Job 35 - Kuna San Blas

Eliú-sunmaked-ilapaagwad

¹ Eliú sunmakdebalid, weyob sogded:

² “Job, nabir ibmar-sognaiye be sogsunde, bede soged: ‘Bab-Dummadba bur an ibmar innikii imakdiiye.’

³ Emisgindi, be Bab-Dummadga weyob sogbalid: ‘¿An isguye sogele, akarsi? An-isguedde, ¿igi-be-imaksunna?’

⁴ Job, degiir nabir, an bega ibmar soggwelo, be-aimarga an ibmar sogmogwelo.

⁵ Niba be atakena, nue nuu be dakena, mogir-naid be dakena.

⁶ Ar be isguye-sogele, ¿ibugi be Bab-Dummad oakalogosunna? Ar be ichesur isgudisogele, gwen be Bab-Dummad-oakalogosulid.

⁷ Ar be nued-ibmar-imakdiiye sogele, Bab-Dummadga ¿ibu be ukosunna? Ar Bab-Dummad egi ibmar-nued amiosulid.

⁸ Ar be ibmar-isgana imakdibe, be ibmar-nued imakdibe, unnila be-abargi-gudimaladi, beba wilegoed.

⁹ ”Ar neg nue-isgusnaisoggua, dulemar na bendakleged amidimalad. Dule-bulegan-emar-wionaidgi-noegala, bendakleged egisnanaid.

¹⁰ Degi-inigwele, dule gwen sogsulid: ‘Bia Bab-Dummad-an-obinnisad nadye. Mutikidba an-niga-ogannoardaedi,

¹¹ ibmar-durganba, bur ibmar-wisi-anmar-imakedi, ¿bia nadsunye? Sikwimarba bur binsaed-nued-anga-ukedi, ¿bia nadsunye?’

¹² Ar dulemar Babse gornanai-inigwele, dule-isganamarsoggu, na san-odummogedginbi binsadimarsoggu, a-ulale, Bab-Dummad we-dulemar-abin-imaksulid.

¹³ A-ulale, Bab-Dummad-Bela-Gangued-Nikadi, binsarsunna-ibmar-egisnanaid itosulid, Bab-Dummad a-dulemar baisur-daked.

¹⁴ Amba be sogdibe: ‘An Bab-Dummad daksurye,’ degi-inigwele, amba be-igar itolegedsegad, degisoggu, be Bab-Dummad-edarbedsegad.

¹⁵ Bede soged, ‘Bab-Dummad wissur-urweye, wissur-emar-sabsur-odurdakye, degine, ibmar-isgana baisurdakye.’

¹⁶ Job, be yogasaar sunmaked, binsa-ee-be gwichid, binsaedsuli be sunmaked.”