Job 22 - Kuna San Blas

Elifaz, gannar Jobʼgi yolenaigusad

¹ Agine, Temán-neggweburgined-Elifaz, Job-abin sogded:

² “Dule-gwensak binsaed-nikarbadibe, ¿Bab-Dummadgala ibnuedga gue? Suli. Dule-deyobid na dukin ega ibnuedga gued.

³ ¿Be-innikidaedgi Bab-Dummad-Bela-Gangued-Nikad ibmar-nued amisi? Suli. Ar gwen ibmar-nued egi amisulid. ¿Be-nued-nanaedgi Bab-Dummad ibmar-nued amisi? Suli. Ar gwen ibmar-nued egi amisulid.

⁴ ”Ar Bab-Dummad sabsur bega ibmar-sognaile, degi, bega igar itonaile, ar be e-dobegudiidbarsulid.

⁵ Ar be-isgued-doggus-merguedba, degi, be-isgued-bargalesulidba, deyob be-imaknaid.

⁶ Be-gwenadgan bese ibmar-egisdanidibe, gwen be ibmar-abesulidgi, gandikidgi, e-ibe ibmar-anar, mor be susdaed. Dule-wilemalad-ibe mor bela be susdaed, uka-swana be metedaed.

⁷ Dule-ukudmaad-gudimaladga, gwen gobed be ukdasurbalid. Dule-masbina-gudimaladga, be gwen mas ukdasurbalid.

⁸ Be dule-buled megissoggu, dule-nainu-ibed be megissoggu, be binsasanad, ani an napa-ibedye.

⁹ Omegan-ei-sui-burgwismaladga, gwen ibmar-uksasuli be barmiddaed. Sergan-satemalad-ibe be ibmar bela susdabalid.

¹⁰ A-ulale, emisgindi galesnaiyob be itoged, ukiagwar nue-dobe be itoardaed.

¹¹ Negsichidgi-gudiiyob be itoged, a-ulale, ibmar-daksuli be-imaked. Diwar-dummadse-selemaiyob be itoged.

¹² ”¿Bab-Dummadi nibneggi maisursi? ¡Be dakena! Niisgwamar-dikasurnanaid matusuli begi nanaid.

¹³ Emide be soged: ‘Bab-Dummad, ¿ibi wissunna? ¿Bab-Dummad sunna negsichid-abalagi emar-wilubdaksi?’

¹⁴ Be sogbalid: ‘Mogirmar Bab-Dummad-idu bipirmaknaiye, mogir-gudureged ebirisnaiye. Agala, Bab-Dummad gege anmar-dakye.’

¹⁵ ”Dule-isganamar-galagwensuli-nanasmaladba, ¿be nanamogode?

¹⁶ Be ebinsao, we-dulemar nuchukwagwadgi burgwisgusmalad, diwar-dummadba ibmar-selegedyobi bergusmalad.

¹⁷ Aka Bab-Dummadga sogdegusmalad: ‘Mer be anmarse gorye, Bab-Dummad-Bela-Gangued-Nikad, ¿ibu be anmarga imaksunnoye?’

¹⁸ Bab-Dummad ega ibmar-nuegan-ukdii gusanad. Andina, dule-isgana-e-binsaed-isganaba binsaed-galeged, sate.

¹⁹ ”Dule-nuegan, dule-isganamar-ibitonanaid-daksagua, yeer-itosmalad, dule-ibmar-oakalodisurmalad egi dododmalad, sogdemalad:

²⁰ ‘Anmar-isdarmalad burgwismalad, e-ibmar-nikad soose bela ei-gummaksad.’

²¹ ”Job, Bab-Dummad-urbaligwa be nanae, ebo be igar nudake, Bab-Dummad gannar ibmar-nikuega be-imakoed.

²² Bab-Dummad-e-sunmakmaid be nue abingae, e-igar-durdakleged be-gwagegi nue-sedii be gue.

²³ Bab-Dummad-Bela-Gangued-Nikadse be gannar wilesakwaa atakdedibe, be-neguyagi ibmar-isgana be obangusbardibe, bela be nugunonikoed, weligwar be gunonikoed.

²⁴ Be or-nuegan-nikadi napagi be miele, Ofir-e-ormar diwar-akwamar-imbagi be miele,

²⁵ Bab-Dummad-Bela-Gangued-Nikad be-or-nuedga gunonikoed, Bab-Dummad be-mani-nuedga gunonikoed.

²⁶ Bab-Dummad-Bela-Gangued-Nikad yeer-ito be-imakoed. Bab-Dummad-asabinni bar be bingeguosulid.

²⁷ Bab-Dummadse be gotele, be-itogoed. Bedi ega ibmar-imakoye-sogsad be imakedsegad.

²⁸ Be ibmar-imaksokalile, bega ibmar-nueganbi gudoed. Be-iduale gwallu-ganaiyob bega neg-nagunonikoed.

²⁹ Bab-Dummadi, dule-san-dummarba-imakdiid, san-bipii imaked. Dule-na-san-bipi-imakdimalad-e-nugdi, odummoged.

³⁰ Bab-Dummadi, dule-ibmar-oakalodisurmalad bendaked. Be dule-innikidaedba Bab-Dummad be-bendakoed.”