Isaías 33 - Kuna San Blas

Bab-Jehováʼgi abonoleged danikid

¹ Asiria-dulemar-dule-wiodimalad, gwen be wioledisulidi, ¡be duledar-wilesmar! Asiria-dulemar-dule-yamodimaladi, gwen be yamoledisulidi, ¡be dule-wilesmar! Be dulemar-obelosale, be bergumarmogoed. Be dulemar-yamosale, be yamolemarmogoed.

² Bab-Jehováʼye, wile be anmar-dake. Ar anmar begi bendakleged edarbediid. Bane-bane wakudaryalabali, anmarga be niga-ogannoged. Suli-suli-itoged-ibagine, anmar-abonogega be gued.

³ Be-gayaburba mala-goledyob-goledbali, dulemar gwakiar duurmakdedamalad. Be-gangued be oyodele, dulemar-yar-baid-baidgi-bukmalad aisakiddamalad.

⁴ We-dulemar-e-ibmar-nikadgi, e-isdarmalad ses-burwigana-bateyobi egi nonimaloed. E-ibe bela ibmar-nuegan sunonimaloed.

⁵ Bab-Jehová-e-nug odummolegoed, ar nibneggi negdakmaid. Bab-Jehová, igar-innikigwad-imakega Sión-yala-imakmaid, emarga-ibmar-nabir-guega imakmaid.

⁶ Bab-Dummadi, dobsuli-gudiguega anmar-imaked. E-binsaed-nikadaed, degi, bela e-ibmar-wisid, bela-bela bendakleged anmarga uksad. Bab-Jehová-dobee-nanaedi, anmarga ibmar-nuedga gued.

⁷ Be nue dule-gandikmalad-gordidiid itomar, ibiyobi neg-galimbaba binnasuli oimakdemala. Neg-bogidik-saedgi-sunmakdimaladi, bela-belad ogormakdemalad.

⁸ Dulemar bar igarba daklesulid, igar-ollo maid, dulemar bar igarba iirmaksulid. Na-ebo-igar-mesismaladi bichismalad. Dulemar, dule-we-igar-maid-wismalad isdar dakdemalad. Dulemargi bar binsaed-nika dasurmalad.

⁹ Bela dulemar bukib-binsaedbimalad, Líbano-yala bela dinguded, e-dakleged bela yogguded. Sarón-neba bela nega-dulesulidga naded. Basán-yala, degi, Carmelo-yala, e-yeer-ara-ara-dakleged yogguded.

¹⁰ Bab-Jehová weyob soged: “Emisgindi, an ibmar imakgwersunno. Emisgindi, an-nug odummolesunnoed, emisgindi, an-nug ogannolesunnoed.

¹¹ Asiria-dulemar igar-amimaladi, unnila e-igarmar binsaledga gued, igarmar-isganaga gued. Ar an buu imakdogua, bergudoed.

¹² E-sorda-bila-onomaladi, ikomar-sooyagi-gummaknaidyobi, gumaloed. Bela burubi gumaloed.

¹³ ”Bemar, dikasuli-bukwamalad, an ibmar-imaksad, be nue itomar. Bemar, itaka-bukmalad, an-gangued be dakmar.

¹⁴ Dule-isgumalad Sión-yalagi dobe itobukmalad. Dule-isganamar dobedba wawanmakbukmalad. Weyob sogbukwamalad: ‘¿Doa-anmar, soo-dule-obeloged-nagaba megoe? ¿Doa-anmar, soo-dummad-gege-bergued-duurmaksiid-nagaba megoe?’

¹⁵ Unnila dule-igar-innikigwadba-nanadiidbi, degi, napiragwadba-sunmakdiidbi, nibneggi mai guoed. Dule ibmar-isganagi-mani-onodisulidbi, dule emarse-manigi-bakledisulidbi, nibneggi mai guoed. Dule emar-gindakmaladba ibsadisulidbi, ibmar-isgana-imakleged dakbidasulidbi,

¹⁶ dule-weyob-daedi, nibneggi mai guoed. Akwasaila-gandikmalad e-dukued-negga guoed, masgullemalad ega uklegoed, gobed ega gwen surguosulid.”

¹⁷ Isaías, Israel-dulemarga sogdebalid: “Bemar-sunnagwad, rey-e-gangued-yeerdaklegoed be dakmaloed, bemar-yala dungumai be dakmarbaloed.

¹⁸ Bemar dobee-itosadgi-binsadmardibe, na be sogdemaloed: ‘¿Bia wede mani-ebisged nade? ¿Bia wede mani-daked nade? ¿Bia wede nakuleged-neg-matusurmalad-dakdiid nade?’

¹⁹ Bar be we-dulemar-isgana dakosurmalad. We-dulemar, e-gwabinduku-aku-itolemaladid, e-sunmakedi, magar-itolesurmaladid, ber oburagwar sunmakmaladid.

²⁰ ”Sión-yala be dakmar, ar a, anmar-ibamar-onoged-neggweburad. Bemar-sunnagwad Jerusalén-neggwebur be dakmaloed. A-neggwebur, bogi-meged-negad, nuesaale sobar siid. Bipisaale e-abgamalad-suar ungosulid, e-abgamalad-dubmar itirosurbalid.

²¹ Jerusalénʼgi, Bab-Jehová anmarga e-gangued oyogoed. Diwar-dummagan-maiyob, degi, diimar-iirmakmaiyob guoed. Ar a-diwargine, ur-gammi-nikamalad iirmakosulid, degine, ur-gandikmalad egine iirmakosulid.

²² Ar ade, Bab-Jehová, anmar-idugedid. Ar Bab-Jehová, anmarga dummadga negdakmaidid. Ar Bab-Jehová, anmar-e-reyd. ¡E na anmar-abonogoedid!

²³ ”Asiria-ulumar-e-dub nollomakded. E-urmor-buar geg-nue-gwisgue egemakwichid, degine, e-urmormar geg argaed. E-isdarmaladi, degi, dule-muya-muyamaladse-bakale, ei ibmar atursamaloed.

²⁴ Ar Bab-Dummad bela dulemar-Siónʼgi-mamaid-e-isgued osulogoed, degine, bipisaale dule-gwensak sogosulid: ‘An uelleye.’ ”