Job 16 - Kuna San Blas

Job e-aimar-abin-imakded

¹ Job Elifaz-abin weyob sogded:

² “We-ibmar bukidargus an weyob itodanikid, bemar-ibmar-soged gwen an-bendaksulid.

³ ¿Ar bemar-yogasaar-sunmaked geg bergumarsi? ¿Ar ibiga geg bemar an-ies imakmala?

⁴ Ar bemar an-gunaiyob be gunanaimogana, an bemarga deyob sunmaksamogaled. An bemargi-yolelega, gaya-nueganbi bemarga sunmaksamogaled. Bemar-wiledakeyob an bemarga nono-ege-ege imaksabaliled.

⁵ An-sunmakedgi an bemar-ogannosmalaled. Bemar ibmar-nunmak-itodimaladi, an-sunmakedbali gadi-gadi be itosmalaled.

⁶ ”Ar an sunmaknaid gwen an-bendaksulid, ar gwen anga ibmar-nunmak-itonaidi osulosulid, ar an sunmaksurbalile, gwen anga surgusurbalid.

⁷ Bab-Dummad napiragwadba an-obelosad, an-neguyaginmaladse-bakale bela obelosad.

⁸ Bab-Dummadse nue an galesgunaid, nue angi yolesgunaid. An-uka-dunnumakega an-ibe imaksad, degisoggu, garagus an dakleged.

⁹ ”Bab-Dummad nue anse urwed, an ese balegillenaid, nue-ibitos itoleged. Achu-angi-nugar-oyonaiyob gunaid, e-isdaradga an-imaksad.

¹⁰ An-isdarmalad angi dododmalad, an-wagar ogotemalad. We-dule-isdarmalad buladik angi yoledmalad.

¹¹ Bab-Dummad dule-isganamarse-ibitogega an-imaksad, dule-gakansamaladse ibitogega an-imaksad.

¹² Iduardina, an bogidik gudiinad, emisgindi, Bab-Dummad nue an-wiosad, dukar-walaba an-ganonikid, saga-saga an-imaksad. Bela-bela angi yolenonikid.

¹³ E-sigu-mimalad nue an-ebirisad, e-sigumar, an-sabangi sabe-sabe-yolenonisulid, bela an-samurmar, napase yaarmakded.

¹⁴ Bia an naibigusa, agi gannar angi yolenonidaed, bila-onoged-duleyob angi gwisgunonikid.

¹⁵ ”An-naibi-itodiid-oyogegala, an wile-itoged-mor-yonai gualid. Napayala an gudii gualid.

¹⁶ An boedba an-wagar ginnitibigusad, an-ibyamar-dakleged guduregus dakleged.

¹⁷ Degi-inigwele, an dule-emar-sabsur-imakedsulid, Bab-Dummadse innikigwadgi an gordiid.

¹⁸ ”Ar an burgwenonisundibe, napnega, an-ibmar-oakalossulid-barsognai gusana gadin.

¹⁹ Ar dule-an-barsogoedi nibneggi maid. Nibneggine, dule-an-ular-sunmakoedi maid.

²⁰ Ar an-ai an-irwa-goledid, an an-ai-asabin ise-boar an gunaid,

²¹ adi, an-ai an-ular Bab-Dummadse golegar. Ar igi dule na e-ai-bendakega sunmake, deyobi, an-ular sunmakegar.

²² Bar an birga-suitii naosulid, an-burgwed-ibagande, bato mosad. Gwen an bar aibirosulid.”