Habacuc 3 - Kuna San Blas

6. HABACUC, BAB-DUMMADSE-GOLED (3:1-19)

¹ Bab-Dummad-gayaburba-barsoged-Habacuc, Bab-Dummadse-goled. We-Bab-Dummadse-goledi, Sigionot-gar-goledba gorlegoed.

² Bab-Jehová, be-nug-dummarba-gued an itosad, Bab-Jehová be-ibmar-imaksadi, be-dobekwaa-nanaega an-imaked. Bab-Jehováʼye, emi anmar-dulagudiidgi be gannar a-ibmarmar imake, be gannar a-ibmarmar oyoge. Bab-Jehováʼye, be uludele, be-dule-wiledaked mer be iego.

³ Bab-Dummad neg-Temánʼye-nugad-akale, danikid, Dule-Isligwaled yar-Paránʼye-nugad-akale, danikid. Bab-Dummad-e-gangued-yeerdakleged bela nibneg-gasad, bela dulemar-we-napneggi-bukwadi e-nug odummomalad.

⁴ E-dakarmakedi, mala-dakarmakmaiyobi gued. E-argangine malamar milemaid, agine, e-gargangued dukuar maid.

⁵ Bab-Dummad-daged-idu, bonigan-bulegan ainied. Bab-Dummad-sorbali, soo-ginnitibi danidaed.

⁶ Bab-Dummad gwisgunonikile, napaneg giglimakde daed. Dulemar-yar-baid-baidgi-bukwad-dakdele, dulemar wawanmakde daed. Bela yar-dummagan-dikasurgus-bubukwad malud daed, yar-senigana-sergan-bubukwad babatid daed, ar Bab-Dummad-igardi degisadeguad.

⁷ Cusán-dulemar-danar-danar-bukwadi, suli-suli-itobukwa an daksad. Madián-dulemar-bukwadi, bela-bela dobe-itobukwa an daksad.

⁸ Bab-Jehová, ¿diwarmarse be ulus gusa? ¿Suke-iirmakmaidse be urwemai gusa? Be-moli-birgi-sii be abarmakmaigua, be-ur-napagined-gege-galakuedgi be nakwisgua, ¿demarse be nue-urwemai gusa?

⁹ Be-warsi na be guagwar ganikid, be-saguyaba sigumar be enosad. Be napaneg-marisadgi dii-iirmakega imaksad.

¹⁰ Yarmar-bubukwad be-dakdedba wawanmakdemalad. Mogirmala, diidar-dummad owinonikid, muu-billi binnasuli uurmakded, demar-mullugana dunguded.

¹¹ Be-mala-ibyemaidba, dad-ibeler geg gaed, be-mala-dakarmakmaidba nii geg noed.

¹² Sae-itodiidba, napneggi be bipirmakdiid. Urwedgine, be dulemar-sabsur-imaked.

¹³ Be-dulamar-bendakegala, be noalid, na be dule-nug-imaksad-bendakegala, be noalid. Dule-isganamar-e-rey-nono, be maad imaksad, bela e-negsemaid e-ibe be obelosad.

¹⁴ E-sordamar-e-nono, be-eswargi be buudu imaksad, we-sordamar an-oaisakiega burwa-dummadyobi, angi yolenonikid. Dule-wileged dule-e-bendaked-satedba, igi dule egi yolenonidae, deyobi, we-sordamar bela-bela-yeer-itogedba angi yolenonikid.

¹⁵ Be-moli-birgi-sii, be demargi bipirmakdiid, demar-binnasuli-arwemamaid-birgi, be bipirmakdiid.

¹⁶ An deyob itosgua, bela an-gwage-ulubse an-ebusad, an be-gaya-itosgua, an-gakuli wawanmakded. Bela an-garmala gulleded, an-nagmar bela nollomakded. Degi-inigwele, andi binnalee, anmar-wionanaid-e-sabsur-odurdaklegoed-iba-nonikoedi, an edarbed.

¹⁷ Ar amba sapi-higuera sanmaksulile, uva-dubmar sanmaksurbalile, andi Bab-Jehováʼgi yeer itogoed, Bab-Dummad-an-abonogedgi, an weligwar itogoed. Amba olivo-sapi e-san nikusulile, amba nainumargi ibmar-gwag welesurbalile, andi Bab-Jehováʼgi yeer itogoed, Bab-Dummad-an-abonogedgi, an weligwar itogoed. Amba sibad-wawaadmar e-galugi bar bukwasulile, amba moli-bebe-nikad wargwensaale, e-galugi bar bukwasurbalile,

¹⁸ andi Bab-Jehováʼgi yeer itogoed, Bab-Dummad-an-abonogedgi, an weligwar itogoed.

¹⁹ Bab-Jehová-Bela-Gangued-Nikadi, an-ogannogedid. Goe-sapur-gwae-gwae-abarmakeyobi, an-imaked, nega-matusulidganba nanaega an-imaked. Gar-gormalad-dub-nikadba-namaklegega narmaklesad. Namakmalad-e-iduedga narmaklesad.