Isaías 11 - Kuna San Blas

Mesías Igar-innikigwadba yar-seoed

¹ Sapi-siklesad-gannar-ainieyobi, dule-Isaíʼye-nugadgi dule-gwensak nodagoed. E-wagangine, a-dule danikoed.

² A-dulegi Bab-Jehová-E-Burba megoed: Nue-binsaed-nikagued ega ukoed, nue-ibmar-magar-itoged ega ukoed, binsaed-nued-uke imakoed, degi, gangued-nika imakoed, gurgin-nikarba imakoed, degi, Bab-Jehová-dobee-nanadii imakoed.

³ We-dule, Bab-Jehová-dobee-nanaoedba yeer-itodii guoed, dulemar-daklegedba dulemarga igar nabogosulid, dulemar-ibmar-sogedba igar nudakosulid.

⁴ Dule-wilemaladga igar-napiragwadba igar nabogoed, degi, igar-innikigwadba dule-belagwadaedga igar nudakoed. E-sunmakedba dule-bukwad-obelogoed, e-ibmar-sogedba dule-isgana-oburgoed.

⁵ Igar-napiragwadi, molidub-saderba-naiyobi, oyodii guoed. Innikidaedi, e-musir-edinnedyobi, oyodii guoed.

⁶ Achu-burburud, sibad-wawaad-senigwad-ebo gudii guoed. Achu-barbad, sibad-bipi-ebo dodomai guoed. Moli-bebe-nikad-sapingwagwad, achumigur-nono-wawaad-bipigwadmala garmakdii gumaloed. Machi-bipigwa a-ibmar-durgan-idudii guoed.

⁷ Moli-bebe-nikad-ome, wiob-omemala garmadii guoed, e-mimmigana bulakwaa gudii gumogoed. Achumigur-nono-wawaad, moli-bebe-nikad-alugwasualedyob gagan-madii gumogoed.

⁸ Goe-susugwa-amba yoo-mam-iargued, naibe-buled-galu-dikarba dodonai guoed. Mimmi-gebe-mam-iargusadi, naibe-nued-e-yaa-yaba e-argan ododii guoed.

⁹ An-Yala-Islidikid-Naidgi gwen dulemar neg-oichodii guosurmalad, gwen oakalogosurmalad, ar ade, bela yar-naidgi, Bab-Jehová-magar-dake nanadii gumaloed. Muu-billi-dii-bela-engus-naiyobi, bela Bab-Dummad-magar-dake gumaloed.

¹⁰ A-ibagangine, Isaí-e-wagangi-dule-danikoedi, dulemar-iduedga guoed. Bela dulemar-yar-baid-baidgi-bukwamalad ese duurmaknonimaloed. E-neg-megoedi gandikidba-yeerdaklege guoed.

¹¹ A-ibagangine, Bab-Jehová bela e-dulamar-amba-yar-baid-baidgi-mimiles-bubukwad gannar-sedagega imakoed. We-yarmargi mimiles bubukwad: Asiria-yalagi, Egipto-yalagi, Patros-yalagi, Cus-yalagi, Elam-yalagi, Sinar-yalagi, degi, Hamat-yalagi, degine, demar-gakagi-besmalad. Wemar gannar senonikoed.

¹² We-dule-danikoedi, dule-ebiega bandergwichiyobi guoed, bela-dulemar-yar-baid-baidgi-bukmalad ese duurmaknonimaloed. Deginbali, bela Israel-dulemar, degi, Judá-dulemar, galesadba-akar-akar-aisakis-bukwamalad gannarse danakwaa urboed.

¹³ Efraín-dulemar nobed surgudoed, Judá-dulemar-e-isdarmalad bela obelolegoed. Efraín-dulemar, Judá-dulemargi bar nobguosulid, Judá-dulemarmoga Efraín-dulemar-mesagwar bar imakosurmogad.

¹⁴ Aka, emar ebogwa, Filistea-dulemargi dad-argwanedsik-bukmaladgi gwisgudmaloed. Emar ebogwa, dulemar-dad-nakwedsik-bukmalad-ibe ibmar atursadmaloed. Edom-dulemar, Moab-dulemar, degi, Amón-wagan, amarse sabsur-wilemarmogoed. Amar-sogedba ibmar imakmaloed.

¹⁵ Bab-Jehová, Egipto-demar-sukun-naid bela dinna nasikoed. Éufrates-diwargi e-argan oyogoed, egi burwa-uereged barmidagoed, geb we-diwargi dian-sogagugle (7) mesoed, adi, nabir nagab obakmalagar.

¹⁶ Igi-Israel-dulemar Egipto-yargi-nosmargu, ega nanaed-igar maigusa, deyobi, Israel-dulemar-Asiria-yargi-napi-besmaladga nanaed-igar mai gumogoed.