Job 4 - Kuna San Blas

Elifaz Jobʼga sabsur-ibmar-sogsad

¹ Elifaz Temán-neggweburgined, weyob Jobʼga sogded:

² “Job, an bega ibmar-sogoedi, be isdar-itogodibe, degi-inigwele, an bega ibmar sogergebed.

³ Emide, be emar-bukidar odurdakdidaed, be emar-niga-ogannodidaed,

⁴ be-sunmakedgi wile-itodimalad-ogannodidaed, degine, be dule-gege-itomalad-bendakdidaed,

⁵ degite, emisgindi, begi bonigan-yolenonikidi geger be itoged. Bonigan begi obin na be itoged.

⁶ Ar Bab-Dummadgi be dobekwaa gudiiye-sog-inigwele, degite, ¿ibiga be Bab-Dummadgi bensunna? Na be nued gudiiye-binsadiidde, degite, ¿igi be gudsunna?

⁷ ”Nue be itogena: Ar dule ibmar-oakalodsulile, ¿sunna we-dule oburgwiledasi? Dule ibmar-inniki-imakdiile, ¿sunna we-dule oakaloledasi? Suli.

⁸ Bato an nue neg-daksamogad, ar dule ibmar-isgana-imakdidibe, ibmar-isgana egi aibined.

⁹ Ar Bab-Dummad dule-isganagi-uludele, unnila e-bunnogedgi sunna oburgwed.

¹⁰ Amba achumigur-nono-wawaad uludele, degi, e-mimmigan uludmogale, e-nugarmar bibisgoed. Bab-Dummad deyob dule-isgana-imakoed.

¹¹ Ar igi-achumigurmar, mas-satedba burgwiddae, degi, e-mimmigan banna-banna aineba duurmakdedae, Bab-Dummad deyob dule-isgana-imakoed.

¹² ”Gayaburba-gwensak anse arbakee nonikid, unnila an sikwas-bollee itosad.

¹³ Deunni, mutiki dulemar bela gabmamaigua, negburgan an dakalid, agine, an sulibinsa-itoalid,

¹⁴ angi dobed-dummad nagunonikid, an wawanmakded, bela an-niga batided.

¹⁵ Ibmar-burba an-ebus an itononigu, bela an-abagan iko-iko itonaded.

¹⁶ Agine, geb an-asabinni duleyob gwisgunoniki an itoged, e-daklegeddi aku dakleged. Gwisgunonigu, bela neg boo nagunonikid, e-sunmaked sikwas-soge an itoged:

¹⁷ ” ‘¿Ar dule Bab-Dummadba bur bule innikidaed nikasi? ¿Ar dule we-napnegse-e-odenonikidba bur bule dule-islidikga gusi?

¹⁸ Ar Bab-Dummadi, e-maiga-gudimaladginbela bengudiid. Ar Bab-Dummadi, e-baliwiturmarbela egi yole daked.

¹⁹ Degisoggu, dulemargin-bulesunna, dulemardi unnila napsa gued, dule ukub-birgi neg-soblessiidyob gued, samuyob baisursunna abulemaladid.

²⁰ Wakdaradbali, nued-gudii gued, sedogidbali, bato bergus gued. Unnila dulemar sikwas wis-dula gudii gued. Ar burgwidele, bar dulegi binsalegosulid, deyob dule yoggudoed.

²¹ Na e-mormar-nikad bela e-ibe miledoed, gwen binsaed-nikagussuli burgwidoed.’ ”