Job 24 - Kuna San Blas

¹ Job sogdebalid: “¿Ibiga Bab-Dummad-Bela-Gangued-Nikadi, dule-isgana-odurdakleged-iba nasiksuli? Adi, dule-Bab-Dummadba-nanaimalad dakmaloenad.

² Dule-isganamar nainu-suegala, nainu-dikar-abingunaidgi dogdedamalad, degine, molimar-atursasmalad akwedidamalad.

³ Sergan-satemalad-ibe moli-uayasuid susdamalad. Ome-ei-sui-burgwisad-ibe ibmar-ganikid-anar moli-bebe-nikadi susdamarbalid.

⁴ Dule-isganamar dule-wilemalad-igarba-abingualir, e-idu ainirmalaga imaked, e-dobedba e-idu dukumalaga imaked.

⁵ Dule-wilemalad, moli-uayasuid-sapurbalidyobi wakudaryalaba negsulidganba masbina gudidamalad. Nega-dulesulidganba e-mimmiganga mas amied.

⁶ Dule-wilemalad emar-nainuganse ibmar-obichad-weegala, naddamalad. Dule-isganamar-e-uva-nainugi uva-san-babatisad weenai damalad.

⁷ Dule-wilemalad mutikgusale, morsurmaladbali uka-swana megiddamalad. Atued-sulidbali dambed-abalagi neg-oiboardamalad.

⁸ Yalaganba dii-wiedba waradik gudidamalad, dukued-sate gudidamalad, unnila akwa-imbaba dukubukwadamalad.

⁹ Dule-isganamala, goe-bab-sated e-nan-annik sumalad. Egi-mani-ganikid-anar dule-wilemalad-ibe mimmigan sudamalad.

¹⁰ Dule-wilegana mor-satedbali, uka-swiri gudidamalad. Emar-nainugi ibmar-gwag gwaada semaidamalad. Degidbali, ukudbali burgwiddamalad.

¹¹ We-dule-wilegana, olivo-gwallu-egurega e-naged-akwa obipirmaknagusdamalad. Uva-e-nis-onogegala egi annanagus damarbalid, degi-inigwele, ukudmaada gunanaidba burgwiddamalad.

¹² Neggweburgine dule-burgwedanimamaid-e-akiginned magar itoleged. Dule-undar-naibigusmalad aisaar Bab-Dummadse bendakleged egisnaidamalanad, degi-inigwele, Bab-Dummad gwen bai dakdasulid.

¹³ ”Gwenna-gwenna dulemar igar-nued abedasurmalad, isdarsunna dakdamalad. Igar-innikigwadba nanabisurdamalad, ibmar-isgana-imakdiid magar itosurmalad.

¹⁴ Dule-emar-gindaked dule-wilemalad-oburgwega, degi, ibmar-abesa-gudimalad-oburgwega, oibosayala gwisguardaed. Neg-mutikgudele, dule-ibmar-atursaedga binyiddabalid.

¹⁵ Dule-galagwensuli-e-omesulidbo-nanaed neg-mutikgued edarbedidaed, weyob sogdidaed: ‘Dule gwen an-dakosuli.’ Deyob dukuakwaa gudidaed.

¹⁶ Dule-ibmar-atursaed mutikidba emar-negse dogdaed. Neg-ibgindina e-negyaba dukumaidaed. Isdar neg-ibgined dakdaed.

¹⁷ Bela we-dule-isganamargala, neg-ibginedi mutikidyob gued. Neg-mutikid-neg-galagwensur-guardaed bur abedamalad.”

Zofar, Jobʼgi gaya-egwannonikid

¹⁸ Zofar weyob sogded: “Dule-isganamar dii-iirmakmaiyobi gwae-gwae wakitedamalad, e-nainu-naidi nue-ukabsales naid. A-ulale, gwen dule e-uva-nainugi gannar bar arbabidasulid.

¹⁹ Igi dad-dummad-gaedi, neg-diopisulidi, boo-batenaid berguega-imake, deyobi, dule-isgudimaladi burgwedse berguddamalad.

²⁰ Dule-isganamar-bergudele, e-nangan bar egi binsaosulid. Amar napa-urba-dogdele, nus-masga gudoed. Dulemar gwen dule-isganamargi bar binsadii guosurmalad. Igi sapimar olaledae, deyobi, gumaloed.

²¹ Dule-isganamar ome-geg-mimmi-baked, sabsur-imakdidamalad. Degi, omegan-ei-sui-burgwismalad-sabsur imakdidamarbalid.

²² Degi-inigwele, Bab-Dummad e-garganguedba dule-isganamargi yoleged. Bab-Dummad uluddibe, dule-isganamar geg abin gwisgued.

²³ Bab-Dummad dule-bulegan-dobsuli imaked, degi, egi bensuli imaked, degi-inigwele, Bab-Dummad amba we-dulemargi nakuleged.

²⁴ Amar-e-nug unnila sikwas odummoleged, yog-berguar naddaed. Dule-isganamar oros-welegeyob gumalad, gagan-gummakeyob gummakmalad, yoga-berguar naddaed.

²⁵ ”¿Doa anga sogosunna, an-sunmaknaidi gakanye? Dule gege anga soged, we gakanye.”