Job 11 - Kuna San Blas

Zofar-sunmaknaid

¹ Naamat-neggweburgined-Zofar Jobʼga sunmakded, ega sogded:

² “¿Ar be we-ibmar-sognaidi, abin-imaklegosurde? ¿Ar we-dule gadi-sunmakedba, nodisuliyob daklegode? Sulirgebed.

³ ¿Bela-we-ibmar-soglesad-abin anmar gaya-maklegode? ¿Dule-be-abin-imakosulidba emargi-dodogoye be soge? Gege be emargi dodoged.

⁴ Emide, be soged: ‘An-ibmar-soged innikigwadye, Bab-Dummad-asabinni an ibmar-oakalossurye.’

⁵ Bitigi Bab-Dummad begi gwichigunonikina gadin. Bitigi begi sabsur-sunmaknonikina yeerban, yeer an be-daksaled.

⁶ Ar Bab-Dummad binsaed-nikadba bega ibmar sogoed. Ar we-igar-dukuarmamaid akusunna itoleged. Agi, be geb magar Bab-Dummad-be-odurdaknaidi, be itosaled, be-isguedba bur bule, be odurdaklegewilubbinye.

⁷ ”¿Sunna be Bab-Dummad-e-ibmar-burbar-mamaid wisguosi? ¿Sunna be Bab-Dummad-Bela-Gangued-Nikad-ibmar-wisiyob be guosi? Gege be deyob gued.

⁸ Ar Bab-Dummad-e-binsaed, nibnegba obined, degite, ¿igi be wisguega imakosunna? Bab-Dummad-e-binsaed yaa-matusulidba obined. Degite, ¿igi be e-binsaed wisguosunna?

⁹ Deginbali, Bab-Dummad-e-ibmar-burbar-mamaidi, napneg-naidba bur dummadid, demar-matasuid-naidba bur bipisulid.

¹⁰ ”Ar Bab-Dummad esgaryase be-metedibe, degine, igar-nabogega bese gollarbardibe, ¿doa ega sogoe, mer deyob be imakye? Dule geg ega soged.

¹¹ Ar Bab-Dummadi dule-yardakdimalad magasar daked, degine, e-ibmar-isgana-imaked baisur-dakosulid.

¹² Moli-uayasuid-sapurbalidgine dule gwalulenonikile, geb dule-binsaedsulidaedi, binsaed-ibedga guoed.

¹³ ”Ar Bab-Dummadga be gwage ukele, be-argan ese be onakwele,

¹⁴ ibmar-isgana-imaksadgi be banguele, geb be-neguyagi ibmar-isgana be osulobalile,

¹⁵ be bar bingeguosulid, bar be dobgudii guosulid.

¹⁶ Naibid-itodigusadgi bar be binsaosulid, ukiagwar-ibmar-gusayob be itogoed.

¹⁷ Neg-ibegwar-naiyob bega neg nagunonikoed, weligwar be itononikoed. Negsichidi, bolegoe neg-ainakwiardaeyobi bega mee nagunonikoed.

¹⁸ Ar be bendaklegoed-wissoggu, be Bab-Dummadgi bensuli-gudii guoed. Bab-Dummad be-dikarba bega nakuledii guoed, degidbali be nue-gabdii guoed.

¹⁹ Dule gwen bar be-ogwayedii guosulid, nued be obunnodii guoed. Deginbali, dulemar bese wilenonimarbaloed.

²⁰ Dule-isganamardina wakinnosulid. E-ibyamar bela akitoed. Unnila burgwed-edarbedimalad.”