Jeremías 49 - Kuna San Blas

Amón-dulemargi-iduakwaa-sunmaklesad

¹ Bab-Jehová weyob Amón-dulemarnik soged: “¿Ar Israel-dulemarde mimmigan satesi? ¿Ar e-sorba ibmar-gamaladde satesi? ¿Ar ibiga bab-dummad-Milcomʼde Gad-neggwebur-susa? ¿Ar ibiga Milcom-e-dulemar we-neggweburmargi mamai?”

² Bab-Jehová soged: “Ibagan dani, Rabáʼgi Amón-dulemar-bukmaladgi bila-onoleged-itolegega an imakoed. Bela e-neggweburmar bibisgoed, bela e-neggweburmar gummakoed. Israel-dulemar, dulemar e-annik neg-susmalad-annik, gannar neggwebur sumaloed.”

³ Bab-Jehová soged: “Hesbón-dulemar, Hai-neggwebur-bibichisadga be bomar. Rabá-bunamala, Haiʼga be binnasuli gormakmar. Bukib-binsaed-mor be yomar, ega be bukib binsamar. Gannar-gannar abarmakgwichi be imakmar. Ar bab-dummad-Milcom dule-irwa-ese-gormaladbo, degi, ega-arbamaladbo-galesa selesad.

⁴ Amón-dulemar, ¿ibiga be be-nebaganba san-dummarba imake? ¿Ibiga be be-nebagan-gadi-sanmakedba nug-dummarba itoge? Amón-dulemar-uayasulidaed, unnila be be-ibmar-nuegan-nikadgi-bensuli gudiid, be weyob soged: ‘¿Doa angi gwichiguoe? Dule angi gwichiguosuli.’ ”

⁵ Bab-Jehová-Bela-Gangued-Nikadi soged: “Dulemar-be-yar-nagaba-bukmaladi, be-ogwayega an imakoed, degine, be-baleginnega an saoed. Bela bemar we-yalagi onilemaloed. Dule-wakinmaloedi, dule gwen gannarse bar-urbosulid.”

⁶ Bab-Jehová soged: “Bela we-ibmar-guoed-sorbali, Amón-dulemar-gales-selesmaladi, gannar an sedagoed.”

Jeremías, Edom-dulemargi iduakwaa-sunmaksad

⁷ Bab-Jehová-Bela-Gangued-Nikadi weyob Edom-dulemar-annik soged: “¿Temán-yargi dule-binsaed-ibegan satesi? ¿Dule-binsaed-ibegan-ebinsaedde bergussi? ¿E-binsaed-nikad bela bergussi?

⁸ Dedán-dulemar, be wakinmala, gannar sorsik be namala. Yaa-ollogan matusur-bukmaladba be dukunamala. An Esaú-wagangi boni-dummad barmidsokalid, sabsur-odurdakleged-iba ega omosad.

⁹ Uvaʼmar welealile, abala obatilesdaed. Mutikidba atursaed-dule ibmar-atursanonikile, unnila e-ibmar-abegedbi na sesdaed.

¹⁰ Degi-inigwele, andina, bela Esaú-dulemar obelogoed. E-dukubukmalad an balamioed, gwen bar dukuosurmalad. E-mimmigana, e-gwenadgana, degine, dulemar-e-neg-dikarba-mamaidi, an obelogoed, bar bukwa guosurmalad.

¹¹ Be anga be-mimmi-babgan-satemalad obego, ani an bega akoed, be-omegan-ei-sui-burgwismalad, ani an bega nioed.”

¹² Weyob Bab-Jehová soged: “Sabsur-odurdakleged-igar-ega-maisurmaladbela sabsur-odurdaklesad. Edom-dulemar, be-bulesunna, ¿sunna be sabsur-odurdaklegosur be insae? Be sabsur-odurdaklegergebed, be agi wakinnosulid.”

¹³ Bab-Jehová soged: “An-nuggi an-dukin ise-sogar weyob soged: Bosra-neggwebur ukabsalegoed, isdar-daklegedga guoed, degi, mesagwar-daklegedga guoed, degine, ollobi-selenai guoed. Degisadegu, e-neggweburmar bibichis bukuoed.”

¹⁴ Bab-Jehová-gayaburba an itosad, dule-gayaburba-nued-berbegedi dulemar-abargi weyob ibmar-soge an itosad: “Be danar-ambikumar, Edomʼgi be gwichigudamar. Bila-onoged-idu be guagwar bukumar.

¹⁵ ”Edom, an, neggwebur-baiganba bipii be-imakoed, dulemar-abargi mesagwar an be-imakoed.

¹⁶ Akwasaila-dummagan-olloganba be bukwamaladi, yala-dummaganba be mamaidi, be dukin emar-ogwayedgi yamolesmalad, be san-dummarba-samaladgi yamolesmalad.” Bab-Jehová soged: “Bemar sulubagiyobi nibaduku be-neg be sismalale, amba an bemar-ibe obelogoed.

¹⁷ Edom-yala-wilegoedi, bela-belad wilegoed. Dulemar a-yar-nagaba-nasmaloedi, geger Edom-yala-wilesadi dakdamaloed.”

¹⁸ Bab-Jehová soged: “Sodoma-neggwebur-wilesadyobi, Gomorra-neggwebur-wilesadyobi, degine, neggweburmar-e-dikarba-bukmalad-wilesadyobi, Edom-yala gumogoed. Dulemar, agine gwen bar gudii guosulid, degi, dulemar egi gwen bar ambikuosulid.

¹⁹ ”Achumigur Jordán-diwar-bulaganba, gagan-nuegan-naidse nodanidaedyobi, ukiagwale, an Edom-dulemargi gwichigudagoed. Edom-dulemargi an dule-nug-imaksadi dummadga an mesoed. Ar ade, ¿doa anyobsunna? ¿Doa angi obinosunna? ¿Biti-sibad-edarbed angi gwisguosunna? Dule angi obinosuli.

²⁰ Be an-itomar. An Edom-dulemarga igar-mesisad be itomar. Temán-dulemarga igar-mesilesad be itomar: Emar-imbagi sapingan-senigana ebipiledmaloed, e-gagan-nanaidi, swanga naguoed.

²¹ Edom-neggwebur-berguoedi neg-ogiglimakoed, Demar-Ginnidye-nugadse e-gollomaked itolegoed.

²² Sulubagi sakan-nallaa-danidaeyobi Bosra-e-isdarmaladi, Bosra-neggweburgi gwichigudanikid. A-ibagangine, Edom-sorda-gandikmaladi, ome-e-boniganba-galitonaidaeyobi gumaloed.”

Damasco-neggweburgi-iduakwaa-sunmaklenaid

²³ Bab-Jehová weyob Damasco-dulemar-annik soged: “Hamat-neggwebur, degi, Arfad-neggwebur, bato garda-isgana-wisgusmaladba suli-suli itobukwad. Ar bela-belad nue-dobe itomalad, geg bogi na ambikumalad.

²⁴ Damasco-dulemar geger itogusad, aisaar wakinye sokalinad, degi-inigwele, dobedbali geg wakinne gusad. Ome-e-boniganba-galitonaidaeyobi, Damasco-dulemar dobed itobukwad.

²⁵ Ibiyobi neggwebur-nuga-nikad-idu duurmakmamai. We-neggweburde weligwar itosiidid.

²⁶ Ani Bab-Jehová-Bela-Gangued-Nikadi soged: A-ibagangine, e-sapingana, neg-imbabali, omilede guoed, degi, bela e-sorda-bila-onomaladi girgumaloed.

²⁷ Damasco-e-neg-gandikmalad an ogumakoed, Ben-Adad-negmar an obelogoed.”

Cedar-neggweburgi, Hazor-neggweburgi, iduakwaa-sunmaklesad

²⁸ Cedar-neggwebur, degi, Hazor-neggwebur, Babilonia-rey-Nabucodonosorʼse oitolesgusad. Emide, Bab-Jehová weyob we-neggweburmar-annik soged: “¡Dakebinne! Cedarʼgi be gwichigumar. Be dad-nakwe-dorgan-obelomar.

²⁹ E-ibe e-dordonegmar, e-molimar, ei sulegoed. E-ibe e-atued-dummagan seledoed, degi, e-ibmar-nuegan, e-moli-yargan-muremalad seledoed. Dulemar ega weyob oimakdemaloed: ‘Bela aineba neg-dobegwale itoleged.’ ”

³⁰ Bab-Jehová soged: “Hazor-dulemar, gwae be abarmakdemar, be gwae wakinmar, yaa-ollogan-matusur-bukmaladba be dukunamar. Babilonia-rey-Nabucodonosor bemarbina igar aminaid, bemarbina igar amisgunaid.”

³¹ Bab-Jehová soged: “Dakebinne, we-neggwebur-san-dummarba-itogedgi be gwichigunamar, amar na dukin bensuli gudidimalad. We-dulemar dobe itosulid, baisur itomalad, bannabaa bachikii mamaimalad, amargi be gwichigunamar.”

³² Bab-Jehová soged: “E-moli-yargan-muremalad ei be sumalo, bela e-moli-bebe-nikamalad ei be sumalo. E-dulemar an yogasaar oaisakioed, napa-neg-bergunaidse an barmidoed, amba bia gudimalale, bonigan an egi barmidoed.

³³ Hazor-neggwebur, achu-sapur-uaya-gannagan-negga guoed, degisadegu olloo neg naguoed. Dule-wargwensaale, egi gudii guosulid, gwen dule egi bukwa guosurbalid.”

Elam-dulemargi-iduakwaa-sunmaklesad

³⁴ Judá-e-rey-Sedequías gebe reyga megidedgine, Bab-Jehová, e-gayaburba-barsoged-Jeremíasʼga Elam-dulemargi sunmaknonikid.

³⁵ Ega weyob sognonikid: Bab-Jehová-Bela-Gangued-Nikadi soged: “Elam-e-warsi an bibisgoed, e-gangued-sunsogedi, an ei obelogoed.

³⁶ Burwa-dummagan an egi barmidoed, bela-napaneg-ebilis an egi burwa sedoed. Napaneg-ugakaase an oaisakioed. Elam-dulemar bela neggwebur-ugakaase ambikuoed, bela neggweburmargi ambikuoedbiid.”

³⁷ Bab-Jehová soged: “Elam-dulemar, e-isdarmalad-abin gwayega an imakoed, dule-e-oburgwebigudimalad-abin dobguega an saoed. An-sae-itogedi an egi oyogoed, boni-dummagan an egi barmidoed. Bila-onoleged an egi barmidoed, bela obelogedse an imakoed.”

³⁸ Bab-Jehová soged: “Elamʼgi an-ologana an sioed. Elam-e-rey an obelogoed, e-dummagana an obelobaloed.”

³⁹ Bab-Jehová soged: “Ibagan nonikoed, Elam-dulemar-gales-selesmaladi, gannar an sedagoed.”