Isaías 52 - Kuna San Blas

Bab-Dummad Sión-dulemar-ollor-imaksad

¹ Sión-dorgan, ¡be atake! ¡Be atake! ¡Gandikid-mola be yoe! Neggwebur-islidikid-Jerusalén, be-mor-gargerbamalad be yoe. Ar dule-abgan-uka-duku-sikarsurmaladi, degi, dule-Bab-Dummad-wissurmaladi, bar bemarse dogosurmalad.

² ¡Jerusalén-neggwebur, be gwichigue! ¡Olli be obate! ¡Gannar ologanagi be sige! Sión-yala-sisgwa, be galesgua, dukargi-esgoro-dub-nasiklesad be unge.

³ Ar Bab-Jehová weyob soged: “Bemar manigi be uklessulid, bemar manigi be onolegosurbalid. Bemar binsa-onolegoed.”

⁴ Ar Bab-Dummad-Bur-Birigined-Jehová weyob soged: “Epenne an-dulamar, Egipto-yalase nadegusad. Agine, na megisgusmalad. Emide, Asiria-sordamar binsarsunna an-dulemar-mesagwar imakalid.”

⁵ Emide, Bab-Jehová soged: “¿Ibi an wegi imakdii? Ar binsarsunna, an-ibe an-dulamar-gasa sesmalad. E-negsemamaid an-dulamargi dodomalad. Bane-bane an-nuggi dododigudamalad, bogigudisurmalad.

⁶ Degisoggu, a-ulale, a-ibagangine, an-dulamar an-nug wisgunonikoed. A-ibagangine, ani an ega sunmaknaidi, an e-walik gwisgunonikoed.”

⁷ Dule yar-imbaba-gayaburba-nued-sedanikidi, dule-gayaburba-bogidikid-berbegedi, ibiyobi yeer daklemala. Dule gayaburba-nuegan-barsogedi, degine, dule abonoleged-igargi-sunmakedi, ibiyobi yeer daklemala. Dule, Sión-dulemarga weyob-sogedi: “Be-Bab-Dummad negdakmaiye.” Dule-deyob-sunmakmaladi, ibiyobi yeer daklemala.

⁸ ¡Be itoge! Be-dule-nakulemalad binnasuli-gorbukmalad, weligwaledbali gandikidba gorbukmalad. Ar ade, na e-ibyagwale dakbukmalad, Bab-Jehová gannar Sión-yalase daniki.

⁹ Jerusalén-dulemar, na be bular-weligwar-namaklegedgi be namakmar. Ar ade, Bab-Jehová e-dulemar-baisur-itogega imaksad, degi, Jerusalén-neggwebur bendaksad.

¹⁰ Bab-Jehová, bela dulemar-yar-baid-baidgi-bukmaladga e-gangued oyogoed. Bela napneg-naid-ugakaase-bukmaladi, anmar-Bab-Dummad-e-abonoged dakmaloed.

¹¹ Bemar, Babse-goled-neggi-ibmar-ebulemalad-semaladi, be nomar, be agi ainimar. ¡E-dulemar-abargi-gudiidgi be nomar! ¡Be san-urukmar! ¡Melle ibmar-swilidiksulid be ebumalo!

¹² Degi-inigwele, mer be gwae-gwae itomalo. Mer be gwae-gwae-abarmakdemarbalo. Ar Bab-Jehová bemar-idumai guoed. Israel-e-Bab-Dummad be-sorba-nai guoed.

Bab-Jehová-e-mai-wilegoed

¹³ Bab-Jehová soged: “An-mai emargi nakoed. E-nug odummolegoed, dule-dummadga guoed, degi, ologanagi sigoed.

¹⁴ Dulemar dakdamalogu, bukidar geger-dakmaloed, ar e-wagar-daklegedi bar aa daklegosulid, ar e-daklegedi, bar dule-daklegosulid.

¹⁵ Amba deyob dulemar-yar-baid-baidgi-bukmaladi, geger dakmarmogoed. E-asabinni, reymar gwen-sunmakosurmalad, ar weyob-ega-ibmar-soglessulid dakdamaloed, degi, weyob-ibmar-itossurmalad na magar itononimaloed.”