Job 1 - Kuna San Blas

1. JOB NUED GUDIIDGINE, NIA-SAILA-SATANÁS, BAB-DUMMADSE IGAR AMISAD, ADI, EGA JOB-URMAKEGAR (1:1–2:13) Jobʼgi sunmaklenaid

¹ Dule-gwensak Uz-yar-naidgi gudii gusad. We-dule, dule-nuedid, dule egi-geg-akar sunmaked, we-dule Jobʼye nugad. Job, Bab-Dummad-dobekwaa nanadiid, ibmar-isgana imakdisulid.

² Job, walagugle (7) masmala nikad, bunamalabi walapaa nikabalid.

³ We-dule ibmar-nika gudii gusad. We-ibmar-durgan nikananaed: Sibad-wawaad, miligugle (7.000) nikad, moli-yargan-mureged, milipaa (3.000) nikad, moli-bebe-nikad-abin-abinnid-napa-imumalad, dulataled-ilatar (500) nikad, moli-uayasuid-omegan, dulataled-ilatar (500) nikad, degine, bukidar e-maiga-gudimalad nikabalid. We-Job dule-dad-nakwedsikidmaladba bur nug-dummarba gued.

⁴ E-masmala iba-onoardamalad. Muchub-muchubbi e-neggine, iba-onoardamalad. Iba-onoarmalale, eba mas-gundamalaga e-bunmar-warbaagwadbina gordamalad.

⁵ Iba-onolesad-sorbali, Job e-masmalase gotedaed, ese dagmalaga, adi, Bab-Dummad-asabin swilidik-gumalagar. Job, bolegoedbali e-masmala-nuggine, wala-walagwenga ibmar-ogumakar-ukleged imakardaed, ade binsadaed: “Abakale, an-masmala, Bab-Dummadgi yolesmarsuaye, e-gwagegi ichakwa binsasmarsuaye.” Job weyob bali-bali ibmar imakardaed.

Job bonigan-abingasad

⁶ Ibagwengi, baliwiturmar Bab-Dummad-asabin-ambikunonimalad. Agine, nia-saila-Satanás nonimogad.

⁷ Bab-Jehová, nia-Satanásʼga sogded: —¿Bia be daniki? Nia-saila-Satanás abin sogded: —An napneg-naid-ebirdii danikid.

⁸ Bab-Jehová ega sogdebalid: —¿An-mai-Job be daksa? ¿Igi gudii be dake? Ar we-napneggine, dule Jobʼyobid sulid. Jobʼde angi gwen yoledisulid, an-dobekwaa nanadiid, igar-isganaba nanadisulid.

⁹ Geb nia-saila-Satanás, Bab-Jehová-abin weyob sogded: —¿Ar Jobʼde, binsa be-dobekwaa nanadii be ebinsae? Binsa deyob gudisulid. Ar ega be ibmar-ukedba deyob gudiid.

¹⁰ Ar melle akarguega, be nued akwediid. Ar ega e-mimmigana be nue-sabgudibalid. Ar bela e-ibmar-nikadi, ega be nued akwedibalid. Agala, ega be bela-bela e-ibmar-imaked nasguega imakdibalid. A-ulale, Job we-napneggine, moli-bebe-nikamalad, degi, sibadmar nue-nikad.

¹¹ Napira an bega soged, ar be Job-sabsur-imakdibe, e-ibmar-nikadi bela e-ibe be osulodibe, be daksaled, ar be-asabin begi sabsuli-ulusaled.

¹² Agine, Bab-Jehová, nia-Satanásʼga sogded: —Degirdi, nabirdo. Job-bela-e-ibmar-nikadi an bega-urmaksundo. Saedba be sao. E-duledi mer be oakalogo. Agine, geb nia-Satanás, Bab-Jehováʼgi banguded.

¹³ Geb ibagwengine, Job-masmala, e-bunmarmala, e-ia-sailagined-neggi iba-onobukwa gusmalad.

¹⁴ Degidgine, dule-gaya-berbeged Jobʼse nonikid, ega sognonikid: “Molimar-bebe-nikad napa-imunaigua, dikarba molimar-uayasuid-omegan gagan-manaimogua,

¹⁵ ukiagwale atursamalad-Sabeoʼginmalad nonimalad, bela molimar-bukwad sesmalad. Dule-arbamaladdina, bela es-suidgi oburgwilesmalad. Unnila anbi an wakichad, aga nabir an bega we-ibmar sogdanikid.”

¹⁶ Amba we-dule-gaya-berbeged-sunmaknai-yoo-bergue, dule-baid nonibalid, weyob sognonimogad: “Sibad-wawaadmargine, degine, sibad-wawaad-edarbemaladgine, mala aidesad. Bela burgwismalad, unnila anbi an durgusad. Agala, an nabir bega we-ibmar sogdanikid.”

¹⁷ Amba we-dule-durgusad-sunmaknai-yoo-bergue, dule-baid nonibalid, weyob sognonimogad: “Caldea-dulemar sogapaa danar-danar ukiagwar nonimalad, bela moli-yargan-mureged-bukwad sesmalad. Dule-arbamaladdina bela es-suidgi oburgwilesmalad, unnila anbi an wakichad. Agala, nabir an bega we-ibmar sogdanikid.”

¹⁸ Amba we-dule-durgusad-sunmaknai-yoo-bergue, dule-baid nonibalid, weyob sognonimogad: “Be-masmala, degine, be-bunamala, e-gwenad-sailagined-neggi mas-gunbukmargua, degine, gobbukmarbargua,

¹⁹ ukiagwale, burwa-dummad nega-dulesulidgansik-danikidi neggi yolenonikid, bela ese neg ayarisad. Bela be-mimmigangi neg marwenonikid, degisoggu, bela burgwismalad. Unnila anbi nabir san-onosad. Agala, nabir an bega we-ibmar sogdanikid.”

²⁰ Degidgine, Job gwichibin imaksad, nunmak-itogedbali mor-dummadyoid siir imaksad, degine, e-nono swiri imaksabalid, napase dulluu imaksad, Bab-Dummad-nug odummosad.

²¹ Weyob sogded: “Uka-swiri an we-napnegse aidenonikid. Deyobi, ibmar-sate an gannar nabaloed. Ar Bab-Jehová we-ibmarmar anga uksad, emide, na Bab-Jehová, we-ibmarmar susbalid. Degisoggu, ¡Bab-Jehová-nug odummolesun!”

²² Degite, Job, weyob-ibmar-gusadgine, Bab-Dummadga sogsasulid, ibiga deyob be an-imaksaye. Job, Bab-Dummadgi gwen yolessulid.