Job 26 - Kuna San Blas

Job, Bildad-abin-sogded

¹ Job Bildad-abin weyob sogded:

² “¿Weyob be dule-gegudiid-bendaksunde? ¿Weyob be dule-nollogudiid nue-bendakye be sogsunde?

³ Ibiyobi dule-ibmar-wissulidga binsaed-nued-uke an be-dake. Ibiyobi nue-binsaed-nikaye na be san oyoge.

⁴ ¿Doa weyob-sunmakedgi be-odurdaksa? ¿Doa weyob sunmakega be-imaksa?” Bildad, Job-abin-sogdebalid:

Bildad, Job-abin-sogdebalid

⁵ “Dule-burgwarmalad demar-wilad-urbali-mamaidi, Bab-Dummad-asabinni, wawanmakmaid.

⁶ Burgwarmalad-meged-galumar bela Bab-Dummad-asabinni, magar daklemamaid. Burgwed-igar Bab-Dummad-asabinni, dukumaisulid.

⁷ Bab-Dummadi, bela nibneg-naid neg-olloledgi nasiksad, napnegdi, ibmargi-akanaisuli nasiksabalid.

⁸ Bab-Dummadi, mogirmargi dii nasiksabalid, Bab-Dummadi, mogir nabir dii-bargae imaksabalid.

⁹ Bab-Dummadi, nii-dalunaid-eduegala, irwa mogir nasiked.

¹⁰ Bab-Dummadi, magatibali demargi igar-maiyob imaksad, adi, nabir neg-ibgined, neg-mutikidgi bachiki-nai guegar.

¹¹ Bab-Dummad-urwed-abinni nibneg-bargamaladi, dobedbali wawanmakdedamalad.

¹² Bab-Dummadi, e-ganguedgi demar-uurmaked obogileged. Bab-Dummadi, e-ibmar-wisidbali ibdula-Rahabʼye-nugad ese ibitosad.

¹³ Bab-Dummadi, e-bunnogedgi mogir oaisakied. E-argangine, ibdula-dummad-demargined oitoged.

¹⁴ We-ibmar unnila-sikwas Bab-Dummad-e-gangued oyonaid. Anmar unnila-sikwas, Bab-Dummad-e-gangued itonaid. ¿Doa Bab-Dummad-e-gangued bela magar itogosunna? Dule gege magar itoged.”