-imake? ¿Isdarsunna be an-dake?

²¹ Bab-Dummad, ¿ibiga geg be an-isgued elisunna? ¿Ibiga geg be an-isgued ies imaksunna? Bato an-burgwed omosad. Bato an napaga binyesokalid. Be an-amidagoenad, bato satebin be an-dakdagoed.”