Isaías 12 - Kuna San Blas

Bab-Dummad-nug-odummogedgi namakleged

¹ A-ibagangine, weyob be sogdoed: “Bab-Jehová, be anse ulus-inigwele, an bega namakoed. Be-urwediid bergunonikid, be an-gwage baisur-itogega imaknonikid.

² Bab-Dummad, an-abonogedid. An egi benguosulid, an dobee itogosulid. Bab-Jehová, be an-ogannogedid, Bab-Jehová, anga namakedga gued, be an-abonogedga gued.”

³ Deginbali, bemar abonolegedgi weligwar itomaloed, bela-bela be Bab-Dummad-e-abonolegedgi yeer itomaloed.

⁴ A-ibagangine, weyob sogledoed: “Bab-Jehováʼga be namakmar, e-nug be odummomar, bela-dulemar-napneggi-bukmaladga e-ibmar-imakedgi be sunmakmar, e-nug-dummarba-guedgi be sunmakmar.

⁵ Bab-Jehováʼga ega-namaklemaladgi be namakmar, ar ade, ibmar-gegerdaklemalad imaksad. We-ibmar-gegerdaklemalad bela we-napneggi dulemar-wisguega be imakmar.

⁶ Sión-yalagi-bukmalad, weligwaledba be namakmar, weligwaledba be gormakmar. Israel-dulemar-e-Bab-Dummad-Isligwaled, bemar-abargine Dule-Gandikidid.”