Génesis 7 - Kuna San Blas

1e. Muusaila-Mulusad-Igar (7:1–9:29) Muusaila-mulusad

¹ Geb a-sorba, Bab-Jehová Noéʼga sogded: “Emi-ibagangi, dulemar-bukwad-abargi, unnila bebi an-asabin inniki nanadiid. Degisoggu, be, be-gwenadganmala ur-dummadyaba be doge.

² Geb bela ibmar-durgan-swilidikmalad: Machered-walagugle (7), ome-walagugle, ur-dummadyaba be oubogo. Ibmar-durgan-swilidiksurmaladdi unnila machered-wargwen, ome-wargwen be oubogo.

³ Nuumala amba deyob be imakbaloed: Nuumar-swilidik-akar-akar-nikadi, gwagugle-gwagugle (7-7), abirgunagwar-abirgunagwar ur-dummadyaba be oubogo. Adi, we-napneggi bela ibmar-durgan, nuumarse-bakar, egad-egad balibimalad mer e-dula berguegar.

⁴ ”Ar ade, ibaguglese (7) dii an owioed, iba-dulabo (40) mutikidba, degi, ibginedba dii-winai an imakoed. ¡We-napneggi bela ibmar-dula-obinnilesad, bela an obelogoed!”

⁵ Ar igi Bab-Jehová Noéʼga sogsa, aba bela Noé ibmar imaksad.

⁶ We-napneggi muusaila-nosgua, deunni, Noé birga-dulataled-ilanergwa (600) nikad.

⁷ Noé-ur-dummad-sobsadyaba-dogsamaladi, wemalad: Noé, e-ome, e-masmala, degi, e-balamar, adi, muusailaba melle burgwemalagar.

⁸ Ibmar-durgan-swilidikmalad, ibmar-durgan-swilidiksurmalad, nuumar, ibmar-durgan-napagi-garmakdimalad,

⁹ a-ibmar-durgan, igi Bab-Dummad Noéʼga sogsadyobi, Noéʼba ur-dummadyaba war-warbo abirgunagwar-abirgunagwar dogsamalad.

¹⁰ Ibagugle-gusgu (7), muusaila napneggi muluded.

¹¹ Noé birga-dulataled-ilanergwa-nikadgi (600), nii-warbogwad-ibambe-gakagugledgi, dii-wilasailadgi bela napa-urba-dii-sailagan-mamaid utuded, degine, nibneggi-dii-sailagan-mamaid argaded.

¹² Napneggi iba-dulabo (40) bane-bane mutikidba, ibginedba, dii-winai gusad.

¹³ Noé, ur-dummadyaba-dogsad-ibagi, wemar eba dogsamarmogad: E-ome, e-machi-Sem, e-machi-Cam, e-machi-Jafet, degi, e-masmala-omegan. We-dulemarbi ur-dummadyaba dogsamalad.

¹⁴ Wemarba bela ibmar-durgan-na-egad-egad-balibimalad dogsamarbalid. A-ibdurgan wemalad: Ibmar-durgan-sapurbarmalad, ibmar-durgan-sunna-akwilemalad, ibmar-durgan-napagi-garmakdimalad, nuumar, degi, bela ibmar-sakan-nikamalad. We-ibmar-durgan, Noéʼba ur-dummadgi dogsamarmogad.

¹⁵ Bela ibmar-dula-gudidimalad Noéʼba ur-dummadyaba war-warbo dogsamalad.

¹⁶ Bab-Dummad Noéʼga-sogsadba bela ibmar-durgan-akar-akar na abirgunagwar-abirgunagwar dogsamalad. Geb a-sorba, Bab-Jehová ur-dummad-yawagak edisad.

¹⁷ Iba-dulabo (40) napneggi dii-winai gusad. Dii-muludgu, ur muamakded. Degisoggu, ur-dummad dii-birgi muamaknai gusad.

¹⁸ Dii sabsur-muremai-muremai guded. Ur-dummaddi dii-birgi muamaknai gussunnad.

¹⁹ Dii bela-bela mulussoggu, napneggi-yar-dummagan-bukmalad bela dogsad.

²⁰ Bela yarmar dogsa-sigisgu, amba dii dalipaa-abala-wilub (3½) muremai gusad.

²¹ Weyob bela ibmar-durgan-we-napneggi-bukwad burgwisad: Nuumar, ibmar-durgan-sunna-akwilemalad, ibmar-durgan-sapurbarmalad, ibmar-durgan-unimalad, degi, bela dulemar burgwismarmogad.

²² We-napneggi ibmar-dula-gudimalad, bela burgwisad.

²³ Weyob bela we-napneggi we-ibmarmar obelolesad: Dulemar, ibmar-durgan, ibmar-durgan-napagi-garmakdimalad, degi, nuumar, amar bela burgwismalad.

²⁴ Unnila, Noé, degi, ur-dummadyaba-bukwamaladbi durgusmalad. Dakargu, iba-dulagugle-gakambe (150) bela napneggi dii-saila mulus nagusad.