Job 40 - Kuna San Blas

¹ Bab-Jehová, Jobʼga sunmakdebalid, weyob ega sogded:

² “¿Ar dule Bab-Dummad-Bur-Biriginedgi-urwenaidi, gan-bipigi Bab-Dummad-osioye binsasunde? Ar degite, we-dule, Bab-Dummad-abinsado.”

³ Geb Job, Bab-Dummad-abin sunmakded, weyob sogded:

⁴ “¿Igi an be-abin-imakosunna? Ar an dule-nuedsulid. Geg an be-abin-imaked.

⁵ Bato ilagwen an sunmaksabinned, bar an sunmakosuli. Bato an ibmar sogsabinned, bar an gannar-gannar ibmar sogosuli.”

Bab-Dummad-e-gangued-oyolenaid

⁶ Bab-Jehová burwa-gammuba Jobʼga sunmakded. Weyob ega sogded:

⁷ “An-abin, machered na be san-imako. Be an-odurdakega, emisgi ani an bese ibmar egisgwelo.

⁸ ”¿Be an-ibmar-inniki-imaked be osulosunnode? Na be sogega, bedi ibmar inniki-imakdiiye, ¿aga be angi gwisgusunnode?

⁹ ¿Be-surgande an-surganyob gangude? Ar be-sunmakedde, ¿an-sunmakedyob gangu-sunmakde?

¹⁰ ”Ar deyobile, be-gangued-yeerdakleged be oyodo, be-ganguedba be-nug-dummarba be imakdo. Be-gangued-yeerdakleged be oyodo, bela-bela be-yeerdakleged be oyodo.

¹¹ Be-isdarsun-itodiid mer be bargae, dule-san-dummarba-itodimalad be dake, mesagwar be imake.

¹² Dule na san-bule-bule-imakdiid be dake, a-dule be obingegsae. Dule-isganamar bia gudii be dakalir, bela be obeloge.

¹³ Bela we-dulemar be dige-dige imake, napa-urba ise digar be imake.

¹⁴ Ar deyob ibmar-saele, magar an be-dakodo, be dule-buledye, be-ganguedgine be bendakleged amiye.

¹⁵ ”Be dakena, ibdula-Behemotʼye-nugad, moli-bebe-nikadyob unnila gaganbi maed, igi an be-obinnisa, deyob an we-ibdula obinnismogad.

¹⁶ We-ibdula-e-garganguedi bela e-sorgargi, degine, e-saderba siid.

¹⁷ E-bunnu urwaryob banamaked, e-dua-gasimar yeer gangu nikabalid.

¹⁸ E-gar-nikadi esgoro-gordikidyobi nikad, e-nagmar esgoroyob-gangue nikad.

¹⁹ ”An ibmar-durgan-obinnisad-abargi we-ibdula emargi obinmaid. An we-ibdula oburgwebiele, sunna an oburgwed.

²⁰ Sapurmar-nanaidi, ega masgunned uked, a-sapurgi ibdurganmar ichomakdididamalad.

²¹ We-ibdula negsichigi obunnomaidaed, masar-matagan-imbaba dukumaidaed.

²² Sapimar-urba obunnomaidaed, gaganmar-mata-imbaba gudidaed.

²³ We-ibdula diwar-noalile, gwen bai itodasulid, diwar-Jordán e-gayase ubomaile, gwen bai itodasulid.

²⁴ ¿Doa we-ibdula nuu-e-dakmai gaoe? ¿Doa ega asu udkoe?”