Hebreos 3 - Kuna San Blas

Bab-Jesús, Moisésʼba bur dule-dummadid

¹ Degisoggu, gwenadgan, bemar Jesucristoʼgi-akananaimalad, Bab-Dummad bemarse gochamarmogad. Be weyob Jesús-dakmaloed: We-Cristo-Jesús, Bab-Dummad-e-sapin-bur-dummad gued. Degi, anmarga-igar-nabosadgi anmar-irwa-Bab-Dummadse-goled-bur-dummadga gubalid.

² Igi Moisés, Bab-Dummad-negyagi-bukmalad-abargi gwen galakussuli-arbasgusa, deyobi, Jesús dule-e-nug-imaksadga nuekwaa arbasmogad, gwen galakussuli gusad.

³ We-Jesús, Moisésʼba bur bule nug-odummolesad, ar igi dule-neg-sobedi, negsobsadba bur bule e-nug-odummolege, deyob Jesús-nug bur bule odummolesmogad.

⁴ Ar bela-negmar e-sobed nikad. Ar ibmarmar-imaklesadi, bela Bab-Dummad imaksad.

⁵ Moisés, Bab-Dummad-e-mai, yoedse Bab-Dummad-ibmar-sogoed-e-wilubganga-guega gwen galakussuli Bab-Dummad-neg-yagi arbadii gusad.

⁶ Ar Bab-Dummad-Machi-Cristoʼdi, gwen galakussuli na e-neg-yaurga nanadii gusad. We-neg-obaredi, we, anmardo. Ar anmar Bab-Dummad-ibmar-ukoye-sogsadi, nue an abingasmalale, degi, anmar galakussuli edarbedii gusmalale, anmar egadga gumaloed.

Nue-salakarmar, mer Bab-bengumalo

⁷ A-ulale, Bab-Burba-Isligwaled-sogedyob be imakmalo: “Emi-ibagi Bab-Dummad-gayaburba be itomalale,

⁸ melle be-dadgan Bab-Dummadgi gwisgus-gusmaladyob, bur bule burgumalo. Deun, be-dadgan nega-dulesulidganbali Bab-Dummad-wilubdakdii nanasmalad.

⁹ Deun agine, be-dadgan birga-dulabo (40) amba an-ibmar-imaksad-daksamar-inigwele, an-wilubdaksa gusmalad, an-urwega an-imaksa gusmalad.

¹⁰ A-ulale, a-dulemarse an ulud-gusad, an ega sogsa gusad: ‘Bemar gusgu gwagegi ibmar-isgana-saedginbi-binsamaladid. Degi, an-Igar-Maidba bemar gwen nanadisurmalad.’

¹¹ Degisoggu, an sae-itogedgine, an weyob ise-sogar sogsa gusad: ¡An-obunnogedgi bemar bipisaale gwen obunnogosurmarye!” Salmo 95:7-11

¹² Gwenadgan, nue salakarmar. Melle be Bab-Dummad-Dula-Maidgi bangumalo. Melle be-gwagegi-isdar-binsaedba Bab-Dummadgi bengumalo.

¹³ Bur bane-bane na be ogannodii imakmar, emi amba soglenaidgi, emi-ibaginye, adi, melle bemar-isguedse-yardakleged-ular, uayasuli guegar.

¹⁴ Ar anmar gebesaila igi Cristoʼgi bengussuligusa, deyob anmar degisadegu berguedse egi bengusuli guele, Cristoʼba ibmar nikumogoed.

¹⁵ Anmarga sognaid: “Emi-ibagi Bab-Dummad-gayaburba be itomalale, melle be-dadgan Bab-Dummadgi gwisgus-gusmaladyob, bur bule burgumalo.” Salmo 95:7-8

¹⁶ ¿Ar doamar Bab-Dummad-itosmargu, egi gwisgus gusmarsunna? ¿Ar Egipto-yargi bela Moisés-dulemar-onosad Bab-Dummadgi gwisgus gusmarsursi?

¹⁷ ¿Bab-Dummad doamarse birga-dulabo (40) urwedii gussunna? ¿Dule-isgusmaladsesursi? Ar amar nega-dulesulidganbali bela burgwisgusmalad.

¹⁸ ¿Ar doamarga Bab-Dummad sogsagusa, bemar Canaán-yargi obunnomai guosurmarye? Dule-uayasuligusmaladga deyob sogsagusad.

¹⁹ Anmar daksundo, amala Bab-Dummad-bengusmalad-ulale, obunnoged-yarse dogsasurmalad.