Jeremías 4 - Kuna San Blas

¹ Ani an Bab-Jehová-guedgi bemarga soged: “Bemar Israel-dulemar, gannar be anse-dagmarye-sogele, mer bar be isgumalo. Be an-asabin ibmar-isgana-bab-dummadyob-imaklemalad-osulogele, mer bar be angi bangumalo.

² Ar gakansulidgi, igar-napiragwadgi, innikigwadgi, ‘Bab-Jehová-nuggi an ise-sogar-sogmarye,’ be sogmalale, ar degidbali, ‘dulemar-yar-baid-baidsik-bukwamaladgi anbali egi yeer binsalegoed, degine, anbali egi weligwar itomaloed.’ ”

³ Bab-Jehová weyob Judá-dulemarga, degi, Jerusalén-dulemarga soged: “Napa-ebuledisulidgi be ibmar digmala. Melle bar iko-imbaba be ibmar digmalo.

⁴ Judá-dulemar, Jerusalén-dulemar, an-bemarbo-igar-mesisadbarbi be nue-nai gumala, be-gwage-ulubgi a-igarbarbi nue-nai be gumala. Melle be-ibmar-isgana-imaksamalad-ular, an-urwed sooyobi begi-nodagega be imakmalo. An-urwed, soo-gamaiyob, dule geg oginned.” Bab-Jehová sogdebalid:

Judá-dulemar-sae-dakmaladba egi ubolesad

⁵ “Judá-yalagi, bela be sunmako. Jerusalén-neggweburgi, bela gayaburbamar be mimimar. ‘¡Bela yalamargi gar-trompeta be ogormar!’ Binnasuli gandikidba be gormakmar. Weyob sogmar: ‘Anmar danar-ambikumar, neg-gandikmaladse ubonamar.’

⁶ Sión-yarsik bander be oyomar, melle be gannaa sigmala, gwae be duurmakdemar. An bela-belad-dulemar-wiogega dad-nakwed-argan-sapiledsik boni-dummagan an barmidasokalid.

⁷ Bato achumigur-nono-wawaad gagan-imbaba nodanikid, dule, dulemar-akar-akar-bukwamalad-obeloged bato igarba danikid. Be-yala-obelogega, e-yalagi bangualid. Be-neggweburmar akwamarbi ganna-ganna ambikuoed, dulemar bar bukwasuli guoed.”

⁸ Ani Jeremías sogded: “A-ulale, wile-itoged-mola be yomar, bukib be binsamar, wile-itogedba be akiginmar, ar Bab-Jehová-bela-bela-urwedi, anmargi urwemaid.”

⁹ Bab-Jehová sogbalid: “Ani an Bab-Jehová-guedgi bemarga soged: A-ibagan warmaknonikile, rey, degi, dummagan-negsemamaid bela dobedba wawanmakdemaloed. Dule-irwa-anse-gormalad gwakidmaloed. An-gayaburba-barsogmalad geger dakdemaloed.”

¹⁰ Ani Jeremías sogded: “An-Bab-Dummad-Jehová, nue be we-dulemar yardaksad, nue be Jerusalén-dulemar yardaksad. Ega be sogsagusanad: ‘Bonisuli be gudii gumaloye.’ Emide be dakena, boni-dummaganba galitonanaid.”

¹¹ Bab-Dummad an-abin sogded: “Sabsur-odurdakleged-iba warmaknonikile, we-Jerusalén-dulemarga weyob soglegoed: ‘An-neggwebursik nega-dulesulidganba yar-mullugan-bukmalad-akar burwa-uereged gordanikid. We-burwa-gormaid ibmar-gwag-miegarsulid, degi, neg-swiri imakega gormaisulid.’

¹² An we-burwa-barmidagoedi, binnasuli goled. Ar an-sunnagwad, sabsur-odurdakega an we-dulemar imakoed.”

¹³ Israel-dulemar weyob sogdemaloed: “Be dake, anmar-isdarmalad mogiryob danikid. E-ur-napagined-bila-onomalad, burwa-ooregedyob gwichigudanikid. E-molimar, sulubagi-gukuedba bur binnasuli abarmakdanikid. ¡Anmar duledar-wilesmar! ¡Anmar bela!”

¹⁴ Bab Jehová soged: “Jerusalén-dulemar, be-gwage-isgudiid be urukmala, adi, be, abonolemalagar. ¿Ar sana be binsaed-isganamargi-binsaed iemaloye be sogmala?

¹⁵ Dan-neggwebur-akale, Efraín-yalagan-akale, gayaburba boni-dummagan-danikidgi-sunmaked noalid.

¹⁶ Dulemar-yar-baid-baidsik-bukwamalad be owisomar, Jerusalén-dulemarga be sogmar: ‘Dulemar-dikasurmalad begi ubodani, Judá-neggweburmargi binnasuli gormakdanimar.’

¹⁷ Ani an Bab-Jehová-guedgi soged: Dulemar nainu-ebiris-ambikuedyob bela be-ebiris ambikumaloed, ar ade, be angi uayasuli gusmalad.

¹⁸ Be-daed-ular, be-ibmar-isgana-imaked-ular, bemar weyob gunanaid. ¡Ibmar-isgana-imaked bega nunmaked-dummad uksad! ¡Gwage-ulubgi nue nunmak be-imaksad!”

¹⁹ Ani Jeremías sogded: “¡Nue-nunmak itoleged! ¡Suli-suli an itoged! ¡An-gwage-ulub nue-nunmak an itogusad! ¡An-ulubgi an-gwage-ulub nakwamaknaid! ¡An sunmaksulir guosulid! ¡An sunmakergebed! Gar-trompeta-goled an itoged, bila-onomalad-gormaked an itoged.

²⁰ Sabsur-wilegedi, ukin-ukin danikid, ar bela yalagan sabsur-gusa nagusad. Ukiagwale, an-dordoneg maluded, an-meged-neg ukiagwale ayarided.

²¹ ¿Ar sanagwadse an-isdarmalad-e-bander bar daksuli an guoe? ¿Ar sanagwadse an-isdarmalad-e-gar-trompeta-goled bar an itogosuli guoe?”

²² Bab-Jehová soged: “An-dulamar binsaedsurmaladid, aku an-dakmalad. Mimmigan-binsaedsurmaladid, aku neg-itomalad. Ibmar-isgana-imakedsikdi binsaed-ibegan nanamalad. Ibmar-nued-imakeddi wissurmalad.”

²³ Ani Jeremías sogded: “An napneg-dakdegu, bela napaneg gagales-nai an dakalid. Niba an atakdebargu, bela negsichidbi-nai an dakalid.

²⁴ Yalasik an atakdebargu, yalamar giglimakbukwa an dakalid. Bela yar-mullugan nakwamakbukwa an dakalid.

²⁵ An atakdegu, dulemar sate an dakalid, bela nuumar duurmaksa nanaed.

²⁶ An nue-dakdebargu, napa-gadi-sanmakedi nega-dulesulidbi-nai an dakalid. Bab-Jehová ibmar-imaksadbali, bela neggweburmar akwamarbi ganna-ganna-bukwa gusad. Bab-Dummad-urwedbali, bela deyob gusad.”

²⁷ Bab-Jehová weyobi soged: “Bela yalamar swanga imaklegoed, degi-inigwele, naitinagase an obelogosulid.

²⁸ A-ulale, bela-yar-naid wile-itonai guoed, nibnega negsichidbi naguoed. An bato sogsabinned, an-ibmar-sogsad bar an ogwaosulid. Bato an imakoye sogsad, bar an igar ogwaosulid.

²⁹ ”Sorda-sigugi-bila-onomalad binnasuli-goledba, degi, sorda-moligi-sii-urwemalad binnasuli-goledba, dulemar bela duurmakdemaloed. Gwenna-gwenna dulemar, bulaganba-doge-doge wakitemaloed, baigandi, akwa-dummagangi nakwidmaloed. Bela neggwebur ollobi naguoed, dule-wargwensaale bar egi gudii guosulid.

³⁰ ”Bemar, Jerusalén-dorgan nue be wilesmalad: ¿Ar igi be binsamala? ¿Ibiga be mor-gargemalad yomala? ¿Ibiga be ormar-nuegan nasikmala? ¿Ibiga be ibya-sigamar magmala? Ar binsarsunna yeerdaklege na be san-imaknanaid. Ar dule-be-abesmalad, isdar be-dakmalad, unnila be-oburgwega be-abemalad.

³¹ ”Igi-ome na gebe e-igargi-boni-itonaile, binnasuli-gornaidae, deyobi, dulemar-gole an itoged. We-binnasuli-gornanaidi, Sión-dulemar gornaid, akus-akus bunnonaid. Na e-argan-onakwale, weyob sognanaimalad: ‘¡An duledar-wiles-ini! ¡An bela! ¡Dule-gindakmalad an-gasmalad!’ ”