Job 6 - Kuna San Blas

Job e-aimar-abin sunmakded

¹ Degine, Job ega-sunmaknaid-abin weyob sogded:

² “An-naibi-itodiidi, an-wiles-itodiidbogwa, nabir nibirgi-aidolegena nuedinad.

³ Ar nabir-aidolegena, demar-ukubba bur bule aidikueled. An-sunmakedi bemar geger itogewilubsulid.

⁴ Ar Bab-Dummad-Bela-Gangued-Nikad-e-sigumar naibi-an-imaksad. E-sigu-bonimar, bela an-sangi gwichigunonikid. Bab-Dummadi dobed-dummadi anga barmialid.

⁵ Moli-uayasuidi gagan-dikarba-gunaile, ¿masbina bonaidae? Moli-bebe-nikadi, e-mas-bukwad-dikarba, ¿masbina bonaidae? Suli. Deyobsuli.

⁶ ¿Ar mas balu-sulile, nued-gulle be ebinsae? Suli. Nued gullesuli. ¿Ar gannir-akwa-e-sipugwadi nued gulle be ebinsae? Suli.

⁷ An bonigan-abganaid-abesulidi, emide, an-masga gunonikid.

⁸ ”Bitigi Bab-Dummadi, an-ibmar-egisnaidi, anga imaksana gadin. Bitigi Bab-Dummadi, an-ibmar-abegedi, anga uksana gadin.

⁹ Bab-Dummad ilagwen an-obelosunnana gadin, an-oburgwedse an-imaksunnana yeerban.

¹⁰ Ar adi, anga bonigan ibnuedga gusaled, an yeer-itosaled. Ar Bab-Dummad-isligwaledgi an yolessurgusad.

¹¹ ”Bato an bela gudisoggu, ¿ibu bar an edarbosunna? ¿Ibiga bar an gudii guosunna?

¹² ¿Ar an akwayob gangusi? ¿Ar an-ukade, esgoro-gordikidyob gangusi?

¹³ An wargwen geg na dukin bendaked, an-bendakmalad bela bergusad.

¹⁴ ”Dule-naibi-itodidbela, e-ai ega-gwage-armaked nikad. Amba dule-Bab-Dummad-Bela-Gangued-Nikadba-dasulidbela, e-ai-egi-bangusulid nikamogad.

¹⁵ Ar bemardina, an-aimar-inigwele, be baisur an-dakdemalad. Ar diwar-dinguddaeyobi, degi, noddabaliyobi be damalad.

¹⁶ Ar dii-gwamakar-bukwad daludele, dii-amuregedga naddae, degine, diwar engudedae, deyobi, be gumalad.

¹⁷ Ar igi yor-mosale, diwar-dinnamaile geg bar iirmake, degi, neg-uedikidbali bela dinguddae, deyob, be gudmalad, baisur be an-dakdemalad.

¹⁸ Dulemar-danagwen-dummad-nadapdamaladi, e-igar-nadapidgi aibatele, nega-dulesulidganba yogguddamalad, agi burgwiddamalad.

¹⁹ Temánʼginmalad-danagwenmaladi, dii-amiegala naddamalad, Sabá-neggweburginmalad-ibmar-ukmaladi, na binsadamalad, bitigi dii an amisana gadinye.

²⁰ Dii-nue-amio-itosmalanad, degi-inigwele, dii-dinna-mai dakdapmalale, nabir-itoardasurmalad.

²¹ Debayobi, bemar gudmarmogad, ibmar-gacharsuli-dakebayobi be angi gwakidmalad.

²² ¿An bemarse ibmar egichasi, wis be anga ibmar udamarye? ¿An-bendakmalaga an bemarse mani egichisbarsi? Suli.

²³ ¿An bemarse gochasi, an-isdarmaladgi be an-bendakdamarye? ¿An bemarse egichisbarsi, dule-sabsur-emar-imakmaladgi be an-bendakye? Suli. An bemarse ibmar egichissulid.

²⁴ ”Be anga sogmardo, ibugi nodii be an-dake. Ar an nodiile, bar an sunmakosurdo.

²⁵ Bemar innikigwadba be anga ibmar sognaina, an bemar-abin isdar itogosulinad. Emide, be yogasaar angi sunmaknanaid.

²⁶ Mer an-sunmakedba be angi yolemala, ar an surbinsa-itogedba an deyob soged. We-ibmar-an-sogedi bela bergudoed.

²⁷ An be-dakedi, sunna be dule-sergan-sated ibmargi-dodoar-wilubdakar be uksamalar an be-dakdo, degine, bemar sunna ibmarbina be-ai be uksamalar an be-dakbardo.

²⁸ ”Nue be ise-nuu an-dakmala. Be anga sogmala, bule an bemarga gakansanai.

²⁹ Be nue itomala, mer yogasaar be angi yolemala. An ibmar-oakalodisulid, be magar an-dakmala.

³⁰ An-bemarga-ibmar-sogedi, gakansulid. ¿Ar an napira-ibmar-sogedi, gakansaed-ebo emarbi-dakye be angi binsamarde? Suli, degisuli.”