Job 13 - Kuna San Blas

Job san-bendakded

¹ Job sogdebalid: “Bela bemar ibmar-sogsamaladi bato an itosad, bato an we-ibmar daksad.

² Ar bemaryopira an wismogad, gwen be angi obinsurmalad.

³ Bur an Bab-Dummad-Bela-Gangued-Nikadbogwa an sunmakbied, Bab-Dummadbogwa an-igar bur an nudakbied.

⁴ Ar bemardi unnila gakansamaladid, ina-durgan-ibmar-wissurmaladyobi be gumalad, gwen an-bendaksulid.

⁵ Ar bemar wis boo ambikuele, degidba, bemar binsaed-nikagued oyosmalaled.

⁶ Emisgindi, nue an-sunmaked itomalo, an-ibmar-bega-soged-nikad be itomarmogo.

⁷ ¿Bemar Bab-Dummad-nuggi gakansaode? ¿Gakansaedgi bemar Bab-Dummad-bendaknaimarye sogode?

⁸ ¿Ar bemar ega ibmar-nued imaknaiye binsasunde? ¿Ar bemar Bab-Dummad-bendakmaladye sogmarsunde?

⁹ Ar Bab-Dummad bemar-wilubdaknonikile, ¿igi be gusmalale? Ar bemar dulemargi-dodolegeyob, ¿Bab-Dummadgi be dodomarye sogmarsunde? Gege bemar Bab-Dummadgi dodoged.

¹⁰ Ar bemar arbakee dule-wargwenbi bendakbigualile, Bab-Dummad bemargi sabsur-gwichigusaled.

¹¹ Ar Bab-Dummad-e-gargangued-yeerdakleged be-ogwayenonimalaled. Bemar e-abinni bela-belad gwayidmalaled.

¹² Ar bemar binsaed-nued-nika-sunmakedi binsaledid, bemar-ibmar-sognaidi gwen gangued nikasulid.

¹³ ”Mer bar sunmakmala, an sunmakmogwelo. Ar igi an-guoe, ar deyob an guodo.

¹⁴ Ar an naibigubier, an naibiguodo, bar san-bendaklegedgi an binsasulid.

¹⁵ Ar Bab-Dummad an-oburgwebiele, an-oburgodo. An bendaklegodeeye, bar an binsasulid, bato an bela gudiid. Unnila Bab-Dummad-asabinni, an-gudiid na barsogoed.

¹⁶ Ar Bab-Dummad na e an-bendakoedid. Ar dule-isganadi, Bab-Dummad-asabinni gwen gwisgunonikosulid.

¹⁷ ”An-binsaed nue itomalo, an-ibmar-sognaid be nue itomalo.

¹⁸ An-sunmakoed bato guakwaa an ilemaksad. Bato an wisid, Bab-Dummad ibmar-oakalossuli an-daknonikoed.

¹⁹ Ar dule-angi-yoleged-nikardina, bar an golosurdo, an burgwed-edarbesunnodo.

²⁰ ”Bab-Dummadye, ibmar-sogbo an bese egised. Ar we-ibmar be anga ukele, an bar begi dukuosulid:

²¹ Soggwengi: Mer bar be sabsur-an-odurdako. Sogbogi: Mer bar be sabsur-an-ogwayo.

²² Na san-bendakegala, be-asabin-gwisgudagega be anse gole, adi, nabir an be-asabin sunmakoed. Be anse gorsulile, an-inse an bega sunmakodo, geb bee be an-abin-imakoed.

²³ Be anga soge, ibugi an begi isgusa, ibu ibmar-isganamar an imaksa, biti-be-igargangi an annasa, ibugi an begi yoledii gusa.

²⁴ Bab-Dummadye, ¿ar ibiga be angi dukue? ¿Ar ibiga be-isdaradyob be an-dake?

²⁵ Ar andi gagan-dinnagana burwaba-seledaedyob gued. Degisoggu, ¿ibiga be an-obelobisunna?

²⁶ Emide be, nunmaked-dummad-itogega be an-imaknaid. Sapingwaun an ibmar-isgana-imaksad-ular, ¿deyob be an-imaknaisunde?

²⁷ Sepo-yaba be an-nag-odosad. Bia an nadesogele, bela be angi nakuleged, an-nag-gannarmarba be angi nakulediid.

²⁸ ”Dule urgo-nunguddaeyob berguddaed, mor udubiin-gusar-bergudaedyobi, dulemar berguddaed.”