Isaías 40 - Kuna San Blas

3. ISRAEL-DULEMAR-GWAGE-ARMAKLEGOED (40:1–48:22) Bab-Jehová, Israel-dulemarga gwage-armaked

¹ Anmar-Bab-Dummad soged: “An-dulamar-e-gwage ogannomar, baisur-ito be imakmar.

² Jerusalén-dulemarga nue-sabedgi be sunmakmar, ega be sogmar: ‘Be maiga-arbadigusmalad-ibagan wese bergunoniye, be-isgusmalad bato bega bennuklesye. Bemar isgusad-nukad unniguar bato ilabo-wilub sabsur-odurdaklesye. Bab-Jehová bemarga isgued elisye.’ ”

³ Gayaburba binnasuli goled, weyob soged: “Bab-Jehováʼga nega-dulesulidganba igar mayemar, anmar-Bab-Dummadga nega-dinnaganba igar swilidik mesmar.

⁴ Bela nebagan swilidik imakmarsun, yalamar, degi, neg-mullugana omatolesun. Degine, napa-muru-muru-mamaid innikii imakmarsun, igar-bire-bire-mamaid innikii imakmarsun.

⁵ Agine geb Bab-Jehová-e-gandikid-yeerdakleged bela dulemarga oyolegoed.” Ar Bab-Jehová-sunnagwad deyob sogsad.

⁶ Gayaburba weyob soged: “Binnasuli be soge.” An ega weyob soged: “¿Ibu an binnasuli sogosunna?” Geb anga soged: “Bela dulemarga be soge: ‘Dulemar gaganyobi gued. E-yeerdaklegedi, nainugi-dutu-achunneyobi gued.

⁷ Bab-Jehová-e-buu-imaked egi nasale, gagan baisur-dinguddaed, dutumala, baisur-dinguddamogad. Ar dulemar gagan-ara-aramaladyobi gued.

⁸ Gaganmala baisur-dinguddaed, dutumala, baisur-dinguddamogad. Ar anmar-Bab-Dummad-Gayaburbadi, degisadegu maiguad, berguosulid.’ ”

⁹ Bab-Dummad sogded: “Sión-yalagi be nakwenae, gayaburba-nuegangi be sunmaknae. Yala-matusulidse be nakwenae, Jerusalén-neggweburga, gayaburba-nuegangi be sunmaknae. Ise-gandikidba be sunmaknae, binnasuli be sunmako, melle be dobe itogo. Judá-neggweburmarga be soge: ‘Be nue-dakmar. Wegi anmar-Bab-Dummad-danikid be dakmar.’

¹⁰ ”Bab-Jehová-gandikidba-danikid, be dakmar. Bab-Jehová e na negsemaid. E-dulamar-ollor-imaksadi, ebali nidanikid. Ibidar-nued-amisadi eba sedanikid.

¹¹ Bab-Jehová e-dulamar-bendakdanikid. Igi sibad-wawaad-edarbedi, e-sibad-wawaad-mimmi nakwaa imakdae, geb e-binasgargi semaidae, degi, sibad-wawaad-milesmalad nue nimaidae. Deyobi, Bab-Jehová e-dulamar bendakdanikid.”

Dule, Israel-e-Bab-Dummadyobid sulid

¹² ¿Doa dii-naid e-argangi wilubsasa? ¿Doa mogir-naid e-goomargi wilub-imaksa? ¿Doa ibmar-wilubsaedgi ukub-naid urbisa? ¿Doa ibmar-wilubsaedgi yar-dummagan wilubsasa? ¿Doa ibmar-wilubsaedgi yar-mullugana wilub-imaksa?

¹³ ¿Doa Bab-Jehová-E-Burba bela balamioe? ¿Doa ega binsaed-ukedga guoe?

¹⁴ ¿Ar doase Bab-Jehová ibmar-magar-itogega binsaed-amissunna? ¿Ar doa igar-inniki-imaked-igarba Bab-Jehová-odurdaksasunna? ¿Doa ega ibmar-nue-wisigued uksasunna? ¿Doa binsaed-nikaa-daed-igarba Bab-Jehová-odurdaksasunna? Suli, dule bipisaale wegiid-igarba Bab-Jehová-odurdaksasulid.

¹⁵ Ar dulemar-yar-baid-baidgi-bukmaladi, Bab-Jehová-asabinni unnila bormoyagi dii-gwagwen-argwachayobi gumalad. Degi, ibmar-wilubsalegedgi ukub-ichesaar wilubsalegedyob gumalad. Ar Bab-Jehová dupgan-nanaidi, ukub-buru-aidikueyobi daked.

¹⁶ Líbano-yargi-sapanmar-nikadi, Babga-ibmar-ogumaklegedgi-ebulegega unnisulid. Líbano-e-ibmar-durgan-nikadi, Bab-Dummadga-ogumaklegega, unnisurbalid.

¹⁷ Bab-Jehová-asabinni, bela dulemar-yar-baid-baidgi-bukmaladi, ibigwensuli gumalad. Egala, gwen ibmar-nuedga gusulid.

¹⁸ ¿Doa-ebo be Bab-Dummad-wilubdakoe? ¿Ibu-ibmar-sobaledbo be wilub-imakoe?

¹⁹ Dule-ibmar-sobmaladi, esgorogi ibmar-bab-dummadyob-imakleged sobmalad. A-sorba, dule-or-sobedi, a-ibmar-birgi or-nasikmalad, geb ega manidubmar sobbalid.

²⁰ Ar dule-wilegeddi, e-bab-dummad-sobega suar-gege-nunguedi amied. A-sorbali, dule-wileged, dule-ibmar-nued-sobed amied. Adi, ega nuekwaa suar-bab-dummadyob sobega, melle ege-ege gwisguegar.

²¹ ¿Ar ade, bemar wissurmarsi? ¿Bemar itossurmarsi? ¿Bato gebesailagine bemarga soglessursi? ¿Napneg-nagusad-akar bemar odurdaklessurmarsi?

²² Ar Bab-Jehováʼdi napneg-dirbir-naidbirgi negdaksiid, dulemar-bukwadi sesmaryobi ega gued, bai daksulid. Bab-Jehová mor-dummad-nallaa-imaklegedyobi mogir-imaked. Bab-Jehová mor-neg-egalegedyobi, mogir-billi egadaed, adi, egi megegar.

²³ Bab-Jehová, dule-gandikmalad obelodaed. Dule napneggi-dummadga-negsemamaidi, ibmar-isganayobi obeloged.

²⁴ A-dummagan sapiwar-nue-diglessuliyobi gumalad, ibmar-gwag-nue-diglessuliyobi gumalad, sapi-saila napa-yaba e-malimar-nue-ainissulidyobi gumalad. Ar Bab-Jehová egi buu-imakdele, dingudmaloed, ar gagan-dinnaganayobi burwa-dummadba seledoed.

²⁵ Bab-Jehová-Isligwaled weyob soged: “Degite, ¿doabo bemar an-wilubdakmalosunna? ¿Doa anyobi-daklege gusunna?”

²⁶ Niba be nue atakmar, ¿doa bela we-ibmarmar obinnisa? Bab-Jehová e na niisgwamar-onied, sog-soggwen ilemaked, e-nugbali ese goled. Bab-Jehová-e-ganguedi, ibiyobi dummarba gue. E-garganguedi, ibiyobi gandiki negsemai.

²⁷ Jacob-wagan, ¿ibiga be Bab-Jehová-dikarba sunmake? Israel-dulemar, ¿ibiga be urwakwaa Bab-Jehová-dakmala? Be sogmalad: “An-igarmar Bab-Jehováʼgi dukumaiye. An-Bab-Dummad an-ibmar-imaked baisurdakye.”

²⁸ ¿Ar ade, be wissursi? ¿Be wisgussursi? Ar Bab-Jehová Bab-Dummad-degisadeguadid, napneg-bipirmaknaid bela obinnisadid, budar-itoged nikasulid, gege geggubalid, e-nue-ibmar-wisidi, gege balamileged.

²⁹ Bab-Jehová dule-yegusmaladga gangued uked, E na dule-nollo-itomaladga gandikidba gangued uked.

³⁰ Sapingana dutusur-inigwele, geggusdamalad, budar-itogusdamalad. Masmala yoleddamalad, aimukuddamalad.

³¹ Degi-inigwele, dule-Bab-Jehováʼgi-bensurmaladdi, gannarse gangued nikumaloed, sulubagi-gukueyobi gumaloed: Abarmakdii gumaloed, gwen gegguosurmalad, igala-suid-nanadii gumaloed, gwen gegguosurmalad.