Job 36 - Kuna San Blas

Eliú-sunmaksad-ilabakegwad

¹ Eliú sunmakdebalid, weyob sogded:

² “Ar an Bab-Dummadgi amba an nued bega ibmar-soged-nikasoggu, mer be budar itogo.

³ An-bela-bela-nue-ibmar-wisid an bega oyogwelo. Abali an bega oyogoed, Bab-Dummad-an-obinnisadi innikii ibmar imakmaiye.

⁴ Inniki an bega soged, bega an gakansaosulid, an be-asabinni dule-binsaed-ibed gwichid.

⁵ ”Bab-Dummad dule-gandikidid, dule-ibmar-oakalodisulid obandisulid. Bab-Dummad gandikidid, bela magar neg-itomaid.

⁶ Bab-Dummad dule-isgana gudiguega imaksulid. Dule-wiledimaladgardi igar nabiroged.

⁷ Bab-Dummad dule-nuegan nue-akwed, dule-nuegan reymar-abargi-sigega imaked, degine, dule-nuegan-nugmar odummoged.

⁸ Ar we-dulemar esgaryagi-sigega galenonikirdi, wile-itoged egi dognonikirdi,

⁹ Bab-Dummad we-dulemarga e-isgusad ega oyonaido, degine, ega oyonaibardo, na san-dummarba-imakedbali igi-isgusmala.

¹⁰ Degidbali na magar itomaloed, wede Bab-Dummad ega sunmaknai, be nue-nanamarye, ibmar-isganagi be bangumarye.

¹¹ Ar we-dulemar Bab-Dummadba ibsaele, Bab-Dummadga arbadele, e-burgwedse nasgumai gumaloed, weligwar-gudii gumaloed.

¹² Ar Bab-Dummadba ibsasurmalardi, wisguosuli ukiagwar es-suidgi burgwenonimaloed, binsaedsulidbali burgwenonimaloed.

¹³ ”Dule-isganamar na sae-itodamalad. Amba Bab-Dummadse sabsur-odurdaklenaile, bipisaale bendakleged egisdasurmalad.

¹⁴ Bab-dummaganse-goled-neggi-dule-gambasamalad-burgweyobi, nuchukwaa burgwiddamalad.

¹⁵ Bab-Dummad dule-wiledimalad e-wilediidgi bendaked. E-nunmaked-itodiid, baisur-itogega imaked.

¹⁶ ”Job, ar Bab-Dummad bonigangi be-bendakoed, neg-nuedse be-ogwisgunonikoed, bega mas-nuegan ena be-mesegi urboed.

¹⁷ Emide, dule-isganamar-wilubdaklegedyob be gunaisunnad, igar-nabolegedse be gales gunaisunnad, igar-inniki-imaklegedse be odurdaklegega gunaisunnad.

¹⁸ ¡Degisoggu, nue salak! Abakalegi be manibina surbinsa itodager, manise be binsaed-galenai gudager, ese be baklenai gudager.

¹⁹ Be mani-ibedguedgi be bendaklegosulid, be-garganguedgine be bendaklegosurbalid.

²⁰ Neg-mutikid be edarbedii gudager, mer abdako. Ar mutikidba dulemar obeloleged.

²¹ Nue salakar. Mer be gannar ibmar-isgana-imakedgi binsao. Ar be ibmar-isgana-imakdigusadba be wilesad.

²² ”Bab-Dummad na e-ganguedba gannarba maid. ¿Dule Bab-Dummadyob dule-odurdaked-saila gudii? Sate.

²³ ¿Doa Bab-Dummadga sogoe, ibiga be deyob ibmar imaknaiye? Gege dule Bab-Dummadga weyob sogbalid, noar be ibmar-imaksaye.

²⁴ Bab-Dummad-ibmar-imaked be gatik-ogannogo, ar namaklegedba we-ibmar-ogannolenai gusad.

²⁵ Bela dulemar Bab-Dummad-ibmar-imaksadi dakmalad. Ar dulemar dikasuli Bab-Dummad-ibmar-imaksadi sunna bela dakmalad.

²⁶ Bab-Dummad dule-dummad-maisoggu, degidbali, gege anmar e-daed baramied, e-birga-nikadi gege anmar wisgubalid.

²⁷ ”Bab-Dummad anmarga dii barmimaid, dii-wiedbali diwar-enguega imakmaid.

²⁸ Mogirmar-dii-owiega imaked, bela-belad dulemargi dii-owiega imaked.

²⁹ ¿Doa wisguoe, ibiga mogirmar nanae? ¿Doa wisgubaloe, mar-gollalile bia noardae?

³⁰ Bab-Dummadi, demargine mar-gaedi barmied, degidbali, magatiba demar-naid magar-daklege imaked.

³¹ Bab-Dummad bela dulemar-yar-baid-baidgi-bukwamalad semaid, mas-bukib ega ukmaid.

³² Bab-Dummad mar-dakarmakmaid e-argangi gaed, bia mar-odebie, na e-sogedba mar-odeged.

³³ Mar-goled Bab-Dummad-maid oyoged, mar-goledi, Bab-Dummad-sae-itogedi oyoged.”