Isaías 29 - Kuna San Blas

David-neggwebur-ibitogoed

¹ Bab-Jehová sogdebalid: “Ariel-neggwebur, be nue-wilegoed. We-neggwebur, David-sorda-ambikusad-negad. Gatik birga-irba iba-onodii be nanamar.

² Degi-inigwele, Ariel-dorgan, an begala bonigan onogoed. Ar ogormaksii be guoed, bukib-binsasii be guoed. Bela neggwebur soose ogumaklegoed, ibmar-ogumakar-ukleged-ailagi ibmar-ogumaklegeyob guoed.

³ An-sorda-bila-onomalad bela be-ebilis an urboed. Bela neggwebur-dikarbali, bila-onoged-galumar an emakoed, bila-onoged-aila an be-iduar soboed.

⁴ Mesagwar be imaklegoed, napagi mellemai be guoed. Be-ibmar-biedi wis-bollee-itolege guoed. Be-gayaburba galudor-sunmakedyob itolege guoed. Napayala be sunmakmaile, unnila wis bipi-bollee itolege guoed.”

⁵ Be-isdarmalad-ichesulidi, ukub-buruyob guoed. Dule-gandikmalad-bukidaradi, gagan-durgan-dinnagana burwaba seleddaedyobi, imaklegoed. Ukiarmakagwale, ilagwen-saale imaklegoed.

⁶ Bab-Jehová-Bela-Gangued-Nikadi, bese nonikoed. Mala-abalagi, negabandur-abalagi nonikoed. Neg-oimakagwaled-abalagi nonikoed, burwa-ololed-abalagi, burwa-dummad-abalagi nonikoed. Degine, soo-duurmakwichid-abalagi nonikoed.

⁷ Dula-bukidar-yar-baid-baidgi-bukmalad Ariel-neggweburgi-gwisgumaladi, bela e-neg-gandikmalad-ei-earbimaladi, bela neggwebur-ebirdimaladi, bela bergudmaloed. Boo-dadabin-berguddaeyobi, bergudmaloed.

⁸ Dula-bukidar-yar-baid-baidgi-bukmaladi, Sión-yalagi-bila-onomaladi, ukudba burgwidmaloed. Dule gabidele, na mas-gunsiiye gabdakdamaloed, gobsiiye gabdakdamaloed. Degi-inigwele, ataas-nadele, ukudmaada itodamaloed. Gammu dinare itodamaloed.

Israel-dulemar burbar aku-atakmalad, degi, wagar-darbo damalad

⁹ Bemar Bab-Dummad-gayaburba-barsogmalad, dule-binsaedsulidyob be gudii gumarsun. Dule-aku-atakedyob, ibmar-akudake be gudii gumarsun. Mummuyobi be aibandii gumarsun Inna-gagbid gobsabayobi be aibandii gumarsun.

¹⁰ Bab-Jehová bela-belad bar-ibmar-daksuli be-imaksad. Bab-Dummad-gayaburba-barsogmalad-ibe burbar-geg-ibmar-dake imaksad. Negburgan-dakmalad bar negburgan-daksuli imaksad.

¹¹ Negburgan-bemarga-oyolegedi, garda-bipirmakaled-sakdigaleyobi guoed, be aku itomaloed. Ar dule-garda-wisidga, we-garda-bipirmakar-maid be uksale, ega be sogele: “Wis be anga absoye.” We-dule, be-abin weyob sokaliled: “An bega absogosurye. Ar ade, sakdigar maiddeeye.”

¹² Ar dule-garda-wissulidga, we-garda-bipirmakar-maid be ukye sogele, ega be sogele: “Wis be anga absoye.” We-dule, be-abin weyob sokaliled: “An garda wissur-absoye.”

¹³ Bab-Jehová weyob Isaíasʼga sogded: “We-dulemar an-nug-odummoye soged. E-sunmakedgi an-nug-ogannoye soged. Degi-inigwele, unnila asginbi an-nug odummomalad. E-gwage-ulubgindi angi gwen binsasurmalad. An-dobee-nanaye-sogmaladi, ar gwen an-igar-maidba nanasurmalad. Unnila dulemar-igar-mamaidba nanamalad.

¹⁴ A-ulale, we-dulemar gannar ibmar-gegerdaklemalad-dakega an imakoed, geb geger dakdemaloed. E-dule-binsaed-ibegan e-binsaed-nikadi, an ei osulogoed, degi, e-dule-nue-ibmar-wismalad ibmar-wissulidga an imakoed.”

¹⁵ Dulemar Bab-Jehová-idu-dukumaloye-na-bimaladi, ¡be duledar-wilesmar! E-igar-dukuar-imakdimaladi, negsichigi igar-isgana-imakdimaladi, ¡be dule-wilesmar! Ar we-dulemar na binsadimalad: “¿Ar doa anmar-dakoe? ¿Doa anmar-wisguoe? Gwen dule anmar-dakosuli. Gwen dule anmar-wisguosuli.”

¹⁶ ¡Ibiyob be gakansadamala! ¿Ar dule-napsagi-arbaed, napsabo emarsi? Ar ibmar-soblesadde, dule-e-sobsadga sogosi: “Be an-sobsasuli.” Napsa-sobaled, sunna dule-napsagi-arbaedga sogosi: “Amba be ibmar wissuli.” Suli, gege deyob soged.

Israel-dulemar abonolegoed

¹⁷ Líbano-yala emisgwasaale, napa-nuedga guoed, gadi-ibmar-sanmakedga guoed. Napa-gadi-ibmar-sanmakedi, sapurga naguoed.

¹⁸ A-ibagangine, uaya-satemaladi, dule ega garda-bipirmakar-maid absoalile, magar itodmaloed. Dule-ibyasurmaladi, magar atakdemaloed, negasichid bar ega naguosulid.

¹⁹ Dule-wilemaladi, gannar Bab-Jehováʼgi yeer-itodmaloed, dule-ibmar-abesa-gudimalad Israel-e-Bab-Jehová-Isligwaledgi weligwar-itodmaloed.

²⁰ A-ibagangine, sabsur-dule-imakmaladi, dule-isgudimaladi, bela yoggudoed. Ibmar-isgana-saedginbi-binsadidamaladi, bela obelolegoed.

²¹ Yogabinne-dulegi-gakansaar-gwisgumaladi, dule-igar-nabomalad-yamoged-dulemala, degi, dule-e-bendaked-satedgi yamo-gakansaale-sunmakmaladi, bela obelolegoed.

²² A-ulale, Bab-Jehová Abraham-bendaksadi, weyob Jacob-waganga soged: “Emi-iba-onodoedgi, bemar Jacob-wagan bar bingedar itogosulid, dobedba bar niga-argwanosulid.

²³ Israel-e-mimmigan bela e-dulemargi an-ibmar-imaksad magar daksamalale, bela an-nug-odummodmaloed, degi, bela Israel-dulemar Jacob-e-Bab-Dummad-Isligwaled-nug odummodmaloed. Israel-e-Bab-Dummadgine binsaed-nikaa gudmaloed.

²⁴ Dulemar aku-neg-itodimalad, magar neg-itoge namaloed. Dule-geg-boo-gudidamaladi, an-igar-maid itodmaloed.”