Isaías 59 - Kuna San Blas

Israel-dulemar e-isgued barsogsad

¹ Bab-Jehová anmar-abonogega, ganguedsurye soglesulid. Degi, aku-anmar-itoye soglesurbalid, ar bela magar anmar-itoged.

² Ar bemar-isguedi, Bab-Dummadgi-banguega bemar-imaked. Ar be-isgumaladi, Bab-Dummad bemar-idu wagar-aibirar-megega imaked, adi, melle bemar-itogegar.

³ Ar bemar ablisbi argan sedimalad, degi, goonumar isguedbi na be sedimalad. Be-gwabin-duku unnila gakansaedgi sunmaked, be-gaya unnila igar-isganaginbi sunmaked.

⁴ Dule igar-innikigwadgi-sunmaked sulid, dule napiragwadgi-igar-naboged sulid. Gakansalegedgi bensurmalad, na muchub-muchub gakansamalad. Binsaed-isganagi binsadamalad, degi, igar-isgana imakdedamalad.

⁵ Dulemar, naibe-nuegan-e-akwa-bukwayobi binsaed-isgana sedimalad, diba-nagueyob, igar-isgana amimalad. Dule, binsaed-isgana we-naibe-akwayob gunnele, burgoed. Ar dule, we-naibe-akwa marele, ega naibeyob binsaed-isgana ainidagoed.

⁶ Dibagi geg mor sobleged, dule diba-soblealed geg e-morga imaked. Dule-ibmar-imakedi ibmar-isganabi-imakmalad, e-ibmar-samaladi, unnila sabsur-neg-gagaed.

⁷ A-dulemar ibmar-isgana bur-imakmalad, bur dule-ibmar-akalodisulid-ibe ablis eomalad. E-binsaedi, galagwensur-igar-isganagi binsamalad. E-ibmar-imakedi bela neg-oichoged.

⁸ Gwage-bogidikid-igar gwen wissurmalad. E-ibmar-imakedgi igar-innikimalad naisulid, unnila igar-noarmaladbi onoardaed. Ar dule we-igar-isganamarba nanadiile, gwage-bogidikid-igar wisguosulid.

⁹ Isaías sogded: “A-ulale, igar-napira-maid anmargi banguded. Degi, igar-innikigwadi anmargi aibated. Neg-meegwadi anmar abdakdii gusanad. Degi-inigwele, neg-gubyagwaledgi anmar bukudapid. Neg-ibegwaledi anmar abdakdii gusanad. Degi-inigwele, anmar negsichidgi bukudapid.

¹⁰ Dule-aku-atakmaladyobi, anmar galu-ebu-ebu gudimalad. Dule-ibyasurmaladyobi, anmar negsichidgi acha-acha gudimalad. Neg-mutikidyobi, anmar neg-ibgine yoleddamalad. Anmar bonisuli-inigwele, burgwaleyob na gudimalad.

¹¹ Bela anmar wiob-uurmakedyob, uurmakbukwad. Nuu-sibu akiginnedyob, anmar akiginbukwad. Aisaar igar-innikigwad-imaked anmar na abdakbukwanad, gwen imaklessulid. Ollorgued-igala anmargi amba dikasulid.

¹² ”Be wisid, anmar-isguedi bukidarad. Anmar-isguedi, anmargi aibined. Anmar-ibmar-isgana-imaked anmarba gudiguad. Anmar isguedgi-gudiidi, na magar itomalad.

¹³ Anmar, uayasuli gusad. Anmar, Bab-Jehová-obachamalad. Anmar, Bab-Dummad-iedmalad. Anmar, dogdar dule-mesagwar imakmalad, degi, dogdar dule-yardaksamalad. Anmar-binsaedgi-gakansaed-ainiedi, anmar dulemarga sogsamalad.

¹⁴ Igar-napira-maidi isdar-daklege gusad, degi, igar-napiragwadi amba anmargi dikasulid. Dulemar-ambikuedgi igar-nabirid-oyoleged bergusad. Binsaed-nikadaedi, bar anmar oyosurgusad.

¹⁵ Dule ibmar-nabir-imaked, bar daklesulid. Ar dule isguedgi bangudele, bela e-ibmar-nikadi ei obelodamalad. ”Bab-Jehová bela igar-innikimalad-bergusa-dakargu, nabir-itossulid.

¹⁶ Bab-Dummadi, dule igar-nuegangi bar-binsasuli dakargu, geger dakalid. A-ulale, Bab-Dummad na e-gangued oyogoye binsaalid. Adi, anmar-abonogegar, e-igar-innikigwadba anmar-abingaegar.

¹⁷ Bab-Dummadi e-igar-innikigwadi, sigu-abgaedyobi yooed, degi, bormo-gurginyobi abonoleged-igar sioed, buged-imaked-mola yooed, urwed-mola yooed.

¹⁸ Dule-ibmar-imaksamaladba sabsur-odurdakoed. Neggwebur-demar-gakaba-bukmaladga buged-imakoed: E-isdarmaladse urwoed, degi, e-isdarmaladgi buged-imakoed.

¹⁹ ”Dad-argwanedsikmalad Bab-Jehová-nug dobgudmaloed. Dad-nakwedsikmalad Bab-Jehováʼgi binsaed-nikaa gudmaloed. Ar ade, diwar-gwichigudanidaedyobi Bab-Jehová na e-buu-imakedba danikoed.”

²⁰ Bab-Jehová weyob soged: “Dule-bendakedi, Sión-yalase danikoed, Jacob-wagan-e-isguedga-bukib-binsaega imaknonikoed.

²¹ ”An bemarbo igar mesed, An-Burba bemargi maigu guoed. Be-gwabindukugine, an bega an-gayaburba-nasiksadi, bar begine alliosulid. Degi, be-mimmigangine, be-wagangine, bar an-gayaburba alliosulid, emi-ibadse degisadegu guoed.”