Isaías 23 - Kuna San Blas

Tiroʼgi-yoedse-neg-guoedgi sunmaklesad

¹ Bab-Jehová Isaíasʼga Tiro-neggwebur-guoedi oyosad: Quitim-yar-akale, Tarsis-ur-selaganse gayaburbamar nonikid. Tiro-neggwebur bergussiid, e-negmar, degi, e-ur-nagumalad, bela ei bibichisad. Abali, amar bukib-binsabukwad.

² Tiro-dorgan, boo be ambikumar. Sidón-dulemar-ibmar-ukedgi-arbamalad, boo be ambikumar. Be-selamar bega ibmar-nuegan-bukidar berbesmalad.

³ E-masgullemaladi, Nilo-diwar-e-ana-gwensakgi danikid. Tiro-neggwebur, dulemar-yar-baid-baid-bukwadbo, mani-onobukwa gusad. Nilo-diwargi-ibmar-gwag-welegedgi mani-amibukwa gusmalad.

⁴ Sidón-dulemar, be bingedar itomarsun, bemar, muu-billi-ibedga gumalad. Emidi, muu-billi weyob sogsad: “An bipisaale gwen abganba an galitodisulid, an gwen mimmi bakdisulid. An gwen mimmigan odummodisulid, an gwen bunamala ibmargi odurdakdisulid.”

⁵ Egipto-yalase, Tiro-neggwebur-bergusad-gayaburba warmaksale, Egipto-dulemar Tiro-neggweburga bukib-binsadmaloed.

⁶ Tarsis-neggweburse be namar, demar-gakagi-bukwamalad, be bukib-binsamar.

⁷ Tiro-neggweburde, ¿neggwebur-weligwaledinsursi? We-neggweburde, ¿bur dikasurgus siidinsursi? We-dulemarde, ¿dikasur-aineba bur nanadimaladinsursi?

⁸ ¿Doa Tiro-neggwebur-weyob-guega igar amisa? We-neggwebur nuga-nika siidinad. E-dulemar-ibmar-ukedgi-arbamaladi, dule-nuga-nikamaladinad. Dulemar-ese-ibmar-bakmaladi, bela mag-dakedbimalanad.

⁹ Bab-Jehová-Bela-Gangued-Nikad we-igar mesisad, adi, dulemar-nug-gannarba-nikad ei obelogega, bela dule-napneggi-nuga-nikamalad-e-nug bipii imakegar.

¹⁰ Tarsis-dulemar, sapurgi be arbamarsun, ar ur-nagumaladde, bela be-ibe bergusad. Ar bar bemarse Tiro-urmar dognonikosulid.

¹¹ Ar Bab-Jehová muu-billigi e-gangued oyosad, dulemar-yar-baid-baidgi-bukmalad-ogwayega imaksad. Bab-Jehová, Canaán-neggwebur-gandikmalad-obelogega imaksad.

¹² Degi, Bab-Jehová, Sidón-dulemarga weyob sogsad: “Sidón-dulemar, be wese bergunonisun. Be-neggwebur-dummad bela bergussun, bar be weligwar itogosurmalad. ”Ar be Quitim-neggweburse obakmalo-inigwele, amba bogidiki gwen be itogosurmalad.

¹³ ”¡Caldea-neggweburgusadi be dakmala! ¡Bar we-neggwebur sisulid! Ar Asiria-sordamar we-neggwebur bela obelosad. Ibmar-durgan-ursilimalad nega-dulesulidganba-gudimalad-e-negga imaksad. Neg-matusulid-gandikmalad sobsa gusmalad. Reyneg-gandikmalad bela ei earis gusmalad, akwamarbi ganna-ganna napi-obesmalad.

¹⁴ ”Tarsis-ur-selagan bukib-binsabukwamalad, ar e-ur-nagumalad bela bergusad.

¹⁵ ”A-ibagangine, Tiro-neggwebur ieles-guoed, bar egi binsalegosulid. Rey-birga-dulapaa-gakambe (70) dula-gudiguedyobi, e-ieleged-iba guoed. Geb birga-dulapaa-gakambegwad-sorba (70), Tiro-neggweburgi, gambasamalad-e-namaklegedyobi egi namaklegoed:

¹⁶ ‘Gambasaed-ieles-gudiid, gar-arpa be sue, neggwebur be ebirnae. Namaked-bur-nued be ogolo, namaklemalad-bukidar be namako, adi, dulemar bee-ebinsamalagar.’ ”

¹⁷ Birga-dulapaa-gakambegwad (70) bergunonikile, Bab-Jehová Tiro-dulemar gannar e-ibmar-ukedgi-arbamalaga imakdebaloed. Degine, bela-neggwebur-baiganbo gannar ibmar-ukedgi arbadmaloed.

¹⁸ Ar e-mani-onogoeddina, degi, e-ibmar-ukoeddina, Bab-Jehováʼga ukdemaloed. E-manimar, degi, e-ibmarmar gwen sabolesii guosulid. Ar e-mani-onomaladi, dule-Bab-Jehová-nug-odummomaladga uklegoed, adi, nue-immedik-gudii gumalagar, degi, mor-nuegan-yoi-gudii gumalagar.