Job 29 - Kuna San Blas

4. JOB GEBE-IDUAR-GUDIGUSADGINE SUNMAKNAID (29:1–31:40) Job iduar-gudigusad obarnaid

¹ Job gannar sunmakdebalid, weyob sogded:

² “Bitigi Bab-Dummad-nue-an-akwedigusad-ibagan-nasadyobi, gannar an gudigusana gadin.

³ Ar negsichiganba dobsuli an gudidaed, ar Bab-Dummad gwalluyob an-idudidaed.

⁴ An sapingwaunni, amba an gannarba-gudidaeunni, Bab-Dummad nued-angi-binsaedba an-neguya mer akarguega imakdaed.

⁵ ”Bab-Dummad-Bela-Gangued-Nikad anba gudidaeunni, an-mimmigan an-ebiris gudidaed.

⁶ Deyob-gudiidgine, an-mesegine wilub-obicha mas an nikagudaed. Olivo-gwallumar e-akwa-eguredgi wilub-obicha ariomaidaed.

⁷ Igar-itogegala, neggwebur-e-yawagak-noedse an signadele, dule-igar-nabomalad-abargi an signadele,

⁸ sapingan, yog-ainiar an-iduar imakdamalad, sergana, yog-gwichibin an-abin imakdamarmogad.

⁹ Dule-nuga-nikamaladi, bogi-ambikusdamalad, bar-sunmakdasurmalad. An-abin e-gaya gasa imakdedamalad.

¹⁰ Dummadga-negdakmamaidse-bakale, an-asabinni binnasdikii sunmakdedamalad, imbagwenale bar-sunmaksurdamalad.

¹¹ Dulemar an-sunmaked itodmalale, nued angi sunmakdamalad. An-dakdemalale, an-nug ogannoddamalad.

¹² Dule-wilegana, anse wiledanikile, an bendakdaed. Sergan-sated, an bendakdabalid. Ar dule-e-bendakmalad sated.

¹³ Dule-na-bela-itodimaladi, angi ise-nued binsadamalad. Omegan-ei-sui-burgwismalad, an yeer-ito imakdabalid.

¹⁴ An gusgu igar-innikigwad an imakdaed, an igar-sogmaidba ibmar imakdaed. An we-ibmar-imakedi, mor-nued-yoeyobi anga gudaed, gurgin-nued-sieyob anga gudaed.

¹⁵ Dule-aku-atakmaladga e-ibyayobi an gudii gusad. Dule-yaku-yaku-nanamaladga, e-maliyobi an gudii gusbalid.

¹⁶ Dule-ibmar-abesa-gudimaladga, an e-babyobi gudii gusad. Dule-yar-baidsikmaladi, an bendaksabalid.

¹⁷ Dule-isganamar-e-gangued an obelosdabalid. We-dulemar, bar emar-wiogega an imaksasulid.

¹⁸ ”An weyob binsadii gualid: ‘Undar an gudii guoye, an-neggi nuedgi sereddii an burgoye.

¹⁹ Andi sapi-diwar-naba-gwichiyobi gued, sapi-anagan boo-mutik-batedgi-obgwichiyobi an gued.

²⁰ An-nug-dummarba-maid berguosurye, an-gargangued berguosurye,’ an binsadii gualid.

²¹ ”Dulemar an-sunmaked-itodmalale, ise-itogar bukusdamalad. Bogidikgi an-binsaed-uknaid itosigisdamalad.

²² An-gayaburba-sunmakedi nue yeer itodamalad, dule gwen an-abin-imakdasulid.

²³ An-sunmaked edarbedidamalad. Igi dii-wied-edarbeledae, deyobi, an-sunmaked-edarbedidamalad.

²⁴ An dulemarga allee gualile, geger an-dakdamalad. An-ega-allee gusale, e-niga ganguddamalad.

²⁵ Ani an ega igar oyodaed, ibi-igarba namaloe, degi, ani an idumaidaed. Rey e-sordamar-abargigudiiyobi, an emar-abargi gudidaed. Dule-gwage-naibi-itodiid-baisur-itoge-imakedyob an gued.”