Génesis 5 - Kuna San Blas

Adán-e-wagan

¹ We, Adán-e-wagan-nugmar-narmakar-mamaid-e-gardad. Bab-Dummad dule-obinnisgua, deunni na e-sunnague dule-imaksad.

² Bab-Dummad machered ome-ebogwa obinnisad. Wemargi ise-nued binsasad. Bab-Dummad dulemar-obinnisgua, amarga sogsad: “Bemar, duleye nugguoye.”

³ Adán birga-dulanergwa-gakambe-nikadgi (130), e-machi gwalulesad, Setʼye onugsanonikid. Setʼde bela Adánʼsun-dakleged, degine, bela e-bab-daeyobi dabalid.

⁴ A-sorba, Adán birga-dulataled-ilabaabak (800) napi-gudii gusad. Adán, machimala-baigan nikusbalid, degine, bunamala nikusbalid.

⁵ Degisoggu, Adán bela birga-dulataled-ilabakebak gaka durgwen-gakambe (930) dula-gudii gusad. Degi-birga-nika Adán burgwisad.

⁶ Set birga-dulatar-gakatar-nikadgi (105), e-machi-Enós gwalulesad.

⁷ A-sorba, Set birga-dulataled-ilabaabak gakagugle (807) napi-gudii gusad. Set, machimala-baigan nikusbalid, degine, bunamala nikusbalid.

⁸ Degisoggu, Set, bela birga-dulataled-ilabakebak gakambe-gakabo (912) dula-gudii gusad. Degi-birga-nika Set burgwisad.

⁹ Enós birga-dulabake-gakambe-nikadgi (90), e-machi-Cainán gwalulesad.

¹⁰ A-sorbali, Enós, birga-dulataled-ilabaabak gakambe-gakatar (815) napi-gudii gusad. Enós, machimala-baigan nikusbalid, degine, bunamala nikusbalid.

¹¹ Degisoggu, Enós, bela birga-dulataled-ilabakebak gakatar (905) dula-gudii gusad. Degi-birga-nika Enós burgwisad.

¹² Cainán, birga-dulapaa-gakambe-nikadgi (70), e-machi-Mahalaleel gwalulesad.

¹³ A-sorbali, Cainán, birga-dulataled-ilabaabak gaka dulabo (840) napi-gudii gusad. Cainán, machimala-baigan nikusbalid, degine, bunamala nikusbalid.

¹⁴ Degisoggu, Cainán, bela birga-dulataled-ilabakebak gakambe (910) dula-gudii gusad. Degi-birga-nika Cainán burgwisad.

¹⁵ Mahalaleel, birga-dulapaa-gakatar-nikadgi (65), e-machi-Jared gwalulesad.

¹⁶ A-sorba, Mahalaleel, birga-dulataled-ilabaabak gaka dulagwen-gakambe (830) napi-gudii gusad. Mahalaleel, machimala-baigan nikusbalid, degine, bunamala nikusbalid.

¹⁷ Degisoggu, Mahalaleel, bela birga-dulataled-ilabaabak gaka dulabake-gakambe-gakatar (895) dula-gudii gusad. Degi-birga-nika Mahalaleel burgwisad.

¹⁸ Jared, birga-dulabaabak-gakabo-nikadgi (162), e-machi-Enoc gwalulesad.

¹⁹ A-sorba, Jared, birga-dulataled-ilabaabak (800) napi-gudii gusad. Jared, machimala-baigan nikusbalid, degine, bunamala nikusbalid.

²⁰ Degisoggu, Jared, bela birga-dulataled-ilabakebak gaka dulapaa-gakabo (962) dula-gudii gusad. Degi-birga-nika Jared burgwisad.

²¹ Enoc, birga-dulapaa-gakatar-nikadgi (65), e-machi-Matusalén gwalulesad.

²² Matusalén-gwalulesad-sorba, Enoc, birga-dulataled-ilapaa (300) Bab-Dummad-walikaa nanadii gusad. Enoc, machimala-baigan nikusbalid, degine, bunamala nikusbalid.

²³ Degisoggu, Enoc, bela birga-dulataled-ilapaa gaka dulapaa-gakatar (365) dula-gudii gusad.

²⁴ Ar Enoc, Bab-Dummad-walikaa nanadii gussoggu, ibagwengi sate daklealid, ar ade, Bab-Dummad na-sesad.

²⁵ Matusalén, birga-dulabakebak-gakagugle-nikadgi (187), e-machi-Lamec gwalulesad.

²⁶ A-sorba, Matusalén, birga-dulataled-ilagugle gaka dulabake-gakabo (782) napi-gudii gusad. Matusalén, machimala-baigan nikusbalid, degine, bunamala nikusbalid.

²⁷ Degisoggu, Matusalén, bela birga-dulataled-ilabakebak gaka dulapaa-gakabakebak (969) dula-gudii gusad. Degi-birga-nika Matusalén burgwisad.

²⁸ Lamec, birga-dulabakebak-gakabo-nikadgi (182), e-machi gwalulesad.

²⁹ Noéʼye e-machi-onugsasad. Ar ade, sogded: “Bab-Jehová we-napa-ukabsassoggu, a-ular, anmar ise-alamaknai arbaergebed. Ar emigindi, we-machigwa anmarga obunnoged ukoed.”

³⁰ Noé-gwalulesad-sorba, Lamec, birga-dulataled-ilatar gaka dulabake-gakambe-gakatar (595) napi-gudii gusad. Lamec, machimala-baigan nikusbalid, degine, bunamala nikusbalid.

³¹ Degisoggu, Lamec, bela birga-dulataled-ilagugle gaka dulapaa-gakambe-gakagugle (777) dula-gudii gusad. Degi-birga-nika Lamec burgwisad.

³² Noé, bato birga-dulataled-ilatar (500) nikagua, e-masmala gwalulenonikid: Sem, Cam, degi, Jafet.