Isaías 26 - Kuna San Blas

Isdarmaladgi-nakwedgi-namakleged

¹ A-ibagine, dulemar Judá-yargi we-namaked namakdemaloed: “Anmardi neggwebur-gandikid nikamalad. Bab-Jehová, neggwebur-gandikidi, galu-matusulidyobi, degi, neg-abingaed-gandikidyobi anmar-bendakega imaksad.

² Jerusalén-neggwebur-e-yawagak egamar, adi, dule-nuegan innikii-Bab-igargi-nanamalad ubomalagar.

³ Dule-beginbi-binsaedi, bogidikidgi-gudisaega be imakoed, ar begi bensulid.

⁴ Bab-Jehováʼgi-bensuli be gudii gumar, ar Bab-Jehováʼbi akwasailayobi degisadegu gued.

⁵ Bab-Jehová, dule-gannarba-san-sadimaladi sabsur-imaked, neggwebur-san-dummarba-imakedi, ogalakued. Napase-balimetega imaked, napabi-nai imaked.

⁶ Dule-wilegana, degi, dule-nollogana, we-neggweburgi dii-dii annamaloed.

⁷ ”Dule-innikimalad-e-igar innikigwadbiid, Bab-Jehová, bedi dule-innikigwad gued, bee be, dule-innikigwadga igar inniki imaked.

⁸ Bab-Jehová, anmar begi bensurmalad. Be-igar-nabolemalad-innikimaladgi bensurmarbalid. Anmar begi-binsadii gubied, be-nuggi-binsadii gubied.

⁹ Mutikidbali, degi, ibginedbali, an be-amidaed. Be igar-innikigwad napneggi ukdele, bela dule-napnegginmalad durdakdedamalad, ibi igar-innikigwadi.

¹⁰ Bab-Jehová, be dule-isganamar wiledakda-inigwele, degite, amba igar-innikigwad durdaksurmalad. Napneggi dule-nuegan-abargi-gudimar-inigwele, galagwensuli gudimalad, Bab-Jehová-Bela-Gangued-Nikadsuliyob be-dakdamalad.

¹¹ ”Bab-Jehová, be sabsur-odurdaked-igar guagwar ega be nasiksad, ar emardi degite aku dakmalad. Be anmar-bela-bela-sabed we-dulemarse be oyoge, adi, bingedar itomalagar. Dule-isganamar-idu be soo-sisadgi obeloge.

¹² ”Bab-Jehová, be anmarga bogidikid uked, ar bela anmar-ibmar-imakedi, be-ganguedba anmar imaked.

¹³ Bab-Jehová, be anmar-Bab-Dummadid. Dummagan-baigan anmar-dummaganga gusmalanad, degi-inigwele, anmar bur be-nugbi odummoged.

¹⁴ We-dummagan bato burgwismalad, bar durguosurmalad. Bato napaga gusmalad, bar gwisguosurmalad. Ar be we-dummagan sabsur-odurdaksad, bela be obelosad. Dulemar melle egi bar binsaega be imaksad.

¹⁵ Bab-Jehová, be anmar-yala onasguega imaksad, be anmar-yala onasgusad, dule-gandikidga be gusad. Bela yarmar-abingunanaid-onasguega be imaksad.

¹⁶ Bab-Jehová, anmar suli-suli-itodigua, anmar bese gochagusad. Be anmar-sabsur-odurdaknaigua, anmar ulubgi-nunmaked-abalagi bese gochagusad.

¹⁷ Igi sior-gurgin-nikad e-boni-itoalile, nunmakedba binnasuli gollardae, deyob, Bab-Jehová, anmar be-asabinni nunmakedba binnasuli gorsii gusad.

¹⁸ Anmar binnasuli bese gochamar-inigwele, degi, nunmakedgi bese gocha-inigwele, unnila boniganbi anmar abingasad. Gwen anmar napnegse emar-bendaked senonisulid, napneggi-dulemar-bukib-bukuega gwen gwalulessurmalad.

¹⁹ ”Degi-inigwele, Bab-Jehová, be-dula-burgwarmalad gannar dula gudii gumaloed. E-muimar gannarse dula gumaloed. ¡Dulemar-burgwar-mamaidi, be gwisgumar! ¡Weligwaledgi binnasuli be gormar! Bab-Jehová, igi be bolegoedba, be-boo-miedi, gaganmar odungudae, deyobi, be-dula-burgwarmalad gannar be odulogoed.

²⁰ ”¡An-dulamar! Be-negyaba be ubomar. Yawagak be edumalo. Wis ichee be dukumalo, Bab-Jehová e-urwed-berguedse be dukumalo.

²¹ Itoakwaa be bukumalo, ar Bab-Jehová e-maidgi noesokalid. Dulamar we-napneggi-bukmalad egi isgusadba sabsur-odurdakdasokalid. Napnega ablis-aryosadi, oyogoed, napnega dulemar-burgwismaladi, bar odukumai guosulid.”