Jeremías 3 - Kuna San Blas

¹ Bab-Jehová bemarga soged: “Binsa-sogmalo: ‘Dule-wargwen ome-metele, we-ome machered-baid-nikunonikile, machered-idualed, ¿gannar e-omega-gusad-monao be insae? Suli, gege gannar monaed. Ar monaele, bela yar-oichogo-itole.’ Emide bemar, Israel-dulemar, galagwensuli abirgunagwarsuli be nanasmalad. Degisoggu, geg be bar anse warmakmalad.

² Nue be yar-mullugan-swana-naid be dake: Bia be galagwensuli-gussuli dakmalodibe. Bemar, Árabe-dulemaryob nega-dulesulidba igar-yalagi mellesii be damalad. Omegan-gamba-imakmaladi, na machered-abindaksidamaladyobi, be gudidamalad. Bemar galagwensuli-isgusmaladbali, we-yala be oichosmalad.

³ A-ulale, bar bemarga dii wissulid, degi, dii-wied-ibagangi bar bemarga dii wissurbalid. Ar bede ome-gambasaedyob na be san-imaksamalad, gwen bingedar be itossurmalad.

⁴ Emisgwasaar be anse weyob gordigusad: ‘Babaye, bipigwad-akale be an-ai-nuedye.’

⁵ Be sogsabalid: ‘Babaye, ¿be anmarbo urwedigu guode? ¿Be anmarbo degisadegu sae-itodii guode?’ Deyob be sogdigusmargu, degite, amba bemar ibmar-isgana-imakdii gusmalad.”

Israel-dulemar Bab-Jehováʼgi dummad-isgudimalad

⁶ Josías-reyga-maiunni, Bab-Jehová anga weyob sognonigusad: “Jeremías, ¿Israel-dule-uayasulidamalad-ibmar-isgana-imaksad be daksa? Bela yar-mulluganse, sapi-dummagan-urba galagwensuli gusmalad.

⁷ Bela we-ibmar-isgana-imaksamalad-sorba, gannar anse nonimaloye an binsasanad. Degi-inigwele, gwen anse gannar nonisurmalad. E-gwenadgan-Judá-dulemar-uayasulidamogadi, e-gwenadgan-ibmar-imaksad daksamarmogad.

⁸ Ar Judá-dulemar daksagusad, igi an Israel-dule-uayasulidamalad galagwensuli-gued-ular metegusa, an ega ome-meted-garda-uksagusad an-daksamalad. Degite, e-gwenadgan-Judá-dule-uayasulidamalad gwen an-dobee itossulid, e-gwenadgan-Israel-dulemaryob galagwensuli gusmarmogad.

⁹ ”Israel-dulemar an-yardaksagu, gwen bai itossulid. Aka bur bela yar-oichosad, degi, akwamar-bab-dummadyob-imaklemaladba, degine, suarmar-bab-dummadyob-imaklemaladba galagwensuli nanasmalad.

¹⁰ Bela weyob neg-nagus-inigwele, e-gwenadgan-Judá-dule-uayasulidamalad gwen gwage-ulubgi e-itogedba anse nonisulid, unnila binsa angi dododii gusad. Ani an Bab-Jehová-guedgi bemarga soged.”

¹¹ Bab-Jehová anga weyob sogdebalid: “Jeremías, Israel-dule-uayasulidamaladi, bur Judá-dule-galagwensuli-nanamaladba bur nued daklesunnad.

¹² Jeremías, dad-nakwed-argan-sapiledsik be nae. We-gaya be sognao. Weyob be sogo: ‘Weyob Bab-Jehová sogye: Ani an Bab-Jehová-guedgi bemarga soged: Israel-dule-uayasulidamalad, gannar be anse dagmala, an isdar bemar-dakosulid. Ani an Bab-Jehová-guedgi bemarga soged: An wile-dulemar-dakdaedid, isdar an bemar-dakdii guosulid.

¹³ Ani an Bab-Jehová-guedgi bemarga soged: Unnila be-isgusad be magar-itomala, na be angi-nosmalad be magar-itomala. Bela sapi-dummagan-urba bab-dummad-baiganga be ibmar-imaksamalad be magar-itomala, gwen be an-sogedba-nanabigussulid be magar-itomala.’

¹⁴ ”Ani an Bab-Jehová-guedgine bemarga soged: Bemar Israel-dule-uayasulidamalad, gannar be anse dagmala. ¡Ar ani an be-ibedid! Neggwebur-iliba war-wargwen an bemar-suoed, degine, be-dadgan-iliba war-warbo an bemar-subaloed. Geb Sión-yalase an bemar-nidagoed.

¹⁵ An bemarga dule-be-idumalad dakedba an bega ukoed, adi, wemar an-ibmar-abegedba imakmalagar. Binsaed-nikaa be-semalagar, ibmar-nue-wisidba be-idumalagar.

¹⁶ ”Ani an Bab-Jehová-guedgi bemarga soged: Yoo bemar bukidargusale, nue-mergusale: Bab-Jehová-Dadganbo-Igar-Mesisad-Ulugi bar sunmaklegosulid. Dulemar bar a-Ulugi binsaosurmalad, degi, bar a-Ulu obarosurmalad. Degine, bar Ulu-baid sobosurmalad, ar bar abegosurmalad.

¹⁷ ”A-ibagangine: ‘Bab-Jehová-ologanaye’ be Jerusalén-bimaloed. Bela dulemar-yar-baid-baidgi-bukwamalad Jerusalén-neggweburse an-nug-odummogega nonimaloed. Bar bemar gwagegi-ibmar-isganagi-binsaedba ibmar imakosurmalad.

¹⁸ ”A-ibagangine, Judá-dulemar, Israel-dulemarbo gannar atogoed. Neggwebur-dad-nakwed-argan-sapiledsik-siidba be danimaloed, bia an, be-dadganga-yar-uksagusadse be bukunonimaloed.

¹⁹ An-sunnagwad an weyob sogsagusanad: Israel an-mimmiga an imakoye, napa-bur-sunsoged an ega-ukoye, an sogsagusad. Baiganba yar-bur-yeerdakleged an ega ukoye, an binsasad. An binsasanad be anse gormaloye, ‘Babye.’ Be angi aibanosurmarye, an binsasanad.

²⁰ An Bab-Jehová-guedgine bemarga soged: Bemar, Israel-dulemar, igi-ome e-sui-dikarba-galagwensuli-nanae, deyobi, be angi gusmalad.”

²¹ Bab-Jehová bemarga soged: “Yar-mullugan-nega-swaan-naidganba, dulemar-oimake itoleged. Israel-dulemar ise-wilegar bobukwa itoleged. Ar e-daed oichosmalad, igar-noaled susmalad, Ani an e-Bab-Dummad-Jehová-guedi iedmalad.

²² ”Mimmigan, bemar uayasulidamalad, gannar be anse dagmala, be-galagwensulidamalad ani an bega nudakoed.” Israel-dulemar sogdemalad: “Bab-Jehová, anmar bese danimala, ar be, anmar-Bab-Dummadid.

²³ Ar anmar binsa bab-dummaganse-gorleged-e-yar-mulluganase naoed, binsa a-yalaganba anmar iba-galagwensulid ononamaloed. Bab-Dummad-Jehová, unnila anmar beginbi abonoleged-igar-maid amied.

²⁴ ”Anmar sapingwagwad-akale, galagwensuli bab-dummad-baiganba-nanaed-ular, anmar-masmala, degi, anmar-bunamala, surgunonikid. Anmar sibad-wawaadmar, moli-bebe-nikadmar, degi, bela anmar-babgan-ibmar-amisadi, surgunonikid.

²⁵ Bab-Dummad-Jehováʼye, anmar begi isgudiguad, anmar-babgan begi nodiguad. Bab-Dummad-Jehová, anmar bipigwad-akale, emi-ibase be-sogedba nanadisulid. Degisoggu, bur anmar bingegumarsun, bela-belad bingedar itomarsun.”